اقمولا وبلىسىندا كوكتەمگى سۋ تاسقىنىنىڭ الدىن-الۋ ماقساتىندا وبلىستاعى سۋ ايدىندارى اۋەدەن باقىلانۋدا. ونىڭ ىشىندە سۋ تاسقىنىنىڭ قاۋپى كوپ نۇرا, ەسىل, جاباي, قالقۇتان جانە شاعالالى وزەندەرى باستى نازاردا.
كوكشەتاۋ مەن قورعالجىننىڭ اراسىنداعى كەڭ كوسىلگەن سايىن دالا جاڭا عانا دەلسال بولىپ, دەمىگىپ تۇر. قاردىڭ مۇرتى جاڭا سىنىپ كەلەدى. سونىڭ وزىندە وزەن-كولدەردىڭ ارناسى مول سۋعا مەلتەكتەپ تۇر. كۇرت ەرىسە, قاۋىپ تە كوبەيمەك. قازىرگى تاڭدا اتباسار, تسەلينوگراد, استراحان جانە ارشالى اۋداندارىندا سۋ تاسقىنىنان قورعانۋ جۇمىسىنا 147 ادام, 62 تەحنيكا جانە 15 سۋسورعىش تارتىلعان. جاعداي كۇردەلەنەتىن بولسا, قوسىمشا رەزەرۆتەگى 2410 ادام جانە مىڭنان اسا تەحنيكا جۇمىلدىرىلماقشى.
–كەشە قر ىشكى ىستەر ءمينيسترىنىڭ ورىنباسارى يۋري يلينمەن بىرگە جەرگىلىكتى ماماندار ايماقتىڭ بارلىق سۋ ايدىندارىن اۋەدەن باقىلاپ شىقتى. اسىرەسە تسەلينوگراد, استراحان, اتباسار, زەرەندى اۋداندارىنا ەرەكشە نازار اۋدارىلدى. جالپى العاندا, وڭىردە جاعداي تۇراقتى, وزەندەردىڭ مۇزى ەري قويعان جوق. بولجامعا قاراعاندا, سوڭعى كۇندەرى كۇن جىلىنادى دەپ كۇتىلۋدە. مىنە, سول ساتتە جاباي, ەسىل, كولۋتون وزەندەرىندەگى سۋ دەڭگەيى كوتەرىلەدى. وڭىردەگى كوپىرلەر مەن جول ۇستىندەگى سۋ وتكىزەتىن قۇبىرلار تەگىس تازارتىلدى. قازىر اتباسار, تسەلينوگراد اۋداندارىندا قاردى سىرتقا شىعارۋ جانە بوگەتتەردى بەكىتۋ جۇمىستارى ءجۇرىپ جاتىر,–دەيدى وبلىستىق توتەنشە جاعدايلار جونىندەگى دەپارتامەنتىنىڭ باستىعى الەكسەي سوۆەتوۆ.
«قامدانعان قاپى قالمايدى» دەگەندەي, توتەنشە جاعدايلار جونىندەگى دەپارتامەنتتىڭ كۇن قاباعىن باققانى دا كوڭىلگە دەمەۋ.