بۇل تۋرالى قوعامدىق دەنساۋلىق ساقتاۋ باسقارماسىنىڭ باسشىسى ساۋلە قيسىقوۆا بريفينگ بارىسىندا ايتتى.
«ىندەت انىقتالعان ادام ميلان-نۇر-سۇلتان-ماسكەۋ رەيسىنەن تۇسىرىلگەن. ول بىردەن اۋرۋحاناعا جەتكىزىلدى. قازىر ول ستاتسيوناردا جاتىر. ەمدىك شارالار قابىلداۋدا. دەنساۋلىعى قالىپتى. بۇل رەيستە 90 ادام بولعان. ونىمەن بايلانىستا بولعان ادامدار انىقتالىپ جاتىر», – دەدى س.قيسىقوۆا.
ونىڭ ايتۋىنشا, اۋرۋدىڭ باستى بەلگىلەرى - جوعارى تەمپەراتۋرا مەن جوتەل بايقالسا, ۇيدە وتىرعان ءجون.
«مۇنداي بەلگىلەرمەن مەديتسينالىق مەكەمەلەرگە بارماۋلارىڭىزدى سۇرايمىز. ونىڭ ورنىنا كولل-ورتالىققا نەمەسە جەدەل جاردەم قىزمەتىنە حابارلاسىپ, كەڭەس الىڭىز. كورەيادا جاڭا ينفەكتسيانى جۇقتىرعان ناۋقاستار ەمحاناعا كەلىپ, تۇتاس كلينيكالاردى قىزمەتكەرلەرىمەن, كەزەك كۇتكەن ادامدارمەن بىرگە كارانتينگە جاپقان وقيعالار بولدى. بۇل تاجىريبە ءبىزدىڭ دە مەديتسينالىق ۇيىمداردا قولدانىلادى. سوندىقتان, ءبىزدىڭ كەڭەستەردى قاتاڭ ۇستانۋدى سۇرايمىز», - دەدى س. قيسىقوۆا.