الماتىدا قىمبات كولىكتەرمەن كورتەج ۇيىمداستىرعاندار جازالاندى. بۇل تۋرالى قالالىق پوليتسيا دەپارتامەنتىنىڭ ءباسپاسوز قىزمەتى حابارلادى.
الماتى قالالىق پوليتسيا دەپارتامەنتى اتالعان دەرەكتى تەكسەرە كەلە كارانتين رەجيمىن جانە جول ەرەجەسىن بۇزۋ ارەكەتى بويىنشا ەكى قۇقىقبۇزۋشىلىقتى تىركەدى. كورتەج قاتىسۋشىلارىنىڭ بارلىعى ۇستالدى. 25 جاستاعى «بەنتلي» كولىگىنىڭ جۇرگىزۋشىسى جانۇزاقوۆتى ە.ت الماتى اۋدانارالىق مامانداندىرىلعان اكىمشىلىك سوتى قر اقبك 476-بابىمەن ايىپتى دەپ تانىپ, 15 تاۋلىككە قاماۋ جونىندە شەشىم قابىلدادى. 30 جاستاعى «بەنتلي» كولىگىنىڭ جولاۋشىسى اسىلبەكوۆ ش.ا قر اقبك 476-بابىمەن ايىپتى دەپ تانىلىپ, 15 تاۋلىككە اكىمشىلىك قاماۋعا الىندى.
27 جاستاعى «كاديللاك» جۇرگىزۋشىسى جۇماعۇلوۆ س.د قر اقبك 476-بابى, قر اقبك 596-بابىنىڭ 3-ءبولىمى بويىنشا قر اقبك 590-بابىنىڭ 3-ءبولىمى نەگىزىندە ايىپتى دەپ تانىلىپ, 14 تاۋلىككە قامالدى. «كاديللاك» جولاۋشىسى 30 جاستاعى كاناەۆ ە.ن قر اقبك 476-بابىمەن اكىمشىلىك جازاعا تارتىلىپ, 15 تاۋلىككە قامالدى. «مەرسەدەس» جۇرگىزۋشىسى 40 جاستاعى ارتىقباەۆ م.م قر اقبك 476-بابى, قر اقبك 596-بابىنىڭ 3-ءبولىمى, قر اقبك 590-بابىنىڭ 4-ءبولىمى بويىنشا ايىپتى دەپ تانىلىپ 10 تاۋلىككە قامالدى.
«تاعى ەكى تۇلعانىڭ كىم ەكەندىگى انىقتالدى. ول ىزدەستىرىلىپ جاتىر. كولىكتەردىڭ بارلىعى ايىپ تۇراعىنا قويىلدى. سونىمەن قاتار, پد وزىندىك قاۋىپسىزدىك باسقارماسى بۇل كورتەجدىڭ بلوكپوست ارقىلى ەمىن-ەركىن وتۋىنە بايلانىستى تەكسەرۋ جۇرگىزبەك. ال وتىرىسقا قاتىسقان قالالىق پد كريمينالدى پوليتسيا باسقارماسىنىڭ باسشىسى جانبولات زيادين قىزمەتتىك تەكسەرۋ اياقتالعانشا قىزمەتىنەن شەتتەتىلدى. بۇل قۇقىقبۇزۋشىلىققا قاتىستى قۇقىقتىق باعا بەرىلەتىن بولادى», - دەدى قالالىق پد باسشىسى قانات تايمەردەنوۆ.