18 ساۋىرگە جوسپارلانعان ەرەجەسىز جەكپە-جەك شەبەرلەرىنىڭ UFC ءتۋرنيرى وتپەيتىن بولدى. بۇل جارىستىڭ باستى باسەكەسىندە اقش-تىڭ قوس مىقتىسى – توني فەرگيۋسون مەن دجاستين گەتجي ايقاسۋعا ءتيىس ەدى.
العاشىندا جەكپە-جەك رەسەيلىك حابيب نۇرماگومەدوۆ پەن توني فەرگيۋسون اراسىندا وتۋگە ءتيىس ەدى. داعىستاننىڭ ورەنى جەكپە-جەكتەن باس تارتقاننان كەيىن ونى گەتجي الماستىردى. سول كەزدەرى كۇللى الەمدە كوروناۆيرۋس ىندەتى ءورشىپ, كوپتەگەن مەملەكەتتەردە سپورتتىق جارىستاردى وتكىزۋگە تىيىم سالىندى. بىراق UFC پرەزيدەنتى دانا ۋايت مەن ايتۋلى ءتۋرنيردى قالاي دا ۇيىمداستىرامىن دەپ ءبىراز ارام تەر بولدى. سپورت سالاسىنىڭ باسى-قاسىندا جۇرگەن ازاماتتار ونىڭ بۇل ارەكەتىن سىنعا الىپ, تىپتەن «ارزان ابىروي جيىپ, مول كولەمدە اقشا تابۋ ءۇشىن ۋايت ەشتەڭەدەن تايىنبايدى. ونىڭ قۇلقىن تەسىپ بارا جاتقان سول» دەپ تە ايىپتادى.
دەسەك تە كۇنى كەشە 18 ساۋىرگە جوسپارلانعانجارىستىڭ وتپەيتىنى بەلگىلى بولدى. «ميلليونداعان جانكۇيەر تاعاتسىزدانا كۇتكەن ءتۋرنيردى قالاي دا ۇيىمداستىرۋ ءۇشىن مەن بارىمدى سالدىم. بىراق جوعارى جاقتان ماعان ۇلكەن ادامدار حابارلاسىپ, ءوتىنىش جاسادى. سولاردىڭ ايتقانىنا كونبەسكە بولمادى, دەيدى دانا ۋايت.