ەلىمىزدە جاريالانعان توتەنشە جاعدايعا وراي قىزىلوردادا قۇرىلعان قالالىق جەدەل شتاب تاۋلىك بويى جۇمىس ىستەيدى. بۇل تۋرالى قالا اكىمىنىڭ ءباسپاسوز قىزمەتى حابارلادى.
وسى شتاب وكىلدەرى كاسىپ يەلەرىن جيناپ, تۇسىندىرمە جۇمىستارىن جۇرگىزدى. وندا وبلىس ورتالىعىنداعى حالىق كوپ جينالاتىن ورىندار, ساۋدا ۇيلەرى مەن بازارلار, جولاۋشىلار تاسىمالى, كينوتەاترلار, مەيرامحانالار, كومپيۋتەرلىك ويىن كلۋبتارى ۇنەمى باقىلاۋدا بولاتىنى ايتىلدى.
- قازىر ءبىزدىڭ وڭىردە ەپيدەميولوگيالىق احۋال تۇراقتى, كوروناۆيرۋس جۇقتىرۋ دەرەكتەرى تىركەلگەن جوق. بىراق, ارقانى كەڭگە سالۋعا بولمايدى. ساقتىق شارالارىن بارىنشا كۇشەيتكەنىمىز ءجون. قالا تۇرعىندارىنا اقپاراتتىق قولداۋ كورسەتۋ ماقساتىندا رەسپۋبليكالىق بىرىڭعاي شۇعىل جەلىدەن بولەك «سەنىم تەلەفونى» جۇمىس ىستەپ تۇر, – قالا اكىمىنىڭ ورىنباسارى بەكتاس نۇريدينوۆ.
جالپى قىزىلوردا قالاسىندا 12 بازار, 60-تان اسا ساۋدا ءۇيى, 180-گە جۋىق قوعامدىق تاماقتانۋ ورنى, 1800-دەن اسا دۇكەن حالىققا قىزمەت كورسەتۋدە.
كاسىپكەرلەرگە وسى نىسانداردىڭ توتەنشە جاعداي تالاپتارى شەڭبەرىندە جۇمىس ىستەۋى قاتاڭ قاداعالاتىنى ەسكەرتىلدى.