قىزىلوردادا توتەنشە جاعدايعا بايلانىستى كوممۋنالدىق قىزمەتتەر ءتاريفى تومەندەتىلدى. بۇل تۋرالى وڭىرلىك كوممۋنيكاتسيالار قىزمەتى الاڭىندا وتكەن بريفينگتە ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسى مەدەت ۋساين مالىمدەدى.
سالا باسشىسى ەلەكترمەن جابدىقتاۋ قىزمەتى 9,1 جىلۋمەن جابدىقتاۋ (ەسەپتەۋ قۇرالدارىنسىز) 10, سۋمەن جابدىقتاۋ 10,6 ال سۋ بۇرۋ قىزمەتى تولەماقىسى 12 پايىزعا ارزانداعانىن ايتتى. ايتا كەتەيىك, جىلۋمەن جابدىقتاۋ قىزمەتتەرىن ەسەپتەۋ قۇرالدارىمەن پايدالانىپ وتىرعاندار ءۇشىن دە 1 گكال-عا 1989,21 تەڭگەدەن 1790,29 تەڭگەگە دەيىن تومەندەدى.
مەكەمەلەر توتەنشە جاعداي كەزىندە تۇتىنۋشىلاردىڭ قوردالانعان قارىزدارىنا قاراماستان قىزمەت كورسەتۋدى توقتاتپايدى. مەرزىمىن وتكىزىپ العان تولەم ءۇشىن ءوسىمپۇل ەسەپتەلمەيدى.
- تۇتىنۋشىلارعا قولايسىزدىق تۋدىرماس ءۇشىن تولەمدەر مەن ۇسىنىلاتىن قىزمەت ونلاين رەجيمدە جۇمىس جاساۋدا. ياعني, تەرمينال, موبيلدىك قوسىمشالار جانە epd.kz ارقىلى تولەم جاساۋعا بولادى. سونىمەن قاتار ءار ابونەنت «ەنەرگوسەرۆيس» موبيلدىك قوسىمشاسىنان ءوز قارىزىن كورىپ, سىلتەمەلەر ارقىلى ەلەكتروندى تۇردە تولەم جاساي الادى, - دەدى سالا باسشىسى.