كوزىن جۋىردا عانا اشقان بولۋ كەرەك, جۇدىرىقتاي عانا سارى كۇشىك كوشەنىڭ قاق ورتاسىندا قىڭسىلاپ جاتتى. قانداي قاتىگەز جان تاستاپ كەتتى ەكەن قورعانسىز بەيشارانى؟.. ايتكەنمەن, سورى قايناعان سارى كۇشىكتىڭ ماڭدايىنىڭ باعى بەس ەلى بولىپ شىقتى. قىڭسىلاپ جاتقان جەرىنەن ءناپ-نازىك قولدار كوتەرىپ الىپ, جىپ-جىلى قۇشاعىنا باسقان.
ءاۋ باستا اننا كۇشىكتىڭ تۇقىمىنىڭ قانداي ەكەنىن بىلمەگەن ەدى. ۇيىنە اكەلىپ, ءبىراز ۋاقىت اسىراعاننان كەيىن, بۇل نەگە قوڭ المايدى دەپ قاتتى تاڭىرقاعانى راس-تىن. تاماقتى قانشا جەسە دە تىرىلي ارىق قالپىنان تۇزەلەر ءتۇرى جوق. سودان كۇشىكتى الىپ, يت اسىراۋدىڭ اسقان شەبەرى الەكسەي پروشالىگين دەگەن كورشىسىنە كورسەتكەن. سويتسە, سارى كۇشىكتىڭ ارعى تەگى تاپ-تازا تازى ەكەن. «بۇل قازاقتىڭ اتاقتى تازى دەگەن تۇقىمىنان», دەپ تاپ باسىپ ايتقان الەكسەي كوكەسى. جالپى, بۇل كىسىنى اننانىڭ يت ۇستاپ, جۇگىرتۋدەگى ۇستازى دەسە دە بولادى. الەكسەيدىڭ اعالىق اقىل-كەڭەسىنىڭ ارقاسىندا تازى تۇقىمىن باعىپ-قاعۋدىڭ, باپتاۋدىڭ قىر-سىرىنا قانىقتى. بىرگە اڭعا شىعىپ, بۇل ونەردى دە ءبىر كىسىدەي مەڭگەرگەنى بار.
سول كۇشىك بۇگىندە ءۇش قار باستى. انناشا ايتقاندا, جاسى بيىل جازدا ۇشكە تولادى. اتىن «دجەك پوت» دەگەندى قىسقارتىپ, «دجەك» دەپ ءوزى قويعان. «مۇنىڭ ماعىناسى – جەڭىس اكەلەدى دەگەن ءسوز», دەيدى اننا...
اننا زاحاروۆا قاراعاندىنىڭ ىرگەسىندەگى سۇرىپتاۋ ەلدى مەكەنىندە اناسىمەن بىرگە تۇرادى. سول جەردەگى №85 ورتا مەكتەپتىڭ 11-سىنىپ وقۋشىسى.
– شىنىن ايتقاندا, مەندە قازىر بوس ۋاقىت جوق. ۇلتتىق بىرىڭعاي تەستىلەۋ سىناعىنا دايىندالىپ ءجۇرمىن. بولاشاق ماماندىعىمنىڭ مەديتسينامەن بايلانىستى بولاتىنىنا سەنىمدىمىن. ءبارى ءساتتى بولسا, قاراعاندىداعى مەديتسينا كوللەدجىنە تۇسسەم بە دەيمىن, – دەيدى اننا بولاشاققا وي جۇگىرتىپ.
بويجەتكەننىڭ بولاشاقتاعى ماماندىعىن تاڭداۋىنا اناسىنىڭ ىقپالى يگى اسەرىن تيگىزگەن دەپ سەنىممەن ايتۋعا بولادى: ول كىسى سۇرىپتاۋداعى ءدارىحانالاردىڭ بىرىندە فارماكولوگ بولىپ جۇمىس ىستەيتىن كورىنەدى.
«مەنىڭ باس دەمەۋشىم – انام», دەيدى اننا ك ۇلىپ. ايتسا ايتقانداي, تاتيانا ماكسيموۆنا قىزىنىڭ سۇيىكتى ىسىمەن اينالىسۋىنا بارىنشا جاعداي جاساپ, قولدان كەلگەن كومەكتىڭ ءبارىن كورسەتىپ وتىرادى ەكەن.
دجەك توعىز ايعا تولعاندا وساكاروۆ اۋدانىندا وتكەن العاشقى جارىسىنا قاتىستىپتى. مىنە, سودان بەرى اننا مەن ونىڭ تازىسى وبلىستا ۇيىمداستىرىلعان ءبىر دە ءبىر جارىستى قۇر جىبەرمەگەن. قاتىسقاندا دا كوپ ءيتتىڭ ءبىرى بولىپ جۇرگەن جوق, ۇنەمى جۇلدەگەرلەردىڭ قاتارىنان ورىن الادى.
ء«بىزدىڭ وبلىستا ۇلتتىق سپورت ويىندارى دامىپ كەلەدى دەپ ايتۋعا بولادى. بىراق, تازىلار اراسىنداعى كورمە مەن جارىس ۇيىمداستىرۋدا كەمشىن تۇستار جەتەرلىك. جارىستار جوعارى دەڭگەيدە وتسە, ولار تۋرالى اقپارات بۇكىل رەسپۋبليكاعا تاراپ وتىرسا دەگەن تىلەك بار. سونان كەيىن جارىسقا قاتىسۋشىلاردى جاتىن ورىنمەن قامتاماسىز ەتۋ, تاماقتاندىرۋ ماسەلەسىندە جەڭىلدىكتەر بولسا دەيمىز», دەپ وي تۇيەدى اننا ارۋ.
اننا اڭشىلىق ماۋسىم باستالعاندا دجەكتى قۋشوقى دەگەن جەردەگى ەرجان ەسىمدى تانىسىنىڭ قىستاعىنا ەكى-ءۇش كۇنگە, كەيدە ءبىر اپاتاداي ۋاقىتقا اپارىپ تاستايدى ەكەن. «وسى جەر دجەككە ۇنايدى. ول باسقا يتتەرمەن بىرگە دالادا اڭ اۋلاپ, قۇمارىنان ابدەن شىعادى. بىلتىردىڭ وزىندە دجەك بىرنەشە تۇلكى, قارساق, قويان الدى», دەيدى اننا ماقتانىش سەزىمىن جاسىرا الماي.
قازىرگى تاڭدا دجەكتىڭ «قازاقستاننىڭ چەمپيونى» دەگەن اتاعى بار. تۇقىمىن انىقتايتىن ەلەكتروندى تولقۇجاتى, اڭشىلىق بيلەتىنە دەيىن ءبارى زاڭداستىرىلعان. تالاي جارىستا العان كۋبوك, مەدال, ديپلومدارى دا ءۇيدىڭ ءبىر بۇرىشىن تولتىرىپ تاستاپتى.
تاياۋدا عانا دجەك وبلىستىڭ اقتوعاي اۋدانىنا قاراستى شاشۋباي كەنتىندە وتكەن تازىلار سىنىندا بەس شاقىرىم قاشىقتىق بويىنشا باس جۇلدەنى جەڭىپ الدى. مۇنىڭ الدىندا قاراعاندىدا وتكەن «سالبۋرىن-2020» بايقاۋىندا «ارلان» اتالىمى بويىنشا جۇلدەلى ەكىنشى ورىنعا ىلىككەن بولاتىن.
«تازىلار سىنى ەكى كەزەڭ بويىنشا وتەدى, دەيدى اننا. – الدىمەن ءيتتىڭ ءتۇر-ءتۇسى, ءمۇسىنى باعالانادى. بۇل جەردە مايدا-شۇيدەنىڭ وزىنە قاتتى ءمان بەرىلەدى. ماسەلەن, تازىنىڭ تۇمسىعى مەن قۇلاعىنىڭ ۇزىندىعى, قۇيرىعىنىڭ دۇرىس شەڭبەرلەنە شيىرشىقتالۋى, جون ارقاسىنىڭ تۇزۋلىگى, ءبارى-ءبارى قاتاڭ قازىلاردىڭ تالعام سىنىنان وتەدى. ودان كەيىن, ەكىنشى كەزەڭدە تازىلار 300, 500 مەتر بولاتىن قىسقا قاشىقتىقتارعا جۇيرىكتىك بويىنشا جارىسادى. مۇنى «كۋرسينگ» دەيدى. بۇل جەردە تازىلار پۋلتپەن باسقارىلاتىن ەلەكتروندى رۋلەتكا تارتاتىن سىمعا بايلانعان اڭ تەرىسىن قۋىپ جەتۋى كەرەك. ال ءۇش جانە بەس شاقىرىم قاشىقتىقتا اڭ تەرىسىن جەڭىل اۆتوموبيل سۇيرەيدى».
جۇرتتىڭ تازىسى قورادا تۇرسا, اننانىڭ ءيتى جىلى دا جايلى پاتەردى مەكەن ەتەدى. ء«وزىنىڭ بويىندا اقسۇيەكتىك مىنەز بار, وتە ءتارتىپتى. تازالىقتى جاقسى كورەدى», دەيدى يت يەسى. تاماقتى ءتۇرلى ءمازىر بويىنشا جەيتىن كورىنەدى. ونىڭ ىشىندە ەت مىندەتتى تۇردە بولۋ كەرەك ەكەن.
«دالادا اڭ اۋلاپ جۇرگەن تازىنى سۇيرەتىلگەن تەرىنىڭ سوڭىنا سالۋ قيىننىڭ قيىنى. ءيتتىڭ بۇدان زىقىسى شىعادى... ازىرگە جارىستارعا بارۋدى دوعارا تۇرسام با دەپ ويلاپ ءجۇرمىن. ەگەر, جۇلدە قورى قوماقتى بولىپ جاتسا, بۇل شەشىمىمدى وزگەرتۋىم دە مۇمكىن. ال ەندى, ءبىرىنشى ورىنعا تىگىلەتىن 50 مىڭ تەڭگەگە بولا جان قالتادان اقشا شىعىنداپ, الىستاعى جارىسقا بارۋ مەن ءۇشىن ءدال قازىرگى ۋاقىتتا ءتيىمسىز بولىپ تۇر», دەپ ويىنداعىسىن جاسىرماي ايتادى اننا سۇلۋ.
تازى ەرتكەن بويجەتكەن قازاقتىڭ اسىل قازىناسىنىڭ ءبىرى سانالاتىن قاسيەتتى قۇماي تۇقىمىنىڭ تازا قالپىندا ساقتالۋىنا قولدان كەلگەنشە قىزمەت ەتكىسى كەلەدى. بۇل سالادا جيناقتالعان ازدى-كوپتى تاجىريبەسىمەن ءبولىسىپ, تازى بايقاۋىنىڭ حالىقارالىق تالاپتارعا ساي, جوعارى دەڭگەيدە وتۋىنە وزىندىك ۇلەس قوسقىسى كەلەتىن قۇلشىنىسى دا قۋانتادى. ال اقىلدى قارىنداستىڭ: «ۇلتتىق سپورتتى دامىتۋ جانە ونى ناسيحاتتاۋ ارقىلى جاس بۋىننىڭ بويىنا وتانسۇيگىشتىكتىڭ ءدانىن سىڭىرۋگە بولادى», دەگەن پىكىرىمەن كەلىسپەۋ ءتىپتى دە مۇمكىن ەمەس.
قاراعاندى وبلىسى