قايبىر جىلى شاردارا اۋدانى, سۇتكەنت ەلدى مەكەنىندەگى سىرداريا وزەنى جاعاسىنداعى قورعانىس دامباسىن تاسقىن سۋ شايعان بولاتىن. جاۋاپتى مەكەمەلەر ونداي جايتتىڭ بيىل قايتالانبايتىنىن ايتۋدا. وبلىس اۋماعىندا سۋ تاسقىنى جاعدايى سىرداريامەن تىكەلەي بايلانىستى بولعاندىقتان قاتاڭ باقىلاۋعا الىنعان. بۇگىنگى تاڭدا سىرداريا وزەنىنىڭ تومەنگى اعىسىنا سەكۋندىنا 66 تەكشە مەتر سۋ جىبەرىلۋدە. وزەن ارناسىندا سۋدىڭ اعىسى قالىپتى, جاعالاۋداعى ەلدى مەكەندەرگە قاۋىپ جوق.
– تۇركىستان وبلىسى اۋماعىندا سۋقويمالارداعى جاعداي قالىپتى, تۇراقتى باقىلاۋدا, – دەدى توتەنشە جاعدايلار دەپارتامەنتىنىڭ باسشىسى نۇرعالي ءجۇنىسوۆ. جالپى, وبلىس بويىنشا سۋقويمالاردىڭ ورتاشا تولۋى 45-50%-دى قۇرايدى. وبلىستا بولۋى مۇمكىن توتەنشە جاعدايدىڭ الدىن الۋ ءىس-شارالارى دەر كەزىندە جانە ساپالى ورىندالۋدا. سۋقويمالار مەن وزەندەرگە كۇندەلىكتى مونيتورينگ جۇرگىزىلۋدە. «بۇگىندە شاردارا سۋ قويماسىندا – 4185 ملن تەكشە مەتر سۋ بار, تولۋى – 80%, شىعىپ جاتقان سۋ كولەمى – سەكۋندىنا 400,5 تەكشە مەتر. ال كوكساراي سۋ رەتتەگىشىندە جينالعان سۋ قورى – 1061,88 ملن تەكشە مەتر, تولۋى 35%-دى قۇراپ وتىر», دەدى دەپارتامەنت باستىعى.
وڭىردە ورنالاسقان 40 سۋقويمانىڭ 18-ءى رەسپۋبليكالىق, 17-ءسى قالا, اۋداندىق كوممۋنالدىق مەنشىكتە بولسا, 5-ەۋى جەكەمەنشىك يەلىگىندە. ياعني قاراۋسىز قالعان سۋقويمالار جوق. سىرداريا وزەنىنەن باستاۋ الاتىن كانالداردىڭ باس توسپاسى بەكىتىلگەن. قاپتالعان 53 توننا قۇم, 584 شاتىر, 4622 كەرەۋەت, 36 مىڭ ادامعا ارنالعان توسەك-ورىن دايىندالعان. سونداي-اق وبلىس اۋماعىنداعى وزەندەردىڭ 26,9 شاقىرىمىنا جاعا بەكىتۋ جانە ارنا تۇزەۋ جۇمىستارى جۇرگىزىلسە, 29,9 شاقىرىم قورعانىس دامباسى تۇرعىزىلىپتى. ارىق-اتىزداردىڭ ارناسى, كانالدار دا تازارتىلعان. ال شاردارا سۋقويماسىندا جۇرگىزىلىپ جاتقان سەيسميكالىق توزىمدىلىكتى كۇشەيتۋ جانە جوندەۋ بويىنشا اۋقىمدى جۇمىستاردى اياقتاۋ كەلەر جىلدىڭ جەلتوقسانىنا جوسپارلانعان.
تۇركىستان وبلىسى