كارانتيننىڭ ارقاسىندا قازاق ەرتەگىلەرى فرانتسۋزشا سويلەي باستادى. بۇل تۋرالى 24.kz حابارلادى.
بۇرىنعى شىمكەنتتىك ارۋ, قازىر فرانتسيادا تۇراتىن ءلاززات اتابەك-تريۋففو كارانتين ۋاقىتىندا ءوز قىزدارىنا ارناپ ەرتەگى بەينەباياندارىن ءتۇسىرىپ, ونى الەۋمەتتىك جەلىگە سالىپ وتىرعان. ءلاززات اتابەك-تريۋففو قىزى دانەل ەكەۋى قازاق ەرتەگىلەرىن فرانتسۋز تىلىنە اۋدارىپ, يلليۋستراتسيا جاساپ, ءارى ونى وزدەرى دىبىستاۋدى كارانتين ۋاقىتىندا قولعا العان. كاسىبي ديزاينەر ءلاززاتتىڭ بۇنداي شارۋامەن اينالىسۋعا ۋاقىتى جەتكىلىكسىز ەكەنى تۇسىنىكتى. ول تەك كارانتين ۋاقىتىن پايدالانىپ, ەرتەگى بەينەباياندارىن جاساي باستاعان. بۇلاي جاساعان سەبەبى, ەڭ الدىمەن ء وز قىزدارىن اناسىنىڭ تىلىنە قانىقتىرۋ بولسا, ەكىنشىدەن, فرانتسۋز اۋديتورياسىن قازاق مادەنيەتىمەن تانىستىرۋدى جوسپارلاعان.
– باستاپقىدا ەرتەگىلەردى تەك قازاق تىلىندە جاسايمىز دەپ ويلادىق. ياعني, بار ماتەريالدى جاقسارتۋدى عانا ويلاعانبىز. كەيىننەن نەگە فرانتسۋز تىلىندە دە جاساپ كورمەسكە دەگەن وي پايدا بولدى. فرانتسۋزداردىڭ تارابىنان دا كوپ جاعىمدى پىكىرلەر ايتىلىپ جاتىر, ال قازاقشا ماتەريالدارىمىزدىڭ يۋتۋبتان كوپ داۋىس جيناعانى مەنى تاڭقالدىردى, -دەيدى كەيىپكەر.