ەلباسى ن.نازارباەۆتىڭ بيىلعى قازاقستان حالقىنا جولداۋىندا بەرگەن تاپسىرمالارىن ىسكە اسىرۋ ماقساتىندا پرەمەر-مينيستر كارىم ءماسىموۆتىڭ قاتىسۋىمەن قازاقستاندىق ۇلەستى دامىتۋ ماسەلەسىنە ارنالعان رەسپۋبليكالىق سەمينار-كەڭەس ءوتتى.
بىرقاتار مينيسترلىكتەر مەن جەرگىلىكتى اتقارۋشى ورگانداردىڭ, ۇلتتىق كومپانيالار مەن ءىرى كاسىپورىنداردىڭ باسشىلارى قاتىسقان “قازاقستاندىق ۇلەس-2020” سەمينار-كەڭەسىندە تاۋارلار, جۇمىستار مەن قىزمەتتەردە وتاندىق ۇلەستى ارتتىرۋ جۇمىسىنىڭ وتكەن جىلعى قورىتىندىسى مەن بيىلعى جىلعا ارنالعان جوسپارلار تالقىلاندى.
وتكەن جىلى 600 ملرد. تەڭگە سوماسىنا 396562 مەملەكەتتىك ساتىپ الۋ تۋرالى شارتتاردىڭ مىندەتتەمەلەرى ورىندالدى. قازاقستاندىق تاۋارلار, جۇمىستار مەن قىزمەتتەر 464,8 ملرد. تەڭگەگە نەمەسە 77,5 پايىزعا ساتىپ الىندى. قازىرگى كەزدە ءىرى ۇلتتىق كومپانيالاردىڭ باسىن بىرىكتىرەتىن “سامۇرىق-قازىنا” اق وتكەن جىلى وتاندىق ۇلەستى دامىتۋ ماقساتىندا 1 ترلن. 541,5 ملرد. تەڭگەگە شارتتار جاساستى. ال جۇيە قۇراۋشى كاسىپورىنداردىڭ تاۋارلار, جۇمىستار مەن قىزمەتتەردى ساتىپ الۋداعى جالپى كولەمى 471,4 ملرد. تەڭگەنى قۇرادى. جەر قوي-ناۋىن پايدالانۋشى كومپانيالاردىڭ ساتىپ الۋلارى 690 ملرد. تەڭگەگە جەتتى. سونىڭ ىشىندە قازاقستاندىق تاۋارلار, جۇمىستار مەن قىزمەتتەر 408,1 ملرد. تەڭگەگە ساتىپ الىندى.
كەڭەستە ءسوز العان ۆيتسە-پرەمەر – يندۋستريا جانە جاڭا تەحنولوگيالار ءمينيسترى اسەت يسەكەشەۆ قازىرگى كەزدە قازاقستاندىق ۇلەستى ارتتىرۋ بويىنشا جۇمىستاردىڭ ءتيىستى دەڭگەيدە جۇرگىزىلىپ جاتقانىنان حاباردار ەتتى. وسى جىلدىڭ قاڭتار ايىنان قازاقستاندىق ۇلەس ماسەلەسىنە ارنالعان ارنايى زاڭنىڭ كۇشىنە ەنۋىمەن بۇگىنگى تاڭدا ەلىمىزدىڭ ءوندىرىس سالاسىندا وتاندىق ۇلەستىڭ كولەمى 52 پايىزعا, “سامۇرىق-قازىنا” قورىنىڭ باسقارۋىنداعى سالالاردا 63 پايىزعا, جۇيە قۇراۋشى كومپانيالاردا 64 پايىزعا جەتكەن.
كەڭەستە ۆيتسە-پرەمەر قازاقستاندىق ۇلەستى ارتتىرۋ بويىنشا ۇكىمەت تاراپىنان ىستەلىنىپ جاتقان جۇمىستاردىڭ تاعى ءبىر ماڭىزدىسى رەتىندە ارتتا قالعان ءوندىرىس تەحنولوگيالارىن قايتا جاڭارتىپ, وتاندىق برەندتى قالىپتاستىرۋ ماقساتىندا كونسترۋكتورلىق بيۋرولاردى اشۋدى جوسپارلاپ وتىرعانىن مالىمدەدى.
سەميناردى ۇكىمەت باسشىسى كارىم ءماسىموۆ قورىتىندىلادى. ول بۇگىنگى تاڭدا وتاندىق ۇلەس پەن ءوندىرىستى وركەندەتۋ ەلىمىز تاۋەلسىزدىگىنىڭ ماسەلەسى بولىپ, ءبىزدىڭ ءار قادامىمىز وسى تالاپقا جاۋاپ بەرۋى كەرەكتىگىن اتاپ ءوتتى. سونىمەن بىرگە ول قازاقستاندىق ۇلەستى ارتتىرۋ ءۇشىن ەلباسىنىڭ ۇكىمەت الدىنا قويعان بارلىق تاپسىرمالارى دەر كەزىندە ورىندالىپ, وعان بارلىق ۇلتتىق حولدينگتەر مەن ءىرى كومپانيالار, جەرگىلىكتى اتقارۋشى ورگاندار اتسالىسۋى كەرەكتىگىن ايتتى. ءسوزىنىڭ سوڭىندا ۇكىمەت باسشىسى وڭىرلەردى دامىتۋ جانە وتاندىق ۇلەستى ارتتىرۋ ماقساتىندا بيۋدجەتتەن جىل سايىن قوماقتى قارجى بولىنەتىنىن, ولاردىڭ ءتيىمدى جۇمسالىپ, حالىققا جانە وندىرىسكە جۇمىس ىستەۋى ءۇشىن مەملەكەتتىڭ بارلىق مۇمكىندىكتى جاسايتىنىن ايتىپ, بيۋدجەتتەن جىلدا بولىنەتىن قارجى ەڭ الدىمەن ىشكى سۇرانىستى قالىپتاستىرۋى قاجەتتىگىن مالىمدەدى. وسى ورايدا ىشكى سۇرانىستى قالىپتاستىرماي وتاندىق ءوندىرىستى دامىتۋ قيىنعا تۇسەتىنىن ەسكەرتكەن ول ءدال قازىرگى ۋاقىتتى ەلىمىزدىڭ تاۋەلسىزدىگىن نىعايتۋ وتاندىق ۇلەسپەن بايلانىستى بولىپ تۇرعانىن, ولاي بولسا بارشانىڭ دا وسى جاۋاپتى ىسكە جۇمىلا كىرىسۋى كەرەكتىگىن جەتكىزدى.
داستان كەنجالين.