كوكشەتاۋ قالاسىنداعى «كوكشەتاۋ مينەرالدى سۋلارى» كاسىپورنى كۇن سايىن قات-قابات قيىندىقپەن بەتپە-بەت كەلىپ, ىنتىماقتاسا جۇمىس ىستەپ جاتقان دارىگەرلەردى جىلى سوزىمەن دە, ساپالى سۋىمەن دە قولداپ وتىر.
كاسىپورىننىڭ ءباسپاسوز قىزمەتىنىڭ مالىمەتىنە قاراعاندا, نۇر-سۇلتان مەن الماتى قالالارىنداعى اۋرۋحانالارعا ءوز ونىمدەرىن تەگىن جىبەرگەن. بۇگىن 1250 ليتر سۋ اقمولا وبلىسىنداعى كارانتين كەزىندە اۋرۋحانالاردا قىزمەت ەتىپ جاتقان اق حالاتتى ابزال جاندارعا اتتاندىرىلعان.
– كۇنى بۇگىنگە دەيىن جەتى مىڭ ليتردەن استام تەگىن سۋ جونەلتتىك,–دەيدى اكتسيونەرلىك قوعامنىڭ ديرەكتورى ستانيسلاۆ ماكسيمەتس, – ءبىزدىڭ كومەگىمىز دارىگەرلەر ەڭبەگىمەن سالىستىرعاندا تۇك ەمەس قوي. ولار بولسا, ءوز ومىرلەرىن قاتەرگە تىگىپ, ادامداردىڭ دەنساۋلىعى ءۇشىن كۇرەسىپ ءجۇر. ول شىنتۋايتىندا, بەيبىت زامانداعى ەرلىككە پارا-پار ەڭبەك. سوندىقتان, ءبىز قاي كەزدە دە ءبىرىنشى بايلىق – دەنساۋلىققا قورعان بولىپ, ەلى ءۇشىن ەڭبەك ەتىپ جاتقان اق نيەتتى ادامداردىڭ ابىرويلى ءىسىن ۇمىتپاي, ارداقتاي ءبىلۋىمىز كەرەك.
ءسوز سوڭىندا اتالمىش كاسىپورىننىڭ وڭىردەگى بيزنەستىڭ الەۋمەتتىك جاۋاپكەرشىلىگى باعىتىندا ۇلكەن ۇلەسى بار ۇجىم ەكەنىن ايتا كەتكەن ءلازىم. بۇگىنگى كۇنى دە سول ۇردىستەن تابىلىپ وتىرعاندارى وزگەگە ونەگە بولارلىق-اق شارۋا.
كوكشەتاۋ قالاسى