توتەنشە جاعداي كەزىندە ەڭبەك جانە حالىقتى الەۋمەتتىك قورعاۋ مينيسترلىگى مەديتسينالىق-الەۋمەتتىك ساراپتاما بولىمىنە بارماي, «مۇگەدەكتىكتى نەمەسە ەڭبەك ەتۋ قابىلەتىنەن ايرىلۋ دارەجەسىن بەلگىلەۋ جانە قاجەتتى الەۋمەتتىك قورعاۋ شارالارىن ايقىنداۋ» مەملەكەتتىك قىزمەتىن سىرتتاي فورماتتا الۋ تەتىگىن ازىرلەدى. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتى حابارلادى.
قىزمەت «ەلەكتروندىق ۇكىمەت» پورتالىندا «ەلەكتروندىق ءوتىنىش» سەرۆيسى ارقىلى بەرىلگەن ەلەكتروندىق ءوتىنىش نەگىزىندە ۇسىنىلادى.
مەملەكەتتىك قىزمەتتى الۋ ءۇشىن ازامات قاجەتتى قۇجاتتاردىڭ سكانەرلەنگەن نۇسقاسىمەن قوسا ءتيىستى ستاندارتقا سايكەس ءوتىنىشتى تولتىرۋى ءتيىس. وتىنىشكە ەلەكتروندىق تسيفرلىق قولتاڭبامەن قول قويۋ قاجەت.
بۇدان ءارى ءوتىنىش كورسەتىلەتىن قىزمەتتى الۋشىنىڭ تۇرعىلىقتى جەرى بويىنشا ەڭبەك, الەۋمەتتىك قورعاۋ جانە كوشى-قون كوميتەتىنىڭ اۋماقتىق دەپارتامەنتىنە جىبەرىلەدى.
مەديتسينالىق-الەۋمەتتىك ساراپتاما جۇرگىزىلگەننەن كەيىن ونىڭ ناتيجەلەرى كورسەتىلەتىن قىزمەتتى الۋشىعا sms-حابارلاما ارقىلى, «ەلەكتروندىق ۇكىمەت» پورتالىنداعى جەكە كابينەتكە نەمەسە «ەلەكتروندىق ءوتىنىش» سەرۆيسى ارقىلى كەلىپ تۇسكەن وتىنىشكە جاۋاپ تۇرىندە جىبەرىلەدى.
ايتا كەتۋ كەرەك, توتەنشە جاعداي كەزەڭىندە مەديتسينالىق-الەۋمەتتىك ساراپتاما بولىمىنە قايتا كۋالاندىرۋعا كەلمەگەن ازاماتتارعا وتكىزىپ العان كەزەڭىنە 2020 جىلعى 16 اقپاننان باستاپ مەرزىم بەلگىلەنەتىن بولادى.
ەستەرىڭىزگە سالا كەتەيىك, جىل سايىن «مۇگەدەكتىكتى جانە/نەمەسە ەڭبەك ەتۋ قابىلەتىنەن ايىرىلۋ دارەجەسىن بەلگىلەۋ جانە/نەمەسە قاجەتتى الەۋمەتتىك قورعاۋ شارالارىن ايقىنداۋ» مەملەكەتتىك قىزمەتى 250 مىڭنان استام ازاماتقا ونىڭ ىشىندە العاش رەت 57 مىڭعا جۋىق ازاماتقا كورسەتىلەدى, 2019 جىلى 252 مىڭ ادام قىزمەتتى الدى.
بۇگىنگى كۇنى قازاقستاندا مۇگەدەكتىگى بار 700 مىڭعا جۋىق ادام تۇرادى.