جاسىراتىنى جوق, ەلىمىزدە كوروناۆيرۋس جۇقتىرعانداردىڭ سانى كۇن سايىن كوبەيىپ, ءتىپتى, وسى ىندەتتەن العاشقى ادام ءولىمى تىركەلسە دە ماسكا تاپشىلىعى ءالى كۇنگە شەشىلگەن جوق.
يندۋستريا جانە ينفراقۇرىلىمدىق دامۋ مينيسترلىگىنىڭ اقپارات قۇرالدارىنا بەرگەن سوڭعى مالىمەتتەرىنە قاراعاندا بارلىق ماسكالاردىڭ كۇندەلىكتى كولەمى 860 608 بىرلىكتى قۇرايدى, ونىڭ 272 مىڭىن فارماتسەۆتيكالىق كومپانيالار, 587 مىڭىن – تىگىن كومپانيالارى دايىنداۋدا. ودان بولەك, قويمالاردا – 807 120 دانا بەتپەردە بار كورىنەدى.
ىندەت ورشىگەن سايىن ماسكا تىگۋ ءوندىرىسى دە كەڭەيىپ كەلەدى. ماسكا تىگەتىن وتاندىق كاسىپورىندار بۇل ىسكە شاماسى جەتپەي جاتقاندىقتان جەرگىلىكتى اتقارۋشى ورگاندارمەن بىرلەسىپ بەتپەردەلەر وندىرىسىنە تاعى 70-تەن استام تىگىن كاسىپورىندارى تارتىلدى. وسىدان كەيىن «بۇل تاۋلىگىنە 1 ملن. داناعا دەيىن ماسكا وندىرۋگە مۇمكىندىك بەرەدى» دەگەن اقپاراتتار تاراتىلدى.
ماسكا تىگۋ ىسىنە ءتىپتى, قىلمىستىق-اتقارۋ جۇيەسى كوميتەتىنىڭ «ەڭبەك» رەسپۋبليكالىق مەملەكەتتىك كاسىپورنى, قاراپايىم تىلمەن ايتقاندا, تۇرمەدە جازاسىن وتەۋشىلەر دە كىرىسىپ كەتتى. قازىر قىلمىستىق-اتقارۋ جۇيەسى مەكەمەلەرىنىڭ وندىرىستىك الاڭدارىندا مىڭنان استام تىگىن ستانوكتارى جۇمىس ىستەيدى. ىشكى ىستەر ورگاندارىنىڭ قىزمەتكەرلەرى پايدالاناتىن ءبىر رەتتىك, سونىمەن بىرگە كوپ رەت قولدانىلاتىن قورعانىش ماسكالارىن تىگۋ جولعا قويىلىپ, تاۋلىگىنە 50 مىڭ ماسكا شىعارادى.
شىعىس قازاقستان وبلىستىق «حاليفا التاي» مەشىتىندە بەتپەردە تىگەتىن تىگىن تسەحى ىسكە قوسىلدى. تاعى ءبىر وڭىردە وسىعان دەيىن قاپشىق تىگىپ كەلگەن كاسىپورىن ەندى ماسكا تىگۋمەن اينالىسۋعا كوشتى. الەۋمەتتىك جەلىلەردە قانشاما جەكە ادامدار ماسكانى قولدان تىگىپ جاتقانىن جارىسا جازۋدا. ودان ەلوردادا جانە اقتوبە وبلىسىندا ماسكا جانە انتيسەپتيكتى زاڭسىز ساتقان 40 ادام اكىمشىلىك جاۋاپكەرشىلىككە تارتىلىپ, 4 ملن ماسكا مەن 13 مىڭ ليتر انتيسەپتيك تاركىلەندى. ولار دەنساۋلىق ساقتاۋ مەكەمەلەرىنە بەرىلدى. مىنە, ماسكا توڭىرەگىندە وسىنداي اقپاراتتاردان اياق الىپ جۇرە المايسىز.
بىراق, مەديتسينالىق بەتپەردە تابۋ ءالى قيىن. ءدارىحانالار «جوق» دەگەننەن باسقانى بىلمەيدى. بۇگىن تاڭەرتەڭ عانا ەلوردالىق جۋرناليستەر الەۋمەتتىك جەلىلەردە ء«دارىحانالاردان ماسكا جوق» دەگەن ماسەلەنى تاعى كوتەرىپ جاتىر. وڭتۇستىكتەگى ارىپتەستەرىمىزگە تەلەفون شالساق, ولاردا دا وسىنداي جاعداي. ماسكا جەتىسپەيدى. اكىمدەر ءدارىحانا كىرسە ماسكا تولىپ تۇرادى, كەتكەن سوڭ ون مينۋتتا تاۋسىلادى. جەرگىلىكتى حالىق اكىمدەردىڭ بۇل ارەكەتىن كوزبوياۋشىلىققا بالاۋدا.
سونىمەن بۇكىل ەل بولىپ جۇمىلىپ تىگىپ جاتقان ماسكالار قايدا؟ قايدا بارساڭىز دا, ەلىمىزدىڭ قاي قالا, قاي اۋىلىنا بارساڭىز دا, ماسكا پروبلەماسى الدىڭىزدان شىعادى. اقپان ايىنىڭ باسىندا دەنساۋلىق ساقتاۋ مينيسترلىگى وتاندىق بەتپەردە وندىرۋشىلەر مەن ديستريبيۋتەرلەردىڭ بارلىق قوردى قىتايعا ساتىپ جىبەرگەنىن ءمالىم ەتكەن بولاتىن. ودان بەرىدە باقىلاۋ كۇشەيدى, ءتارتىپ قاتاڭداتىلدى. ەندى قايدا كەتىپ جاتىر؟ كوروناۆيرۋس كۇن سايىن القىمنان الىپ, تىنىسىمىزدى تارىلتىپ كەلە جاتقاندا قاراپايىم بەتپەردەمەن قامتاماسىز ەتە الماۋ حالىقتى تىپتەن ءتۇڭىلدىرىپ جىبەرەدى ەمەس پە؟