ءبىز 23 ناۋرىزدان 5 ساۋىرگە دەيىن تاۋلىك بويى اۋرۋحانادا بولىپ, ءۇزىلىسسىز جۇمىس ىستەدىك. قاسىمدا 3 دارىگەر, 2 رەانيماتولوگ, 6 مەدبيكە, 6 كىشى مەديتسينا قىزمەتكەرى بولدى. اۋرۋ جۇقتىرعان جانە كۇماندى ناۋقاستارمەن تىكەلەي قارىم-قاتىناستا بولىپ, ەمدەدىك, اۋرۋىن انىقتادىق. 14 كۇندىك كەزەگىمىزدى اتقارىپ بولعان سوڭ وبلىستىق دەنساۋلىق ساقتاۋ باسقارماسى قالا سىرتىنداعى دەمالىس ورنىنا جىبەردى.
ارينە دارىگەر ماماندىعى قاشاندا قيىن, جاۋاپتى ماماندىق. وسى ماماندىقتى ءوزىم تاڭداعاندىقتان, باسىمدى بايگەگە تىگۋگە دايىنمىن. وتباسىمىزدى كورمەگەنىمىزگە 20 شاقتى كۇن بولدى. ەڭ قيىنى سول ەكەن. بىراق ءبارى دە ۋاقىتشا قيىندىق قوي.
مەن مەديتسينا قىزمەتكەرلەرىنىڭ قاۋىپتىلىگى اسا جوعارى 1-توبىنا كىرەمىن. تولەماقىنى تولىق الدىم. بىراق ءبىز اقشا ءۇشىن جۇمىس ىستەگەن جوقپىز. ءوز كاسىبي مىندەتىمىزدى اتقاردىق. وسى ەڭبەگىمىزدى جوعارى باعالاعان پرەزيدەنت قاسىم-جومارت توقاەۆقا راحمەت ايتامىن. بۇل مەملەكەتتىڭ مەديتسينا قىزمەتكەرلەرىنە جاساعان ۇلكەن قولداۋى. ءبارىمىز دە ءدان ريزامىز.
گۇلميرا قالماعانبەتوۆا,
اقتوبە وبلىستىق ينفەكتسيالىق اۋرۋحاناسىنىڭ ينفەكتسيونيست دارىگەرى