جاقىندا قىزىلوردادا ءبىلىم سالاسىنىڭ بۇگىنى جانە الدا تۇرعان مىندەتتەردى سارالاعان جيىن ءوتتى. وندا ءبىلىم سالاسىندا ساپانى قامتاماسىز ەتۋ دەپارتامەنتىنىڭ باسشىسى عاليا داۋلەتوۆا حابارلاما جاسادى.
وسى كۇنى ايماقتاعى 672 مەكتەپكە دەيىنگى ءبىلىم بەرۋ ۇيىمىنىڭ 72% جەكەمەنشىك بالاباقشالار. وڭىردە 3 پەن 6 جاس ارالىعىنداعى بالالاردىڭ مەكتەپكە دەيىنگى ءبىلىم بەرۋمەن قامتىلۋ دەڭگەيى 100% قۇرادى. ال جالپى ورتا ءبىلىم بەرەتىن 293 مەكتەپتە 161 469 وقۋشى ءبىلىم الىپ جاتىر.
حابارلاماشى قازىرگى نەگىزگى ماسەلەنىڭ ءبىرى رەتىندە وبلىستاعى ءبىلىم بەرۋ ۇيىمدارىنىڭ ورىس سىنىپتارىنداعى ماماندار جەتىسپەۋشىلىگىن ايتتى.
جىل سايىن قالاداعى ءبىلىم بەرۋ ۇيىمدارىندا 20-عا جۋىق ورىس تىلىندە ءبىلىم بەرەتىن باستاۋىش سىنىپ پەداگوگتارى جەتىسپەيدى ەكەن.
– ورىس سىنىپتارىندا فيزيكا, حيميا, بيولوگيا, ماتەماتيكا پاندەرىنەن زەينەتكە شىققان مۇعالىمدەر ساباق بەرىپ ءجۇر. اسىرەسە, اۋىل مەكتەپتەرىندە ورىس ءتىلى ءپانى ماماندارىنىڭ جەتىسپەۋشىلىگى الاڭداتادى, – دەدى ول.
وسىعان بايلانىستى وبلىستىق ءبىلىم باسقارماسى مەن قورقىت اتا اتىنداعى قمۋ ورىس تىلىندە ساباق بەرەتىن مۇعالىمدەردى دايىنداۋ ماسەلەسىن بىرلەسە قولعا الىپ وتىر. وسى ماقساتتا 2020–2021 وقۋ جىلىنا پەداگوگيكالىق ماماندىقتار بويىنشا 25 رەكتور گرانتىن ءبولۋ قاراستىرىلعان. سونىمەن قاتار, كوللەدجدەردە ورىس تىلىندە باستاۋىش سىنىپ پەداگوگتارىن دايارلاۋ ءۇشىن جەرگىلىكتى بيۋدجەتتەن مەملەكەتتىك تاپسىرىس بولۋگە شەشىم قابىلدانعان.