جالپى قىزىلوردا وبلىس بويىنشا بۇگىنگى كۇنگە دەيىن ادامدار كوپ جينالاتىن بازارلار, ۆوكزال, اۆتوۆوكزال ماڭايى زالالسىزداندىرىلدى. جالپى اۋدانى 3 349 627 شارشى مەتر بولاتىن بۇل اۋماقتاردى دەزينفەكتسيالاۋعا اسكەري بولىمدەر ساربازدارى مەن اۋدان اكىمدىكتەرى جاساقتاعان توپتار جۇمىلدىرىلدى. بۇل تۋرالى وبلىس اكىمىنىڭ ورىنباسارى ناۋرىزباي بايقاداموۆ ونلاين بريفينگتە حابارلادى.
ال ىندەت شىققان وشاقتاردى قر دسم «ۇلتتىق ساراپتاما» ورتالىعىنىڭ قىزىلوردا وبلىستىق فيليالى ماماندارى زالالسىزداندىرۋدا.
بۇگىننەن باستاپ وبلىس ورتالىعىنداعى كوپ قاباتتى ۇيلەر اۋلالارى مەن پودەزدەردى دەزينفەكتسيالاۋ باستالدى.
- كەشە عانا وبلىسقا تاعى 10 مىڭ قوسىمشا تەست سىناماسى جەتكىزىلدى. سونىمەن قاتار, 2 لابوراتوريا ورتالىعى ىسكە قوسىلادى. وسىنىڭ بارلىعى ىندەتتىڭ تارالۋىن تەجەپ, حالىققا تيگىزەر زاردابىن مۇمكىندىگىنشە ازايتۋدىڭ امالى, – دەيدى وبلىس اكىمىنىڭ ورىنباسارى.
ونىڭ ايتۋىنشا, وسى قاۋىپسىزدىك شارالارىنا شەكەدەن قاراپ, باعىنعىسى كەلمەيتىندەر دە كەزدەسەدى. مىسالى, توتەنشە جاعداي جاريالانعالى بەرى ونىڭ رەجيمىن بۇزعان 40 ءدامحانا مەن مەيرامحانا, 22 جەكە ءۇي, 54 دۇكەن يەسىنە شارا قولدانىلدى. ودان بولەك وبلىس اۋماعىنداعى باقىلاۋ بەكەتتەرىنىڭ دە جۇمىسىنا كەدەرگى كەلتىرەتىندەر جوق ەمەس. ىندەتپەن كۇرەس كوپكە ورتاق مىندەت ەكەندىگىن تۇسىنبەي, ءتارتىپ بۇزعانداردىڭ بارىنە شارا قولدانىلدى.