دەنساۋلىق ساقتاۋ ءمينيسترى ەلجان ءبىرتانوۆ كوروناۆيرۋس جۇقتىرعان الماتى كلينيكالىق ورتالىق اۋرۋحاناسىنىڭ دارىگەرلەرىنە قاتىستى پىكىر ءبىلدىردى.
«الماتى كلينيكالىق ورتالىق اۋرۋحاناسىنداعى كوروناۆيرۋس جۇقتىرۋ جاعدايىنان سوڭ, مەنىڭ تاپسىرماممەن دەنساۋلىق ساقتاۋ ۆيتسە ءمينيسترى كامالجان نادىروۆ پەن تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتى توراعاسىنىڭ ورىنباسارى نۇرحان سادۋاقاسوۆ الماتى قالالىق قوعامدىق دەنساۋلىق ساقتاۋ باسقارماسى باسشىسىمەن بىرگە «كوكتەم» شيپاجايىندا كارانتيندە جاتقان دارىگەرلەرمەن كەزدەسەدى. بارلىق ماسەلە زاڭ اياسىندا شەشىلەدى دەگەن سەنىمدەمىن», دەپ جازدى ەلجان ءبىرتانوۆ Facebook پاراقشاسىندا.
بۇدان سوڭ, مينيستر الماتىداعى مەديتسينالىق ۇيىمدارداعى كوروناۆيرۋس ينفەكتسياسىنىڭ كۇشەيۋ دەرەگىن زەرتتەۋدى تاجىريبەلى ەپيدەميولوگ, تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتى توراعاسىنىڭ ورىنباسارى نۇرحان سادۋاقاسوۆقا جۇكتەگەنىن اتاپ ءوتتى.
ەسكە سالا كەتەيىك, ورتالىق قالالىق كلينيكالىق اۋرۋحانادا 147 دارىگەر كوروناۆيرۋس جۇقتىردى دەگەن اقپارات تاراعان ەدى. اۋرۋحانانىڭ بىرنەشە قىزمەتكەرى «كوكتەم» شيپاجايىنا كارانتينگە جاتقىزىلدى.