“كوڭىلىمدە ءبىر كۇدىك بار”

بۇل حاتتى رەداكتسياعا قازاقستان كومپوزي­تورلار وداعى باسقارماسىنىڭ ءتورايىمى بالنۇر قىدىربەك الىپ كەلدى. ءومىر بويىندا تەك ءبىر گازەتتە – “سوتسياليستىك قازاقستاندا” جۇمىس ىستەپ وتكەن, كەزىندە ءبىزدىڭ باسىلىمدى باسقارعان كورنەكتى قالامگەر بالعابەك قىدىربەك ۇلىنىڭ نەمەرە اعاسى يسا تولەپ ۇلىنىڭ سوڭعى جازعان حاتى بۇل. قىدىربەكتىڭ اعاسى تولەپتىڭ ۇلى يسا مەن بالعابەك اعامىزدىڭ ەنشىسى بولىنبەگەن ەكەن. حات سوعىس باستالارعا ەكى اپتا قالعاندا عانا جازىلعان. برەست قامالىنداعى جاۋىنگەردىڭ الاڭ كوڭىلىن “دەگەنمەن كوڭىلىمدە ءبىر كۇدىك بار” دەگەن ءسوز دە اڭعارتا الاتىنداي. حات يەسىنىڭ ءسوز ساپتاۋى, ولەڭىن كادىمگى اقىندارداي “كاۋسەردەي-اق جۇتايىن, شولدەپ كەلدىم, اكەلشى ىرتىك-ىرتىك شالابىڭدى” دەگەن تۇيىنمەن ءبىتىرۋى بالعابەك اعامىزدىڭ اينالاسى دا شىعارماشىلىققا بەيىم بولعانىن بىلدىرەدى. وسىدان جەتپىس جىلداي بۇرىن جازىلعان حاتقا نازار سالايىق. ارداقتى نۇريلا, جا­نىم بالعا, اياۋلى نازگۇل! ءسالاماتسىڭدار ما؟! اۋىل امان-ەسەن بە؟ ەگىن ءبىتىمى قالاي؟ جىلقىشىباي ۇلىڭ­نىڭ باۋى بەرىك بولسىن. ءابىل­قاسىم ۇستا جاڭا ءدۇ­كەنىن اش­تى ما, تار­لان­كوك­تى تاعا­لاۋدى ۇمىتپاڭدار. مىنە, قامال ىشىنە دە جاز كەلدى. ەندى امانشىلىق بول­سا, ارتىمداعى ەكى جا­رىم جىل سياقتى بۇل بەس اي دا تەز وتە شىعار دەپ وتىر­مىن. نەگە ەكەنىن بىلمەي­مىن, دە­گەنمەن كوڭىلىمدە ءبىر كۇدىك بار. ساعىنىشتىڭ بەلگىسى بولار, قاراساز, قىر­قالار ءجيى-ءجيى كوزىمە ەلەستەيتىن بولىپ ءجۇر. بۇگىن كوپكە دەي­ىن ۇيقىم كەلمەي, بەيسەباي اتامنىڭ ايداۋدا شىعارعان ولەڭىن ەسىمە تۇسىرمەك بولىپ, ءبىراز مازا­سىز­دانىپ جاتتىم. بىراق ءتۇس­پەي-اق قويدى. ونىڭ ورنىنا ءوزىم ولەڭ شىعاردىم. “بۇل دا اقىن بولايىن دەپ ءجۇر مە؟ ” – دەپ كۇلمەڭدەر. ساعىنام, بارعىم كەلەدى  تۋعان ەلگە, تاپپادىم ونداي جىلۋ ەشبىر  جەردە. جاستانعان تۋعان ەلدىڭ توپىراعىن كىسىدە ارمان بار ما, تۇسكەن كورگە. انگە قوسىپ سويلەيتىن ءسوزدىڭ ءسولىن, ءوز ەلىم – مول داستارحان, شالقار كولىم, اراڭدا تەل تارىداي بۇلاڭ وسكەن, ورتاڭا قاشان جەتەم, تۋعان ەلىم. قايرايتىن تاۋ-تاسىڭا قانجارىمدى, سىنايىن وسى جولى تالابىمدى, كاۋسەردەي-اق جۇتايىن, شولدەپ كەلدىم, اكەلشى ىرتىك-ىرتىك شالابىڭدى. ادەتتەگىدەي, كەلەسى جەكسەنبىدە تاعى حات جازام. ال اياۋلى جان­دارىم, قوش, امان بولىڭدار. تۋ­عان-تۋىسقاندارعا, دوس-جاراندارعا, كورشى-قولاڭعا, بارىنە مەنەن دۇعاي سالەم ايتىڭدار. يسا تولەپوۆ.  8 يۋن 1941 جىل. برەست قامالى. (1939 جىلى تۇسىرىلگەن مىنا سۋرەتتە يسا تولەپوۆ وڭ جاقتا تۇر).