وڭايعا تۇسپەگەن وراسان ارەكەتتەردىڭ ارقاسىندا قىتايدا كوروناۆيرۋستىڭ تارالۋى اۋىزدىقتالىپ, قاتاڭ باقىلاۋ – ارالىق ناتيجەلەرگە قول جەتكىزدى.
قىتاي حالىق رەسپۋبليكاسىنىڭ الماتىداعى باس كونسۋلدىعى 15 ناۋرىزداعى ساعات 24.00 كەزىندەگى جاعدايعا سايكەس, قىتاي ەلىندە كوروناۆيرۋس جۇقتىرۋ جاڭادان 16 ادام عانا راستالعانىن مالىمدەدى. ولاردىڭ 4-ەۋى ۋحاندا بولسا, 12 ادام باسقا مەملەكەتتەردەن كەلگەن.
كورشىلەرىمىز بەسىنشى كۇن قاتارىنان ىندەت وشاعى بولعان ۋحان قالاسىندا كوروناۆيرۋس ءبىردى-ەكىلى ادامنان عانا تابىلىپ جاتقانىنا قۋانىپ وتىر. ەپيدەميا قۇتىرىنىپ تۇرعان كەزدە كۇن سايىن 3 مىڭنان استام ۆيرۋس جۇقتىراتىن بولسا, سوڭعى كۇندەرى جيىرماعا دا جەتپەيتىن ادامدا عانا كورونوۆيرۋس بار ەكەنى انىقتالىپ وتىر.
ءبىر ايدىڭ ىشىندە ىندەت 98 پايىزعا جەڭىلدى.
قازىر قىتايدىڭ قۇرلىقتىق بولىگىندە 9898 وقيعا تىركەلگەن. ونىڭ ىشىندە 9605 ادام - حۋبەي پروۆينتسياسىنىڭ تۇرعىنى.
قازىر كۇن سايىن 800-900 ناۋقاس ساۋىعىپ, ۇيلەرىنە ورالىپ جاتىر. كۇن سايىن حۋبەي پروۆينتسياسىنان تىسقارى جەردە جۇقتىرۋ وقيعالارى ازايىپ كەلەدى. جاڭا جۇقتىرۋ وقيعالارى تىركەلگەن جاعدايدا دا – ولار باسقا مەملەكەتتەردەن كەلگەندەر.
كوپتەگەن قالا مەن پروۆينتسيالاردا كوروناۆيرۋستىڭ انىقتالۋى نولدىك دەڭگەيگە جەتتى. جوعارىدا اتاپ وتىلگەندەي, ىندەتتەن ساۋىققان ادامداردىڭ سانى ايتارلىقتاي ءوسىپ كەلەدى.