تۇركىستان وبلىسىنىڭ 138 وقۋشىسى حالىقارالىق جانە رەسپۋبليكالىق بايقاۋلاردىڭ جۇلدەگەرلەرى اتانعان. ۇبت قورىتىندىسى بويىنشا ەلىمىزدە ەڭ جوعارى 140 بالدى يەلەنگەن دە وسى ءوڭىردىڭ تۇلەگى. وتكەن جىلدىڭ قورىتىندىسىمەن 3 پەداگوگ رەسپۋبليكادا «جىلدىڭ ۇزدىك پەداگوگى» اتانسا, «WorldSkills-2019» بىرىنشىلىگىندە 17 كوللەدج ستۋدەنتى ءبىرىنشى ورىندى يەلەنگەن.
وڭىرلىك كوممۋنيكاتسيالار قىزمەتىندە وتكەن بريفينگتە وبلىستىق ادامي الەۋەتتى دامىتۋ باسقارماسىنىڭ باسشىسى راحىمبەك جولاەۆ جوعارىدا اتالعان جەتىستىكتەردى بيىل ەسەلەندىرۋ باستى مىندەتتەردىڭ ءبىرى ەكەنىن جەتكىزدى. وڭىردەگى 906 مەكتەپتىڭ 6-ى جەكەمەنشىك يەلىگىندە. بيىل قوسىمشا 12 جاڭا مەكتەپ پايدالانۋعا بەرىلەدى. ءۇش اۋىسىمدا ءبىلىم بەرەتىن 5 مەكتەپ بار. «بيىل 7 اپاتتى مەكتەپتىڭ ورنىنا جاڭاسىن سالۋ ماقساتىندا 3 مەكتەپتىڭ قۇرىلىسىنا قارجى ءبولىنىپ وتىر. رەسپۋبليكا بويىنشا دارەتحاناسى دالادا ورناتىلعان 2352 مەكتەپ بار بولسا, سونىڭ 60 پايىزى تۇركىستان وبلىسىندا ورنالاسقان. 2020 جىلدىڭ 1 قىركۇيەگىنە دەيىن بارلىق مەكتەپتەردەگى ىشكى دارەتحانالار قالپىنا كەلتىرىلىپ, سىرتقى دارەتحانالار سانيتارلىق تالاپتارعا سايكەستەندىرىلەدى. مەكتەپتەرگە تۇگەل قورشاۋلار قويىلادى», دەدى باسقارما باسشىسى.
وقۋشىلاردىڭ قاۋىپسىزدىگىن قامتاماسىز ەتۋ ماقساتىندا وبلىستاعى 900 مەكتەپتىڭ 98 پايىزىندا بەينەباقىلاۋ جۇيەسى ورناتىلعان. جىل سوڭىنا دەيىن مەكتەپتەر بەينەباقىلاۋ جۇيەسىمەن 100% قامتىلماق. سونداي-اق وقۋشىلاردى قوسىمشا بىلىممەن قامتۋدى 70 پايىزعا جەتكىزۋ ماقساتىندا 11 اۋداندا «وقۋشىلار ءۇيى» اشىلۋدا.
تۇركىستان وبلىسى