بوكستان يوردانيادا ءوتىپ جاتقان توكيو وليمپياداسىنا جولداما بەرەتىن ازيا جانە تىنىق مۇحيتى ايماعىنىڭ ىرىكتەۋ ءتۋرنيرى مارەسىنە تاياپ كەلەدى. كەشە شيرەك فينالدىق جەكپە-جەكتەر ءوتىپ, جارىستىڭ جارتىلاي فينالىنا جانە وليمپيا ويىندارىنا جولداما العان بىرنەشە سپورتشىنىڭ ەسىمى بەلگىلى بولدى.
ەرلەر اراسىنداعى باسەكەدە ءبىرىنشى بولىپ وليمپيادا جولداماسىن 69 كيلو سالماقتا جۇدىرىقتاسقان ابىلايحان ءجۇسىپوۆ يەلەندى. جۇسىپوۆتەن كەيىن شارشى الاڭعا كوتەرىلگەن ءابىلحان امانقۇل, 2019 جىلعى الەم چەمپيونى بەكزات نۇرداۋلەتوۆ (81 كگ), ريو وليمپياداسىنىڭ كۇمىس جۇلدەگەرى ۆاسيلي لەۆيت (91 كگ) جانە اسا اۋىر سالماقتاعى الەم بىرىنشىلىگىنىڭ كۇمىس جۇلدەگەرى ءارى كوماندا كاپيتانى قامشىبەك قوڭقاباەۆ تا قارسىلاسىن ەش قيىندىقسىز جەڭىپ, جاپونيادا وتەتىن وليمپيا ويىندارىنا جولداما جەڭىپ الدى.
قىزدار اراسىندا ونەر كورسەتكەن 19 جاستاعى وتانداسىمىز نادەجدا ريابەتس تە باپكەرلەر ءۇمىتىن اقتاپ, وليمپياداعا بارۋ قۇقىعىن يەلەندى. ايتا كەتەيىك, ريابەتس 2018 جىلى جاسوسپىرىمدەر وليمپياداسىنا قاتىسىپ, قولا جۇلدەگەر اتانعان-دى.