ورتالىق كوممۋنيكاتسيالار قىزمەتىندە IV «تۇمار» ۇلتتىق تەلەۆيزيالىق بايگەسى نومينانتتارىنىڭ شورت-پاراعى جاريالاندى. قۇرامىنا مەديا يندۋسترياسىنىڭ وتاندىق جانە حالىقارالىق وكىلدەرى ەنگەن قازىلار القاسى ءوز كاتەگورياسى بويىنشا ۇزدىك اتاعىنا قىرىق ۇمىتكەردى ىرىكتەپ الدى. 13 ناۋرىز كازمەديا ورتالىعىنىڭ كونگرەسس-حوللىندا ەستەلىك ستاتۋەتكا مەن ءبىر ميلليون تەڭگە كولەمىندەگى اقشالاي سىيلىق يەگەرلەرىنىڭ ەسىمدەرى بەلگىلى بولادى.
«تۇمار» ۇلتتىق تەلەۆيزيالىق سىيلىعى 2017 جىلى اقپارات جانە قوعامدىق دامۋ مينيسترلىگىنىڭ (قر اقدم) باستاماسى بويىنشا تاعايىندالعان. بىرنەشە جىلدىڭ ىشىندە وتاندىق تەلەۆيزيالىق جۋرناليستيكانىڭ 36 مامانى ەكسكليۋزيۆ مۇسىنشەنىڭ يەگەرى بولدى. جەڭىمپازدار قاتارىنان سالانىڭ مايتالماندارىن دا, جاس, بولاشاعىنان ءۇمىت كۇتتىرەتىن جانە كاسىبيلىگى اسا جوعارى ادامداردى دا كەزدەستىرۋگە بولادى.
اقپارات كوميتەتىنىڭ توراعاسى ءلاززات سۇيىندىكتىڭ ايتۋىنشا, «تۇمار» ۇلتتىق سىيلىعى جوعارى كاسىبي ستاندارتتاردىڭ جارقىن سيپاتىنا اينالدى, سونىمەن قاتار, تەلەۆيزيا قىزمەتكەرلەرىنىڭ شىعارماشىلىق ىزدەنىستەرىنە وڭ موتيۆاتسيا سىيلاپ, سالانىڭ دامۋىنا جانە ءوز ءىسىنىڭ شەبەرلەرى اراسىندا ادال باسەكەلەستىكتىڭ وسۋىنە سەرپىن بەردى. بيىل جوبادا 10 نوميناتسيا بويىنشا 211 جۇمىس قابىلداندى. وتىنىمدەردىڭ كوپ بولىگى «ۇزدىك الەۋمەتتىك جوبا» جانە «ۇزدىك دەرەكتى فيلم» نوميناتسيالارى بويىنشا كەلىپ ءتۇستى, ال «ۇزدىك تەلەۆيزيالىق سەريال» نوميناتسياسىندا قازاقستاننىڭ ءتورت بىردەي جەتەكشى تەلەارناسىنىڭ تانىمال سەريالدارى ستاتۋەتكاعا تالاسپاق».
«جىل سايىن جۇمىستاردىڭ ساپاسى جاقسارىپ كەلەدى, مىسالى, تەلەسەريالدار تەك تۆ-ەفيرگە عانا ەمەس, سونىمەن قاتار الەۋمەتتىك جەلىلەرگە دە باعىتتالا باستادى. وزەكتى تاقىرىپتار كوبىرەك قوزعالىپ, جاڭا فورماتتار ەنگىزىلۋدە», دەپ ل.سۇيىندىك اتاپ ءوتتى.
جوبا جۇزەگە اسىپ كەلە جاتقان جىلدار ىشىندە 898 قاتىسۋشى سىيلىققا يە بولۋ ءۇشىن نيەت تانىتتى, ولاردىڭ 138-ءى شورت-پاراقتارعا ەنگىزىلىپ, باس جۇلدە - بەلگىلى زەرگەر-سۋرەتشى قامبار ەسمۇحانوۆتىڭ جەزدەن جانە اينەكتەن جاسالعان ەكسكليۋزيۆتى «تۇمار» مۇسىنشەسى ءۇشىن تالاستى. مۇسىنشەدە سەنىم بويىنشا يەسىن جاماندىقتان جانە كوز-سۇقتان قورعايتىن تۇركى تاليسمانى - تۇمار بەينەلەنگەن.
ءتورتىنشى «تۇمار» بايگەسى ەرەكشە بولماق – ۇلتتىق بايگەنىڭ قازىلار القاسىنىڭ مۇشەسى, تانىمال تەلەجۋرناليست ءلايلا سۇلتانقىزى وسىلاي پىكىرىمەن ءبولىستى.
مەديا-مەنەدجەردىڭ ايتۋىنشا, ءىس-شارانى ۇيىمداستىرۋ كوميتەتى وتكەن جىلدارداعى قازىلار القاسى مەن كاسىبي قوعامداستىقتىڭ ۇسىنىستارىن ەسكەرە وتىرىپ, بيىلدان باستاپ «تۇمار» مۇسىنشەسىنە ميلليون تەڭگە كولەمىندەگى اقشالاي سىياقى تاعايىنداۋدى شەشتى. وعان قوسا, بايقاۋ تاريحىندا تۇڭعىش رەت قازىلار القاسىنىڭ قۇرامىنا تەك قازاقستاندىق تەلەۆيزيا ماماندارى عانا ەمەس, حالىقارالىق دەڭگەيدەگى ساراپشىلار دا ەندى.
بايگەنىڭ ۇيىمداستىرۋشىلارىنىڭ ءبىرى, «مەديا دامىتۋ قورى» كورپوراتيۆتىك قورى باس ديرەكتورىنىڭ ورىنباسارى, تانىمال تەلەجۋرناليست ماحاببات ەسەن ايتقانداي: «ۇلتتىق بايگەنىڭ ماقساتى – كاسىبي ماماندارمەن ءادىل باعالاۋدى ۇيىمداستىرۋ ارقىلى قازاقستاندىق تەلەيندۋستريانىڭ دامۋىنا سەپتىك بولۋ. بۇل دەگەنىمىز قازىلار القاسىنىڭ الدىندا كۇردەلى تاپسىرما تۇردى – بەرىلگەن جوبالاردىڭ بارلىعىن قاراپ-تالداۋ جانە ولارعا ءادىل باعا بەرۋ, بۇل باعالاۋ سالاداعى ۇزدىكتەردى تانۋعا, ولارمەن ماقتانۋعا جانە ۇلگى ەتۋگە ۇلكەن سەپتىك».