پرەمەر-ءمينيستردىڭ ءبىرىنشى ورىنباسارى - قارجى ءمينيسترى ءاليحان سمايىلوۆ 2020 جىلعى ءبىرىنشى توقسانداعى مەملەكەتتىك بيۋدجەتتىڭ اتقارىلۋى تۋرالى باياندادى.
«قالىپتاسقان ەكونوميكالىق جاعدايعا قاراماستان, بيزنەس الدىنداعى ءوز مىندەتتەمەلەرىمىزدى ۋاقتىلى ورىندادىق. ەسەپتى كەزەڭدە ولارعا 193 ملرد تەڭگە كولەمىندە قوسىلعان قۇن سالىعى قايتارىلدى. بۇل 2019 جىلدىڭ ۇقساس كەزەڭىمەن سالىستىرعاندا 84 ملرد تەڭگەگە كوپ», دەدى ءاليحان سمايىلوۆ.
ونىڭ ايتۋىنشا, كىرىستەر بويىنشا جىلدىق جوسپار 6,4 ترلن تەڭگە سوماسىندا بەكىتىلدى.
«جەرگىلىكتى بيۋدجەتتەردىڭ ءوز كىرىستەرى 134 ملرد تەڭگەگە ارتىعىمەن ورىندالىپ, 759 ملرد تەڭگەنى قۇرادى. اسىرا ورىندالۋ نەگىزىنەن سالىقتار ەسەبىنەن قالىپتاستى. ول 127 ملرد تەڭگە. بارلىق وڭىرلەردە كىرىستەردىڭ جوسپارى ارتىعىمەن ورىندالدى. مەملەكەتتىك بيۋدجەت شىعىستارى 98,7%-عا, رەسپۋبليكالىق 99,5%-عا, جەرگىلىكتى بيۋدجەتتەر 97,7%-عا اتقارىلدى. رەسپۋبليكالىق بيۋدجەت شىعىستارى 2,9 ترلن تەڭگەنى قۇرادى. وتكەن جىلدىڭ وسىنداي كەزەڭىمەن سالىستىرعاندا ءوسۋ قارقىنى 109,8% قۇرادى», دەدى ءا. سمايىلوۆ.