بۇل تۋرالى شۇعىل تۇردە «وڭتۇستىك» تەلەارناسىندا مالىمدەمە جاساعان قالا اكىمى مۇرات ايتەنوۆ ايتىپ بەردى.
قالا باسشىسىنىڭ حابارلاۋىنشا, شىمكەنت قالاسىنىڭ ەكى تۇرعىنى قاۋىپتى ىندەتتى جۇقتىرعان. قازىرگى تاڭدا ناۋقاستار قالالىق ينفەكتسيالىق اۋرۋحانادا ەمدەلۋدە. دەنساۋلىقتارى بىرقالىپتى. ال, قاۋىپتى ىندەتتىڭ تارالىپ كەتپەۋى ءۇشىن ولار تۇرعان ەلدى مەكەن وقشاۋلانعان.
«ول ادامدارمەن بايلانىستا بولعان 26 ادام كارانتينگە جاتقىزىلىپ, تەست ساراپتاماسى الىندى. قازىرگى تاڭدا ناتيجەسى كۇتىلۋدە. وسى ەكى ادامنىڭ تۇرعىلىقتى جايى قالاعا قاراستى اباي اۋدانى, «تاۋەلسىزدىككە 20 جىل» تۇرعىنالابى بولعاندىقتان, وسى ەلدى مەكەن 14 كۇنگە كارانتينگە جابىلدى. سونىمەن قاتار, قالاداعى اۆتوۆوكزال مەن اۆتوبەكەتتەردىڭ جانە بالاباقشالاردىڭ جۇمىسى ۋاقىتشا توقتاتىلدى», - دەيدى مۇرات ايتەنوۆ.
قالا اكىمى سونىمەن قاتار ينفەكتسيانىڭ تارالۋىنا جول بەرمەۋ ءۇشىن, 28 ناۋرىزدا تۇنگى ساعات 00:00-دەن باستاپ شاھاردا ءبىراتار شەكتەۋ شارالارى ەنگىزىلەتىنىن جەتكىزدى. ايتۋىنشا بۇل شارالار قر پرەزيدەنتى جانىنداعى توتەنشە جاعداي رەجىمىن قامتاماسىز ەتۋ جونىندەگى مەملەكەتتىك كوميسسيانىڭ كەلىسىمىنە سايكەس جۇرگىزىلمەك.
سونىمەن قاتار شاھار باسشىسى قالا تۇرعىندارى مەن قوناقتارىنا توتەنشە جاعداي كەزىندە قولعا الىناتىن ەرەجەلەر مەن تالاپتاردى ءتورت باعىت بويىنشا تارقاتىپ ايتىپ ءوتتى.
«بىرىنشىدەن, شىمكەنت قالاسى اۋەجايىنىڭ, تەمىرجول ۆوكزالىنىڭ جۇمىستارى, اۆيا جانە تەمىرجول قاتىناستارى تولىق توقتاتىلادى. سونىمەن قاتار, اۆتوكولىك بازارلارى, ازىق-ت ۇلىك جارمەڭكەلەرى, ءموبيلدى تەلەفون ساتاتىن دۇكەندەردىڭ جۇمىسى توقتاتىلادى. بۇل رەتتە, قالا تۇرعىندارى مەن قوناقتارىنا, كوممەرتسيالىق جانە كوممەرتسيالىق ەمەس ۇيىمدارعا مەنشىك تۇرىنە قاراماستان بارلىق جايلاردا, تۇرعىن ۇيلەردە جانە اۋماقتاردا, ءدىني نىسانداردا جەكە, وتباسىلىق, ەسكە الۋ ءىس-شارالارىن جانە باسقا دا سالتاناتتار, جيىندار وتكىزۋگە قاتاڭ تىيىم سالىنادى. بارلىق ساۋدا نىساندارىنا ءوز تاۋارلارى مەن قىزمەتتەرىن ساتۋدا ونلاين رەجامگە كوشۋدى ۇسىنامىن.
ەكىنشىدەن, بۇعان دەيىن قىزمەتىنە شەكتەۋ ەنگىزىلگەن بارلىق ساۋدا جانە باسقا دا نىسانداردا, كەلۋشىلەر مەن ساتۋشىلار ءۇشىن مەديتسينالىق بەتپەردەلەردى كيۋدى تالاپ ەتەتىن سانيتارلىق جانە دەزينفەكتسيالىق شارالار كۇشەيتىلەدى. سونىمەن قاتار, مال بازارلارى تەك جەكسەنبى كۇنى ساعات 11:00-دەن 17:00-گە دەيىن جۇمىس ىستەيتىن بولادى.
ۇشىنشىدەن, قوعامدىق تاماقتانۋ ورىندارىنىڭ (كافە, مەيرامحانا جانە تاعى باسقالار) قىزمەتىنە كۇندىزگى ساعات 10:00-دەن 18.00-گە دەيىن شەكتەۋ ەنگىزىلەدى. ال, ساعات 18-دەن 22-گە دەيىن قوعامدىق تاماقتانۋ ورىندارىنىڭ جۇمىسىن «تاعامداردى ۇيگە جەتكىزۋ جانە وزىمەن الىپ كەتۋ» رەجىمىندە جۇزەگە اسىرىلادى. سونداي-اق, تاماقتانۋ ورىندارى كىرەبەرىستە كليەنتتەردىڭ تەمپەراتۋراسىن باقىلاۋعا جانە قولدارىن سانيتارلىق وڭدەۋگە مىندەتتى. كليەنتتەردى «كەلۋشىلەر اراسىندا ءبىر بوس ۇستەل قاشىقتىعى» فورماتى بويىنشا, زالدا 50 ادامنان اسپاي وتىرعىزۋعا مىندەتتى.
تورتىنشىدەن, شىمكەنت قالاسىنىڭ اۋماعىنا ساعات كەشكى 21.00-دەن تاڭعى ساعات 07:00-گە دەيىن اۆتوكولىكتەر مەن ازاماتتاردىڭ كىرۋىنە جانە شىعۋىنا تىيىم سالىنادى. بۇل شەكتەۋلەردىڭ ترانزيتتىك كولىكتەر مەن ازىق-ت ۇلىك تاسىمالدايتىن كولىكتەرگە قاتىسى جوق. بەسىنشىدەن, قالاداعى قوعامدىق كولىكتەردىڭ جۇمىسى تاڭعى ساعات 06:00-دەن 21:00-گە دەيىن شەكتەلەدى»,- دەدى تىكەلەي ەفيردە مۇرات دۇيسەنبەك ۇلى.