ۇلتتىق ەكونوميكا ءمينيسترى رۋسلان دالەنوۆ ۇكىمەت وتىرىسىندا ەلىمىزدىڭ 2020 جىلعى قاڭتار-ناۋرىزداعى الەۋمەتتىك-ەكونوميكالىق دامۋ قورىتىندىسىن باياندادى.
«قاڭتار-ناۋرىزدا جالپى ىشكى ءونىمنىڭ ءوسۋى 2,7 % بولدى. نەگىزگى كاپيتالعا سالىنعان ينۆەستيتسيالار 5,1 %-عا ءوستى. جىلدىق ينفلياتسيا 6,4 %-دى قۇرادى. ەكونوميكانىڭ بازالىق سالالارىندا كولىك پەن تۇرۋ جانە تاماقتانۋ بويىنشا قىزمەتتەردى قوسپاعاندا, وڭ ءوسۋ بايقالادى. قۇرىلىس 11,7%-عا, بايلانىس قىزمەتتەرى – 10,5%-عا, ونەركاسىپ – 5,8%-عا, اۋىل شارۋاشىلىعى – 2,5%-عا ءوستى», دەدى رۋسلان دالەنوۆ.
ونىڭ ايتۋىنشا, 2019 جىلعى ناۋرىز ايىمەن سالىستىرعاندا وسى جىلعى ناۋرىزدا جەكەلەگەن سالالاردا تومەن كورسەتكىش بايقالادى.
«ساۋدا – 3,6, كولىك – 4,7, تۇرۋ جانە تاماقتانۋ بويىنشا قىزمەتتەر – 12,1 جانە قارا مەتاللۋرگيا كولەمى – 13 %-عا ازايدى. جالپى ونەركاسىپتىڭ ءوسۋ قارقىنى 5,8 % دەڭگەيىندە ساقتالدى. 15 وڭىردە ءوسۋ بايقالىپ وتىر. ەڭ جوعارى ءوسۋدى قوستاناي جانە اقمولا وبلىستارى كورسەتتى. سونىمەن بىرگە 2 وڭىردە تومەندەۋ تىركەلدى. بۇل - قىزىلوردا جانە جامبىل وبلىستارى», دەدى ول.