شاپ-شاعىن اقتاۋ قالاسىندا ورىن العان كەز كەلگەن وقيعا تۋرالى اڭگىمە ەل اراسىنا تەز تاراپ, جايىلىپ كەتەدى. جۋىردا قالاداعى تۇرعىن ۇيلەردىڭ بىرىندەگى پاتەردەن ءورت شىعىپ, ۇرەيلەنگەندىكتەن تەرەزە الدىنا شىعىپ تۇرعان ەكى بالانى جاس جىگىت قۇتقارىپ قالىپتى دەگەن اڭگىمە ەستىلگەن بولاتىن.
شاپ-شاعىن اقتاۋ قالاسىندا ورىن العان كەز كەلگەن وقيعا تۋرالى اڭگىمە ەل اراسىنا تەز تاراپ, جايىلىپ كەتەدى. جۋىردا قالاداعى تۇرعىن ۇيلەردىڭ بىرىندەگى پاتەردەن ءورت شىعىپ, ۇرەيلەنگەندىكتەن تەرەزە الدىنا شىعىپ تۇرعان ەكى بالانى جاس جىگىت قۇتقارىپ قالىپتى دەگەن اڭگىمە ەستىلگەن بولاتىن.
وقيعانىڭ انىق-قانىعىنا جاس جىگىتتى اناسىمەن بىرگە وبلىس اكىمى ا.ايدارباەۆ قابىلداپ, قۇرمەت كورسەتكەندە كوز جەتكىزدىك. 25 جاستاعى ەلدوس قۋان – «بوزاششى وپەرەيتينگ» مۇناي كومپانياسىندا جۇمىس ىستەيدى ەكەن. قيىن كەزدە كىمگە دە بولسا, قولۇشىن بەرۋدى ازاماتتىق پارىز سانايتىن ەلدوس سول الماعايىپ ءساتتى بىلاي دەپ ەسكە الدى.
– ۇيدە تەلەديدار قاراپ, دەمالىپ جاتقان ەدىم. سىرتتان ۇرەيلى ايقاي-شۋدى ەستىپ جۇگىرىپ شىقسام, ورتتەن قاشىپ 4 قاباتتاعى تەرەزەدەن سەكىرەيىن دەپ تۇرعان ۇل مەن قىزدى كوردىم. دەرەۋ كومەك كورسەتۋ قاجەت دەپ شەشتىم دە, جولدارىن ويلاستىرا باستادىم. بالكوننىڭ تەرەزەسىنەن كومەك بەرۋگە بولادى دەپ ويلاپ, سول جاققا كوتەرىلدىم. جان-دارمەن ەسىكتى بۇزىپ جاتقان كورشىلەردەن اياعىمنان ۇستاپ تۇرۋىن سۇراپ, بالالارعا قولىمدى سوزدىم. جىلاپ تۇرسا دا كەزەكپەن قولىمدى ۇستاپ, وتە سابىرلىلىق تانىتقان بالاقايلارعا ريزا بولدىم. شىنىمدى ايتسام, وسى ساتتە بويىمدا ۇرەي, قوبالجۋ ەمەس, كەرىسىنشە وزىمە دەگەن سەنىم جانە بالالاردى قۇتقارۋ كەرەك دەگەن وي عانا بولدى.
وبلىس اكىمىنەن كەنەتتەن بولعان ءورت جاعدايىندا ادام ءومىرىن قۇتقارۋ كەزىندەگى باتىلدىعى مەن ەرەن ەرلىگى ءۇشىن العىس حات العان ەلدوسقا ءوزى قىزمەت ەتەتىن كومپانيا مەن توتەنشە جاعدايلار دەپارتامەنتى دە سىي-سياپات كورسەتپەك. كومپانيا زارداپ شەككەن ءۇي ءۇشىن دە ماتەريالدىق كومەك كورسەتۋگە كەلىسىپ وتىر. ال كەرى شەگىنسە وت قۇشاعىندا قالۋ, ىلگەرى باسسا ءتورتىنشى قاباتتاعى تەرەزەدەن قۇلاۋ قاۋپىندە قالعان 5 جاسار ۇل مەن 7 جاسار قىزىنىڭ ءومىرىن ساقتاپ قالعان باتىر جىگىتكە ورتەنگەن ءۇي يەلەرىنىڭ ىقىلاسى تىپتەن ەرەكشە.
تامىز ايىنىڭ سوڭىنا ۇيلەنۋ تويىن بەلگىلەپ قويعان ەلدوس قۋاننىڭ ەرلىگىنە ءتانتى بولعان ەل ازاماتتىڭ اماندىعى مەن باقىتىنا تىلەكشى بولۋدا.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى.
––––––––––––––
سۋرەتتى تۇسىرگەن
حانىم قۋات.