قىزىلوردا وبلىسىنىڭ اكىمى قۋانىشبەك ىسقاقوۆ بۇگىن «باتىس ەۋروپا - باتىس قىتاي» كۇرە جولى بويىندا ورنالاسقان قىزمەت كورسەتۋ كەشەندەرىندەگى توتەنشە جاعداي كەزىندەگى قاۋىپسىزدىك شارالارىمەن تانىستى. بۇل تۋرالى وبلىس اكىمىنىڭ ءباسپاسوز قىزمەتى حابارلايدى.
العاشقى نىسان سىرداريا اۋدانىنداعى «نۇرلى-جول» كەشەنى بولدى. جالپى اۋماعى 2 گەكتار اۋماقتا كولىك جوندەۋ جانە جۋ ورىندارى, قوناق ءۇي, كافە, 40 ورىندىق مەيمانحانا جانە كولىك تۇراعى بار. كەشەندە سانيتارلىق-دەزينفەكتسيالىق جانە زالالسىزداندىرۋ جۇمىستارى جۇرگىزىلىپ تۇرادى. ءبىر مەزەتتە تەك 50 ادامعا عانا قىزمەت كورسەتۋى ءتيىس. بۇدان ءارى ايماق باسشىسى وسى اۋدانداعى «كەرۋەن» كەشەنىنە ايالدادى. مۇندا دا ۆيرۋستىڭ تارالۋىن بولدىرماۋ ماقساتىندا ۋاقىتشا شەكتەۋلەر ەنگىزىلگەن.
سونداي-اق, «قىزىل-وردا» قىزمەت كورسەتۋ كەشەنىندە دە تازالىق, زالالسىزداندىرۋ جۇمىستارى كۇشەيتىلگەن. جاۋاپتى مەكەمە تاراپىنان كۇن سايىن تەكسەرۋ جۇرگىزىلەدى. ايماق باسشىسى اۋدان اكىمى رۋسلان رۇستەموۆ پەن نىسان يەلەرىنە توتەنشە جاعداي تالاپتارىن ساقتاۋدى تاپسىردى.