وسىعان دەيىن سىزدەرگە ينتەرنەتتەگى پايدالى دەرەككوزدەردى, اشىق ۋنيۆەرسيتەتتەر مەن تەگىن كۋرستاردى ۇسىندىق. بىراق ونىڭ بارلىعىنا ينتەرنەت-تاريف كەرەك, ياعني مۇنىڭ بارلىعىن ونلاين رەجىمدە وقۋعا بولادى. سول اقپاراتتتاردى وقىعان كەزدە وزىڭىزدە ينتەرنەتتىڭ جوق ەكەنى ەسىڭىزگە ءتۇستى مە؟ ونىڭ دا شەشىمى بار. بۇل – ۇيدەگى وففلاين ءبىلىم.
ءيا, كارانتين كەزىندە ۇيدە جاتىپ ونلاين عانا ەمەس, وففلاين رەجىمدە دە ءبىلىم الۋعا بولادى. بۇۇ-نىڭ ءبىلىم, عىلىم جانە مادەنيەت جۇمىستارىمەن اينالىساتىن يۋنەسكو ۇيىمى الەمدەگى احۋالعا بايلانىستى پروبلەمانى ەسكەرىپ, قاشىقتان وقۋدىڭ بىرقاتار شەشىمىن ۇسىندى. سونىڭ ىشىندە ءبىزدى ەلەڭ ەتكىزگەنى – ينتەرنەتسىز دە ءبىلىم الۋعا مۇمكىندىك بەرەتىن پلاتفورمالار تىزبەگى بولدى. ماسەلەن, Ustad Mobile – سمارتفون, پلانشەت جانە كومپيۋتەر سەكىلدى كەز كەلگەن قۇرىلعىمەن ينتەرنەتسىز قوسىلۋعا بولاتىن سەنىمدى, اشىق كوزى بار ءموبيلدى وقۋ باعدارلاماسى. باستىسى تىركەلىپ الۋ كەرەك, سودان سوڭ وففلاين بولساڭىز دا ۆيكتورينالار, ماتىندەر, سۋرەتتەر, اۋديو جانە بەينەلەرمەن جۇمىس ىستەيتىن ينتەراكتيۆتى وقۋ مازمۇنىن ازىرلەپ الۋعا مۇمكىندىك بەرەدى.
كاليفورنيا شتاتىنىڭ پالو التو قالاسىندا ورنالاسقان الەۋمەتتىك كاسىپورىننىڭ Cell-Ed وففلاين پلاتفورماسى ءدال قازىرگى ۋاقىتتا ۇلكەن ءىس اتقارىپ وتىر دەۋگە بولادى. اتالعان پلاتفورمانى قولدانۋشىلار ينتەرنەتكە قوسىلماسا دا, ءتۇرلى قىمبات ابونەنتتىك ءتاريفى بولماسا دا ونداعى ساباقتاردى قالاعان ۋاقىتىندا, كەز كەلگەن جەردە تىڭداپ, تۇيگەنىن ماتىندىك حابارلاما ارقىلى جازىپ, ساباق جۇرگىزۋشىمەن تىلدەسە الادى. Cell-Ed «جۇمىس كۇشى», «ەرەسەكتەرگە ارنالعان ءبىلىم», «دەنساۋلىق ساقتاۋ», «حالىقارالىق دامۋ» اتتى 4 باعىتتا ءبىلىم بەرۋدى كوزدەيدى. العاشقى باعىتى بويىنشا ءار ءتۇرلى سالاداعى قىزمەتكەرلەر جۇمىس ىستەۋگە قاجەتتى قاراپايىم داعدىلارىن دامىتسا, «ەرەسەكتەرگە ارنالعان ءبىلىم» ارقىلى اعىلشىن ءتىلىن جەتىلدىرە الادى. وسى باعىتتاعى جۇمىستىڭ ناتيجەسى كومپانيا سايتىندا: ء«بىز قولدانۋشىلاردىڭ اعىلشىن ءتىلىن 10 پايىزدىق تۇسىنۋىمەن ساباق باستايتىنىن كوردىك, ال ەمتيحاننان كەيىن 80 پايىز نەمەسە ودان جوعارى دەڭگەيگە جەتەدى. Cell-ED – اقش-عى بارلىق اعىلشىن ءتىلىن ساۋاتتىلىققا ۇيرەتۋدىڭ التىن ستاندارتى», دەپ كورسەتىلگەن. پلاتفورمانىڭ ءبىلىم الۋشىلارى «دەنساۋلىق ساقتاۋ» ءبولىمى بويىنشا كادىمگى اعزاداعى قانتتىڭ مولشەرىن ولشەۋدى, العاشقى كومەك كورسەتۋدى ۇيرەنە السا, سوڭعى باعىت ىزدەنۋشىنى جاڭا ۇرپاققا تەڭ قۇقىقتى الەم قۇرۋىنا سەنىمدىك سىيلاپ, مۇمكىندىك بەرۋگە باۋليدى.
ال وففلاين رەجىمدە امبەباپ ءبىلىم بەرۋگە ارنالعان «Kolibri» قوسىمشاسى قولدانۋشىسىنا 10 ءتۇرلى تىلدە كىتاپحانا قورىن, وقۋ باعدارلامالارىن, ساباقتار مەن باعالاۋ سياقتى رەسمي ءبىلىم بەرۋ ماتەريالدارىن جانە كىتاپتار, ويىندار, مودەلدەۋ سياقتى زەرتتەۋ ماتەريالدارىن ۇسىنادى. «Kolibri» قوسىمشاسىن ينتەرنەتى بار جەردە جۇكتەپ الساڭىز بولعانى, قالعان ۋاقىتتا كەز كەلگەن جەردە وففلاين قولجەتىمدى.
بەيرەسمي دەرەكتەرگە سۇيەنسەك, الەمدە 4 ملرد-تان اسا ادام ينتەرنەتكە قول جەتكىزە الماي وتىر. دەمەك, ادامزاتتىڭ جارتىسىنان كوبى تسيفرلى رەۆوليۋتسيادان ارتتا قالعان. سوندىقتان بۇل پلاتفورمالار مەن قوسىمشالار توتەنشە جاعداي جاريالانعان ەلدەر نەمەسە كارانتينگە جابىلعان قالالاردىڭ حالقىنا, اسىرەسە ينتەرنەت ساتىپ الۋعا مۇمكىندىگى بولماي جۇمىسسىز, جالاقىسىز قالعان جاندارعا ۇلكەن كومەك بولماق.
P.S.: «قازاق – قاشاندا جاراتقاننان جاقسىلىق دامەتەتىن, ءتىپتى قاۋىپ-قاتەردىڭ دە قايىرىن كۇتەتىن حالىق. بۇگىنگى ۇرپاق جاڭا قاتەر كەزىندە قورعانۋمەن قاتار ۋاقىتىن ۇزدىكسىز ءبىلىم الۋدى جەمىستى جالعاستىرۋعا, ءوزىن جەتىلدىرۋگە ارنايتىنىنا سەنەمىز.