ءۇش كۇنگە سوزىلعان «دالالىق ىرعاق-2013» ەكىنشى تۋريستىك جانە اۆتورلىق ءان بايقاۋى «اقتوبە تەڭىزى» سۋ قويماسىنداعى «ساياحات» قالالىق جاعاجايىندا ۇيىمداستىرىلدى.
ءۇش كۇنگە سوزىلعان «دالالىق ىرعاق-2013» ەكىنشى تۋريستىك جانە اۆتورلىق ءان بايقاۋى «اقتوبە تەڭىزى» سۋ قويماسىنداعى «ساياحات» قالالىق جاعاجايىندا ۇيىمداستىرىلدى.
تۋريستىك جانە اۆتورلىق اندەر فەستيۆالىن وتكىزۋدەگى ماقسات اۆتورلىق ءان جانرىن دامىتۋ, ورىنداۋشى تالانتتاردى تاۋىپ, ولاردىڭ شىعارماشىلىق وسۋىنە كومەكتەسۋ, تۋريزم مەن سپورتتىڭ بەلسەندى تۇرلەرىن ناسيحاتتاۋ بولىپ تابىلادى. بايقاۋعا وتاندىق ونەرپازدارمەن بىرگە رەسەيدەن وكىلدەر قاتىستى. بيىلعى شاراعا قاتىسۋشىلاردىڭ قۇرامى وتكەن جىلمەن سالىستىرعاندا اناعۇرلىم كوپ بولدى.
ءان بايقاۋىن تۋريزم ءبولىمى وبلىستىق كاسىپكەرلىك جانە يندۋستريالىق-يننوۆاتسيالىق دامۋ باسقارماسىمەن بىرلەسىپ ۇيىمداستىردى. اقتوبەلىك قولونەر شەبەرلەرىنىڭ قولىنان شىققان بۇيىمدار ءۇش كۇن بويى كورمە-ساۋدادا تۇردى.
العاشقى كۇنى ءان-بي, ەتنومادەني بىرلەستىكتەر ۇجىمدارى, ۋ-شۋ جانە كاپوەيرا, بوديبيلدەر كوماندالارى ونەرلەرىن كورسەتتى. بالالار سۋرەت بايقاۋىنا قاتىستى جانە قۇمنان كونە عاسىرلىق عيماراتتاردىڭ قۇرىلىسىن سالدى. شاحمات پەن توعىزقۇمالاق ۇلتتىق ويىنىنان جارىستار ءوتتى. مۇنىمەن بىرگە, قالالىق تەحنيكالىق شىعارماشىلىق ورتالىعىنىڭ كەمە ۇلگىلەرى ۇيىرمەسىنە قاتىسۋشى ءجاسوسپىرىمدەر ءوز شەبەرلىكتەرىن كورسەتتى. بۇل كەزدە ەرەسەكتەر «4ح4 ح-تەررا» جولسىز تۋريزم كلۋبىنىڭ رەتروماشينالارى مەن موتوتسيكلدەردىڭ كورمەسىن تاماشالاپ, جاعاجاي ۆولەيبولىنان سىنعا ءتۇستى. اۆتورلىق جانە تۋريستىك جاڭا اندەر جاعاجاي اسپانىن ادەمى اۋەنگە بولەدى. فەستيۆالدىڭ اشىلۋ سالتاناتىندا وبلىس اكىمىنىڭ ءبىرىنشى ورىنباسارى نۇرمۇحامبەت ءابدىبەكوۆتىڭ ساحناعا شىققان بەتتە بۋلات وكۋدجاۆانىڭ ولەڭىن وقىپ, گيتارامەن ولەگ ميتياەۆتىڭ «بىزدەردىڭ ءبارىمىزدىڭ بۇگىن وسى جەرگە جينالعانىمىز قانداي جاقسى!..» دەگەن ءانىن شىرقاۋى دا سالتاناتتى ءساتتىڭ ءباسىن ارتتىردى.
– ادامنىڭ كوڭىل كۇيى اۆتورلىق اندەردە مەيلىنشە اشىق كورىنەدى. سوندىقتان مۇنداي ءان مەرەكەلەرى كەرەك. مۇندا دوستىق, ءومىردىڭ قىمبات ساتتەرى, نازىكتىك پەن مەيىرىم اۋەن قاناتىمەن ءورىلەدى. مەنىڭ تۇستاستارىم وسىنداي اسەم اندەردى ەستىپ ەسەيدى, – دەدى ن.ءابدىبەكوۆ.
رەسەي فەدەراتسياسىنىڭ ەڭبەك ءسىڭىرگەن مادەنيەت قايراتكەرى, قۋاندىق قالالىق مادەنيەت ءبولىمىنىڭ باسشىسى جانە «قۋاندىق» فەستيۆالىنىڭ جەتەكشىسى ۆيكتور كالاچەۆ:
– مۇنداعى ونەر توپتارىن, ونىڭ ءىشىندە اقتوبەلىك انشىلەردى رەسەيدە دە جاقسى بىلەدى. مەن وسى كۇندەرى ورسكىدە ءوتىپ جاتقان «بابە لەتو» ءان بايقاۋىنان باس تارتىپ, ارنايى وسىندا كەلدىم. بۇل ءان بايقاۋىندا جاس انشىلەردى كورىپ, تالانتىنا ءسۇيسىندىم. فەستيۆالدىڭ ۇيىمداستىرىلۋى ماعان قاتتى ۇنادى, – دەدى.
ءبىز فەستيۆالدى ۇيىمداستىرۋعا اتسالىسىپ جۇرگەن ورىنبور وبلىسىنداعى «اپ» شىعارماشىلىق بىرلەستىگىنىڭ جەتەكشىسى يۆان ماكاشوۆتى اڭگىمەگە تارتتىق. ول مۇنداي تۋريستىك جانە اۆتورلىق ءان بايقاۋى ورىنبور وبلىسىندا ءۇشىنشى رەت وتكىزىلگەنىن, سامارادا وتەتىن فەستيۆالدا وزدەرىنىڭ الاڭى بار ەكەنىن جەتكىزدى.
– فەستيۆالدى ۇيىمداستىرۋ ارقىلى 100 جاستىڭ بىرەۋىنىڭ قولىنا سىرانىڭ ورنىنا گيتارا ۇستاتساق, سونىڭ ءوزى پايدا. ماقسات – بارد اندەرىن ناسيحاتتاۋ ارقىلى جاستاردى سالاماتتى ومىرگە جاقىنداتۋ. مىنە, فەستيۆالدەن ۇتارىمىز وسى. بيىل اقتوبەدە ەكىنشى رەت وتكىزىلىپ وتىر. وتكەن جىلى «سازدى» سۋ قويماسىندا ۇيىمداستىرىلدى. ءتۋريزمدى دامىتۋدىڭ ءبىر تەتىگى وسىنداي ءان بايقاۋلارى ەكەنىن ايتقان ءجون, دەدى ول. ءان بايقاۋىنىڭ ۇيىمداستىرىلۋىنا ورسك قالاسىنىڭ «اپرەل» اۆتورلىق اندەر تەاتر-ستۋدياسىنىڭ جەتەكشىسى ليليا سولودوۆا دا ريزاشىلىعىن ءبىلدىردى. وسىنداعى قولونەر شەبەرلەرى كورمە-شەبەرحاناسىندا قولونەر تىگۋمەن اينالىساتىن الماتىلىق نۇرگۇل دالەلحان قارىنداسىمىزدى كەزدەستىردىك. نۇرگۇل وبلىستا وتكەن ءبىر كورمەگە قاتىسىپ, سوندا تانىسۋدىڭ ءساتى تۇسكەن. ول مۇنداي شارالاردان قالمايتىنىن ايتىپ, ءتۋريزمدى دامىتۋعا حالقىمىزدىڭ قولونەر بۇيىمدارىن ناسيحاتتاۋ العىشارت جاسايتىنىن جەتكىزدى. وسى فەستيۆالدىڭ ۇيىمداستىرىلۋىندا ەرلى-زايىپتى اقتوبەلىك اكچۋريندەردىڭ ەڭبەگى زور ەكەنىن اتاپ ءوتۋ ءجون.
فەستيۆال باعدارلاماسىندا جارقىراي كورىنگەن ونەرپازدارعا ارنايى باعالى سىيلىقتار مەن ديپلومدار تابىستالدى. «ساياحات» جاعاجايىندا گيتارامەن ءان شىرقاعانداردىڭ داۋىسى ءتۇننىڭ ءبىر ۋاعىنا دەيىن قالىقتادى.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.