تۇرعىن ءۇي قۇرىلىس جيناق بانكى («بايتەرەك» حولدينگىنىڭ ەنشىلەس كومپانياسى) ۋاقىتشا قارجىلىق قيىندىققا ۇشىراعان كليەنتتەرىنە 2020 جىلعى 16 ناۋرىزدان كەيىن وتەلۋى ءتيىس تولەمدى 90 كۇنگە شەگەرۋگە مۇمكىندىك بەرەدى. شەگەرىلگەن تولەمگە نەگىزگى قارىز دا, نەسيە سىياقىسى دا كىرەدى. بۇل كليەنت جازعان ءوتىنىشتىڭ نەگىزىندە جۇزەگە اسىرىلادى. وتىنىشتە كەيىنگە شەگەرۋدىڭ نە سەبەپتى قاجەت بولعانىن كورسەتۋ كەرەك, بىراق بانك قوسىمشا راستاۋ قۇجاتتارىن تالاپ ەتپەيدى. تولەمدى كەيىنگە شەگەرۋ مۇمكىندىگى اۆتوماتتى تۇردە بەرىلەدى. بۇل شارا كوروناۆيرۋس تارالۋىنىڭ الدىن-الۋ ماقساتىندا ەلدە توتەنشە جاعدايدىڭ ەنگىزىلۋىنە جانە نۇر-سۇلتان مەن الماتى قالالارىندا كارانتين جاريالانعانىنا بايلانىستى ورىن العان. بۇل تۋرالى پرەمەر-ءمينيستردىڭ ءباسپاسوز قىزمەتى حابارلادى.
«تولەمدى شەگەرۋ تۋرالى ءوتىنىش 2020 جىلعى 15 ساۋىردەن باستاپ ينتەرنەت-بانكينگ ارقىلى قابىلدانادى. بارلىق ءوتىنىش ماقۇلدانادى. شەگەرۋدى 2020 جىلعى 16 ناۋرىزدان كەيىن وتەلۋى ءتيىس تولەمدەرگە قاتىستى قولدانۋعا بولادى. ونلاين-ءوتىنىش بەرۋ كەزىندە 2020 جىلدىڭ 16 ناۋرىزىنداعى جاعداي بويىنشا ۋاقتىلى وتەلمەگەن نەسيە تولەمى بولماۋى كەرەك», - دەپ ەسكەرتتى بانكتىڭ باسقارما ءتورايىمى لياززات يبراگيموۆا.
بانك باسشىسى بارلىق ازاماتتى توتەنشە جاعدايدى ەسكەرە وتىرىپ, وقشاۋلانۋ ەرەجەلەرىن ساقتاۋعا جانە بانك بولىمشەلەرىنە بارماۋعا شاقىردى.
تولەمدى كەيىنگە شەگەرۋ نەسيە مەرزىمىن 3 ايعا ۇزارتۋ ارقىلى جۇرەدى. بۇل كليەنتتەرگە اي سايىنعى تولەم كولەمىن قالىپتى دەڭگەيدە ۇستاپ قالۋعا كومەكتەسەدى.
بانك الدىن-الا جانە ارالىق زاەم الۋشىلاردى ولاردىڭ تۇرعىن ءۇي زاەمىنا ءوتۋ مەرزىمى شەگەرۋ ۋاقىتىنا ۇزارتىلاتىنىنا نازار اۋدارۋىن ءوتىندى.
2020 جىلعى 16 ناۋرىز بەن 16 ماۋسىم ارالىعىندا ۋاقتىلى وتەلمەگەن تولەمدەر بويىنشا ايىپپۇل جانە ءوسىمپۇل الىنبايدى. وسى ءۇش اي ىشىندە كليەنت نەگىزگى قارىز بەن سىياقىنى وزىنە ىڭعايلى ۋاقىت پەن كۇنى تولىق وتەسە, تولەمدەردى كەيىنگە شەگەرۋ تۋرالى ءوتىنىشتى بەرمەي-اق, قولايلى نەسيە وتەۋ كەستەسىن تاڭداپ, ايدىڭ كەز كەلگەن كۇنىندە قارىزدى وتەي الادى. مۇنى ۇيدەن شىقپاي-اق ونلاين جاساۋعا بولادى.
2020 جىلعى 30 ناۋرىزدان باستاپ كارانتين اياقتالعانشا قازاقستان اۋماعىنداعى بارلىق فيليالدا تۇرعىن ءۇي قۇرىلىس جيناق بانكى كليەنتتەرگە قىزمەت كورسەتۋدىڭ جاڭا نۇسقاسىنا وتەدى. بولىمشەلەردە نەسيە وتىنىشتەرىن قابىلداۋ, پوستكرەديت جانە پوستدەپوزيت وپەراتسيالاردى وتكىزۋ ۋاقىتشا توقتاتىلادى. بۇل كەزدە كليەنت بانككە كەلىپ, تەك ەكى وپەراتسيانى قولدانا الادى: دەپوزيتتى بولۋ/توقتاتۋ ارقىلى اقشاسىن الۋ, سونداي-اق زاەمنىڭ ءبىر بولىگىن جابۋ نەمەسە ونى تولىقتاي وتەۋ. بۇل وپەراتسيالاردى پايدالانۋ ءۇشىن بانك سايتىنداعى ونلاين-برونداۋ ارقىلى الدىن-الا جازىلۋ كەرەك. باسقا جاعدايلاردا بانك كوروناۆيرۋستى تاراتپاۋ ماقساتىندا كليەنتتەرگە قىزمەت كورسەتۋدەن باس تارتۋعا ءماجبۇر بولادى.
نوتاريۋستاردىڭ جۇمىسىنا تىيىم سالىنباسا, 27 ناۋرىز 18.00-گە دەيىن بەرىلگەن جانە ماقۇلدانعان بارلىق نەسيە ءوتىنىشى كليەنتتى تەلەفونمەن جەكە حابارلاسىپ شاقىرۋ ارقىلى بەرىلەتىن بولادى. قازىر بانك 1000 شاماسىنداعى نەسيە ءوتىنىشىن قاراستىرىپ جاتىر, 200 ءوتىنىش بەرىلۋ كەزەڭىندە.
بانك كارانتين اياقتالعانشا ساتىپ الۋ-ساتۋ مامىلەسىن جاساسپاۋعا شاقىرادى.
نەسيە وتەۋ جانە دەپوزيت تولىقتىرۋ ىڭعايلى بولۋى ءۇشىن قالاداعى كارانتين رەجيمىندە اشىق تۇرعان ورىنداردا ورنالاسقان تولەم تەرمينالدارى ىستەيدى. الايدا بانك ساۋدا-ويىن ورتالىعى مەن بازار ىزدەپ قالادا جۇرمەي, تولەمدى جسسب 24 ينتەرنەت-بانكينگى ارقىلى جۇرگىزۋگە شاقىرادى. مۇندا كەز كەلگەن بانكتىڭ تولەم كارتاسىن قولدانۋعا بولادى.
«قازاقستاننىڭ تۇرعىن ءۇي قۇرىلىس جيناق بانكى» اق — ەلىمىزدەگى تۇرعىن ءۇي قۇرىلىس جيناق جۇيەسىن جۇزەگە اسىراتىن بىردەن-ءبىر بانك. ۇيىم ەۋروپالىق قۇرىلىس جيناق كاسسالارى فەدەراتسياسىنا (ەقجكف) جانە حالىقارالىق تۇرعىن ءۇيدى قارجىلاندىرۋ وداعىنا كىرەدى. تۇرعىن ءۇي قۇرىلىس جيناق بانكىنىڭ جالعىز اكتسيونەرى – «بايتەرەك» ۇلتتىق باسقارۋشى حولدينگى» اق.