تۇركىستان وبلىسى كەلەس اۋدانى اباي اۋىلىنىڭ تۇرعىنى مالىك ايتىمبەتوۆ 70 جاشىك بال اراسىن ۇستايتىن ومارتاشى رەتىندە دە اۋىلعا اتى ءمالىم ازامات. بۇل ىسپەن اينالىسقانىنا 7 جىل بولعان. بۇگىندە وتاعاسى 9 ۇل-قىزدىڭ اكەسى.
وسى ۇل-قىزدارىنىڭ نەسىبەسى وتاعاسىنىڭ كاسىبىن دامىتا, تابىسىن ارتتىرا تۇسۋگە سەپتىگىن تيگىزىپ وتىر. اتاۋلى الەۋمەتتىك كومەك العان وتباسى ومارتاشىلىققا قاجەتتى قۇرال-سايمانداردى تۇگەندەگەن. ياعني ۇكىمەتتەن 9 بالاعا بەرىلگەن 1 ملن 498 مىڭ تەڭگە اتاۋلى الەۋمەتتىك كومەكتى وتباسى ويلاسا كەلە بال جينايتىن قۇرالدار, ومارتا جاشىكتەرىن جانە ونى كوشىرۋگە تىركەمە ساتىپ الۋعا جۇمساپتى.
ء«بىز اۋىلداعى ۇلكەن وتباسى سانالامىز. اللانىڭ بەرگەن 9 ۇل-قىزى بار. سولاردىڭ نەسىبەسىنە بىلتىر اتاۋلى الەۋمەتتىك كومەك تاعايىندالدى. قۇجاتتى دەر كەزىندە دايىنداپ, جەرگىلىكتى اكىمدىككە وتكىزدىك. كوپ ۇزاماي قوماقتى قارجىعا قول جەتكىزىپ, ءوزىمنىڭ شارۋاشىلىعىما قاجەتتى بار كەرەك-جاراقتى ساتىپ الدىم. بۇگىندە سول ارقىلى بالدىڭ 10 ءتۇرىن ءوندىرىپ جاتىرمىن» دەيدى مالىك ايتىمبەتوۆ.
ال «التىن القا» يەگەرى ناعيما ايتىمبەتوۆا جۋىردا بالا كۇتىمىنەن بوساپ, ءبىر مەكەمەگە تازالاۋشى بولىپ ورنالاسىپتى. ايلىق جالاقىسى – 40 مىڭ تەڭگە. ومارتاشىلىقتى كاسىپ ەتكەن وتباسىنىڭ تۇڭعىشى نۇر-سۇلتان قالاسىنداعى ءبىر جوعارى وقۋ ورنىندا وقيدى. كوپ بالالى وتباسى ەندى ومارتاشىلىقتى كەڭەيتىپ, بال اراسى جاشىكتەرى ورنالاسقان تىركەمەلەردى تاسيتىن جۇك كولىگىن ساتىپ الۋدى ماقسات ەتىپ وتىر.
تۇركىستان وبلىسى