قىزىلوردا وبلىسىنىڭ اكىمى قۋانىشبەك ىسقاقوۆ وبلىستاعى ءىرى ءدارىحانا يەلەرىمەن جانە جەڭىل ونەركاسىپ سالاسىنداعى كاسىپكەرلەرمەن كەزدەستى. كەزدەسۋدە مەديتسينالىق بەتپەردە مەن انتيسەپتيك تاپشىلىعىن بولدىرماۋ ماسەلەسى تالقىلاندى.
قازىر وبلىس ورتالىعىنداعى "Dalatex" تىگىن فابريكاسى №50 دارىحانامەن كەلىسىمشارتقا وتىرىپ, كۇنىنە 10 مىڭ دانادان اسا بەتپەردە تىگەدى. جەكەلەگەن كاسىپكەرلەر "اڭسار" ءدارىحانالار جەلىسىن وسى تاۋارمەن قامتاماسىز ەتىپ وتىر.
قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ وقىتۋشىلارى دەزينفەكتسيا ءۇشىن پايدالانىلاتىن سۇيىقتىق ازىرلەۋدە. تەك وڭىردەگى ەتيل ءسپيرتىنىڭ تاپشىلىعى تاۋاردى كوپتەپ شىعارۋعا كەدەرگى بولىپ وتىر. وسىعان بايلانىستى, قۋانىشبەك ىسقاقوۆ جاۋاپتى سالا جەتەكشىلەرىنە ءونىمدى 2 كۇن ىشىندە وزگە ايماقتاردان جەتكىزۋدى مىندەتتەدى. تەك ساتىلىمعا شىعارىلاتىن تاۋار حالىققا قولايلى باعادا ۇسىنىلۋى تيىستىگىن ەسكەرتتى.
– ماسكا مەن انتيسەپتيكتەردىڭ باعاسىن شارىقتاتىپ, پايدا كورۋ دەگەن بولماسىن. ىندەت, داعدارىس دەگەنىمىز – ۋاقىتشا, وتپەلى قۇبىلىس. ءبىزدىڭ الدىمىزدا تۇرعان ماقسات – مۇمكىندىكتى بارىنشا پايدالانۋ, وسى قيىندىقتان امان-ەسەن شىعىپ, ودان دا مىقتى بولۋ. وعان ءبىزدىڭ تولىق مۇمكىنشىلىگىمىز بار, - دەدى وبلىس اكىمى.
قىزىلوردا