زايسان كولىنىڭ ءدال وكپە تۇسىنا شوڭگەدەي قادالعان شاعىن اۋىل بار. حالقى بالىق اۋلاپ كۇنەلتەدى. سوۆەت زامانىندا ەكىباستۇز كومىرىن كەرەكۋ-سەمەي-وسكەمەن ارقىلى تاسيتىن پاروحود ءجۇرىپ تۇرىپتى. قىسقاسى, جۇرتى باي ءھام ەڭبەكقور.
بۇنى ايتىپ وتىرعان سەبەبىم, ءبىر توپ جان وسى بالىقتى اۋىلدى بەتكە الىپ جورتىپ كەلەمىز. مىنگەنىمىز تاقىرلاي ءمۇجىلىپ, ەكى جىل كۇنگە كۇيگەن سۇيەك سياقتى ادبەن توزعان جامان – «موسكۆيچ». ونى كارى توبەتتەي ىرىلداتىپ ءجۇرىپ كەلەمىز. الدىندا وتىرعان جىگىت اعاسى مازاسىز. وسكەمەندە تۇراتىن رەكەتسۇرەي ءىنىسى قاپاستا وتىر. سونى بوساتۋ ءۇشىن پالەن قاپ بالىق كەرەك. ونىڭ وزىندە اناۋ-مىناۋ ەمەس, كوك ايدىننىڭ «قاسقىرى» – كوكسەركە.
سيىر ساسكەدە سىپاتى قۇنتايجىنىڭ قامالىنداي كوك قاقپاعا تۇمسىق تىرەدىك. بۇل ۇيدە شارۋاسى مىعىم, تىرلىگى توق, ءتارتىبى بەكەم اقساقال تۇرادى. ءبىر بالاسى زاۋىتتىڭ ۇلكەن قايىعىن جالعا الىپ, بالىق اۋلايدى. بۇل – ولاردىڭ جەتى اتاعا جالعاسقان كاسىبى. قاريامەن ءبىز بەيباق تانىس بولعاندىقتان, ەمىكسىگەن توپقا ىلەسە كەلگەن جايىمىز بار. جەڭىستىڭ 50 جىلدىعىندا بۇل ادام تۋرالى جەلپىنتىپ ماقالا جازعانبىز. ول ارداگەردىڭ كوڭىلىنەن شىققان...
حان تاقسىرعا جۇگىنە كەلگەن كەرۋەنشىلەر سياقتى تابالدىرىق اتتاعان بويى «اسسالاۋدى» توگىپ جاتىرمىز. تەكتى قاريا ساقالىن ءبىر سيپاپ, ساۋىر تاۋىنىڭ قۇزارىنا بايلانعان اقسۇر مۇزداقتاي كەرە قاسىن قايشىلاپ قويىپ ءۇنسىز وتىر. قاپاستا جاتقان رەكەتسۇرەيدىڭ اعاسى سويلەدى. شەشەن ادام ەدى, اۋزىنان شىققان لەپىسى ءدال وندىققا تىك-تىك ءتيىپ جاتىر. بايقايمىن, قاريانىڭ قاباعىنا كوكتەمدە شىعىستان وراي سوعاتىن قاراسايدىڭ جىلى جەلى جۇگىردى. ءبارىمىزدى ءبىر-بىرلەپ شولىپ شىقتى. ماعان كەلگەندە «وسىلاردى باستاپ كەلگەن سەنسىڭ-اۋ» دەگەندەي, جىلى جىميىپ ءوتىپ كەتتى.
شاي ءىشىلدى. بالىق اسىلدى. ىشتىك-جەدىك. باتا جاسالدى. ارداگەر-قاريا بالاسىن شاقىردى. «مىنا جىگىتتەرگە ۇراداعى مۇزعا باستىرعان كوكسەركەلەردى بەر. قالاعانىنشا السىن!». بالاسى باقىرايىپ كەتتى. باسىن شايقادى. ءبىز ساسقالاقتاي باستادىق. اقساقال كورىك كەۋدەسىن كوتەردى, ماناعى قىران قاباعىنا ىزعار ۇيالاي قاپتى. ونى ۇلىنا باعىشتاپ:
- بالام, - دەدى. - مىنالار مەنى ايۋ اتقان مىلتىقتىڭ ءدۇمى دەپ كەلىپ وتىر ەمەس پە, بەس قاپ بالىقتان سەنىڭ ريزىعىڭ ۇزىلمەيدى, ءارى-بەرىدەن سوڭ كولدەگى بالىقتى سەن جەمدەپ, باعىپ وتىرعان جوقسىڭ, بەر!. سوڭعى ءسوزى گەنەرالدىڭ ايبىندى بۇيىرعى سياقتى ساڭق ەستىپ ەستىلدى.
ءبىز بەس قاپ كوكسەركەنى (سۋداك) تيەپ الىپ, جامان «موسكۆيچ»-ءتى مىجىرايتىپ تارتىپ وتىردىق. «ايۋ اتقان مىلتىقتىڭ ءدۇمى». وسى ءبىراۋىز ءسوز ۇزاق جىل سانامدا جاڭعىردى دا ءجۇردى.