بۇگىن ۇكىمەت وتىرىسىندا يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ ونەركاسىپتىك جانە ەنەرگەتيكا سالالارىنداعى جاعداي تۋرالى باياندادى. بۇل تۋرالى پرەمەر-ءمينيستردىڭ ءباسپاسوز قىزمەتى حابارلادى.
2020 جىلدىڭ ءبىرىنشى توقسانى بويىنشا ونەركاسىپ ءوندىرىسىنىڭ كولەمى 105,8% قۇرادى, ونىڭ ىشىندە: تاۋ-كەن ونەركاسىبى 105%, وڭدەۋشى ونەركاسىپ 108,8%. ونەركاسىپ ءونىمىنىڭ كولەمى 15 وڭىردە وڭ ناتيجەسىن بەرۋدە.
مينيستر حابارلاعانداي, تاۋ-كەن ءوندىرىسى سەكتورىندا ءتۇستى كەن ءوندىرىسىنىڭ كولەمى 8,1%-عا ۇلعايدى. تەمىر كەنىن ءوندىرۋ سالاسىندا وڭ ديناميكا بايقالۋدا, ءوسۋى 22,2% قۇرادى.
«كومىر مەن ليگنيت ءوندىرۋ كولەمى 100,2% قۇرادى. وڭدەۋ ونەركاسىبىندە ءوسۋى 8,8% قۇرادى. قارا مەتاللۋرگيادا ءوندىرىس كولەمى 101,5% قۇرادى», — دەدى ب. اتامقۇلوۆ.
ەلدە, سونداي-اق الەمنىڭ باسقا ەلدەرىندە كوروناۆيرۋستىق ينفەكتسيا پاندەمياسىنىڭ دامۋىنا, سونداي-اق مەتالدار نارىعى كونيۋنكتۋراسىنىڭ قالىپتاسقان احۋالىنا جانە ەكسپورتتىق الەۋەتتى قايتا بولۋگە بايلانىستى «ارسەلورميتتال تەمىرتاۋ» اق مەن ERG كومپانيالار توبى ءوندىرىستى تۇراقتاندىرۋدى جانە وندىرىلەتىن ءونىمدى ۇزدىكسىز ساتۋدى قامتاماسىز ەتۋ ماقساتىندا بالامالى وتكىزۋ نارىقتارىن قاراستىرۋدا.
ماشينا جاساۋ سالاسىندا ءوندىرىس كولەمى مىنا كولەمدەردىڭ ۇلعايۋى ەسەبىنەن 30,4%-عا ءوستى:
- اۆتوكولىك قۇرالدارى, ترەيلەرلەر جانە جارتىلاي تىركەمەلەر 69,5%;
- باسقا ساناتتارعا ەنگىزىلمەگەن ماشينالار مەن جابدىقتار 20,7%;
- ەلەكتر جابدىقتارى 17,8%;
- وزگە دە كولىك قۇرالدارىن جاساۋ 53,6%;
- ماشينالار مەن جابدىقتاردى جوندەۋ جانە ورناتۋ 6,2%;
- كومپيۋتەرلەر جاساۋ 9,6%.
ءمينيستردىڭ ايتۋىنشا, فارماتسەۆتيكا ونەركاسىبىندە ءوندىرىس كولەمى 32,2%-عا, جەڭىل ونەركاسىپتە - 14,2%-عا, بىلعارى جانە وعان جاتاتىن ونىمدەر - 18,9%-عا, كيىم ءوندىرىسى - 14,7%-عا ءوستى. قازىرگى ۋاقىتتا «قاراپايىم زاتتار ەكونوميكاسى» باعدارلاماسى شەڭبەرىندە سالانىڭ دامۋى بويىنشا بىرقاتار نورماتيۆتىك اكتىلەر مەن جۇيەلى شارالار قابىلدانۋدا.
كولىك كەشەنى بويىنشا 2020 جىلدىڭ 1 توقسان بويىنشا ناقتى كولەم يندەكسى 98,7% قۇرادى.
ب. اتامقۇلوۆ اتاپ وتكەندەي, COVID-2019 كوروناۆيرۋسىنىڭ تارالۋى كولىك سالاسىنا اسەر ەتىپ وتىر, اتاپ ايتقاندا, بۇگىندە قازاقستان اۋماعىندا كوروناۆيرۋستىڭ تارالۋىنا جول بەرمەۋ ماقساتىندا توقتاتىلدى:
جولاۋشىلار اۆتوبۋسىنىڭ تاسىمالى (ونىڭ ىشىندە قالالىق جولاۋشىلار اۆتوبۋسىنىڭ تاسىمالى); جولاۋشىلار پويىزى; ءجيى اۋە قاتىناستارى.سونىمەن قاتار كەيبىر كاسىپورىنداردىڭ جابىلۋى كولىك پەن لوگيستيكاعا ىقپال ەتەدى, سەبەبى تاسىمالدى جەتكىزۋ مەن تاپسىرىس كولەمىن تومەندەتەدى.
قۇرىلىس بويىنشا ناقتى كولەم يندەكسى 2020 جىلدىڭ قاڭتار-ناۋرىز ايلارى بويىنشا 111,7% قۇرادى. 16 وڭىردە وڭ ديناميكا بايقالادى. قاراعاندى, باتىس قازاقستان, اتىراۋ, تۇركىستان جانە اقمولا وبلىستارى كوش باسشى بولىپ كەلەدى.
«تۇرعىن ءۇي قۇرىلىسى بويىنشا 2020 جىلدىڭ 1-توقسان قورىتىندىسى بويىنشا 2 642 مىڭ شارشى مەتر تۇرعىن ءۇي پايدالانۋعا بەرىلدى. ول 2019 جىلدىڭ ۇقساس كەزەڭىمەن سالىستىرعاندا 96,4% قۇرادى. جىلدىق جوسپاردىڭ ورىندالۋى 18,7% قۇرادى. رەسپۋبليكا بويىنشا بارلىعى 21 069 بىرلىك باسپانا پايدالانۋعا بەرىلدى», — دەپ تۇيىندەدى ب. اتامقۇلوۆ.