«جۇمىسپەن قامتۋدىڭ جول كارتاسى» جەتىسۋدا قالاي جۇزەگە اسادى؟

قازىر «جۇمىسپەن قامتۋدىڭ جول كارتاسى» اياسىندا جەتىسۋدا جۇزەگە اساتىن جۇمىستار سارالانىپ, باعىتتار ايقىندالدى. ماسەلەن, شارا بارىسىندا 1 240 جوبا ىسكە اسىرىلىپ, ايماقتا 27,3 مىڭ جۇمىس ورنىن قۇرۋ كوزدەلگەن. جالپى, وبلىستا جۇمىسپەن قامتۋ ماسەلەسى جونىندە جۇمىس توبى قۇرىلادى, ونىڭ قۇرامىنا وڭىرلىك كاسىپكەرلەر پالاتاسى مەن ايماقتىق كاسىپتىك وداقتار بىرلەستىكتەرىنىڭ مۇشەلەرى كىرەدى. بۇل رەتتە بۇعان دەيىن الماتى قالاسىندا جۇمىس ىستەپ, قازىر كارانتينگە بايلانىستى وڭىرگە قايتىپ كەلگەن وبلىس تۇرعىندارىن جۇمىسپەن قامتۋعا ەرەكشە نازار اۋدارىلادى.

- قابىلدانعان شارالاردىڭ ناتيجەسىندە وبلىستا مىڭداعان جۇمىس ورنى قۇرىلادى, جۇمىسسىزدىق دەڭگەيى تومەندەيدى, جالپى وبلىستىڭ ينفراقۇرىلىمى جاقسارادى. بولىنگەن قارجىنىڭ ەسەبىنەن ءبىز جىلدار بويى شەشىلمەگەن كوپتەگەن پروبلەمانى شەشە الامىز. اۋدان, قالا اكىمدەرى قانشالىقتى ىسكەر ەكەنىن, حالىقتىڭ ماسەلەلەرىن قانشالىقتى بىلەتىنىن جانە ونى قالاي جەدەل شەشە الاتىنىن كورسەتۋى ءتيىس, - دەيدى وبلىس اكىمى اماندىق باتالوۆ.

سونداي-اق, «جۇمىسپەن قامتۋ جول كارتاسى» شەڭبەرىندە جۇزەگە اسىرىلاتىن جوبالار تىزىمىنە بىرنەشە نىسانداردىڭ قايتا جاڭعىرتىلۋى مەن جوندەۋ جۇمىستارى كىرىپ وتىر. ونىڭ ىشىندە الەۋمەتتىك-مادەني نىساندار بويىنشا قۇنى 31,8 ميلليارد تەڭگە بولاتىن 491 جوبا جاسالىپتى. ال تۇرعىن ءۇي-كوممۋنالدىق شارۋاشىلىعى بويىنشا 79 جوبا قاراستىرىلىپ, بۇل ماقساتقا 20 ميلليارد تەڭگە بولىنەدى. قوماقتى قارجى ايماقتىڭ  ينجەنەرلىك-كولىكتىك ينفراقۇرىلىىن جاقسارتۋعا دا باعىتتالادى. وسى ورايدا 34,2 ميلليارد تەڭگەگە 547 جوبا جاسالۋدا. ەلى مەكەندەردى اباتتاندىرۋ ءىسى دە ۇمىت قالمايدى. بۇعان 17 ميلليارد تەڭگە ءبولىنىپ, 116 جوبا جاسالىپتى.

بۇگىندە ايماقتا سۋارمالى القاپتاردىڭ كولەمىن ارتتىرۋ ءىسى كۇن تارتىبىندە تۇر. بۇل ماقسات قا دا قارجى بولىنگەن. ياعني, 73 مىڭ گەكتار سۋارمالى جەردى اينالىمعا قوسۋ مىندەتى تۇر. ونىڭ ىشىندە اقسۋ, پانفيلوۆ, ۇيعىر اۋداندارى مەن تالدىقورعان قالاسىنداعى سۋارۋ جەلىلەرىن جانە قاراتال, كوكسۋ, وسەك وزەندەرىندەگى بوگەتتەردى قايتا جاڭعىرتۋ جۇمىستارىنا 6,2 ميلليارد تەڭگە قاراستىرىلعان ەكەن.

- جالپى وبلىستا «جۇمىسپەن قامتۋدىڭ جول كارتاسى» 4 باعىت بويىنشا جۇزەگە اسىرىلادى. ءبىرىنشى باعىتتا الەۋمەتتىك نىسانداردىڭ كۇردەلى جوندەۋى مەن جاڭعىرتۋ جۇمىستارى جۇرگىزىلەدى. ماسەلەن, تەك ءبىلىم سالاسىنىڭ وزىندە 88 نىسان كۇردەلى جانە اعىمداعى جوندەۋدى قاجەت ەتەدى, ال 351 مەكتەپتىڭ سىرتتاعى دارەتحانالارىن جويۋ قاجەت. جالپى الەۋمەتتىك-مادەني سالادا 31,8 ميلليارد تەڭگەگە 491 جوبا جۇزەگە اسىرىلادى. ەكىنشىدەن, تۇرعىن ءۇي-كوممۋنالدىق شارۋاشىلىعى نىساندارىن كۇردەلى جوندەۋ جانە قايتا جاڭعىرتۋ. بۇل باعىت بويىنشا 79 نىسانعا 20 ميلليارد تەڭگە قاراستىرىلىپ, 5 مىڭعا جۋىق جۇمىس ورنى قۇرىلادى دەپ جوسپارلانعان. ءۇشىنشى باعىت – ينجەنەرلىك-كولىكتىك ينفراقۇرىلىمنىڭ كۇردەلى, ورتا جانە اعىمداعى جوندەۋى. مۇندا 547 نىسانعا 34 ميلليارد تەڭگە قاراستىرىلىپ, 8500 جۇمىس ورنى قۇرىلادى دەپ جوسپارلانعان. ءتورتىنشى باعىت – ەلدى مەكەندەردى اباتتاندىرۋ. بارلىعى 153 نىسانعا 17 ميلليارد تەڭگە قاراستىرىلادى. سونىمەن قاتار يرريگاتسيالىق جۇيەلەردى جاڭعىرتۋ باعىتىنداعى 7 جوبانى جۇزەگە اسىرۋعا 6,2 ميلليارد تەڭگە قاراستىرىلعان. 73,0 مىڭ گا سۋارمالى جەر اينالىمعا قوسىلادى, - دەيدى وبلىس اكىمىنىڭ ورىنباسارى باتىرجان بايجۇمانوۆ.

الماتى وبلىسى