بۇگىنگى جاڭا فورماتسيا مۇعالىمى بارلىق پەداگوگيكالىق قۇرالداردى مەڭگەرگەن, ءوزىن-ءوزى جەتىلدىرۋگە تالپىنعان, رۋحاني دامىعان شىعارماشىل تۇلعا بولۋى كەرەك.
شيەلى اۋدانىنىڭ تۇرعىنى ساندۋعاش ۇسەنوۆا وسى قاسيەتتەردى بويىنا ءسىڭىرىپ, ادىستەمەلىك شەبەرلىگىن شىڭدايدى. ونىڭ نەگىزگى ارمانى العان ءبىلىمىن بالالارعا ۇيرەتەتىن ءبىلىم بەرۋ ورتالىعىن اشۋ بولاتىن. ساندۋعاش اۋداندىق كاسىپكەرلەر پالاتاسى كەڭەسشىلەرىمەن اقىلداسا كەلە «جاس كاسىپكەر» جوباسىنا قاتىسادى. جوبا اياسىندا ول جۇمىس ۇدەرىسىن وڭتايلاندىرۋ, بيزنەستى جۇرگىزۋدىڭ ءتيىمدى تاسىلدەرىنە قانىعادى. تەورياسى مەن تاجىريبەسى ۇيلەسىم تاپقان كۋرستان سوڭ جەكە كاسىبىن اشۋعا كىرىسەدى.
مەملەكەتتەن بەرىلگەن قايتارىمسىز قارجىنىڭ ارقاسىندا بالالارعا قاجەتتى ورتالىعىمىزعا جاڭادان قۇرال-جابدىقتار الدىق. قازىر ءبىر توپتا التى بالادان وقىپ جاتىر. ورتالىقتا 100-دەن استام وقۋشى ءبىلىمىن جەتىلدىرۋدە. مۇندا بالالارعا روبوتەحنيكانى, مەنتالدى اريفمەتيكانى, ورىس, اعىلشىن تىلدەرىن, اتا-انالاردىڭ سۇرانىسى بويىنشا مەكتەپ باعدارلاماسىنداعى ءۇي تاپسىرمالارىن ورىنداۋ قىزمەتتەرىن كورسەتۋدەمىز, - دەيدى جاس كاسىپكەر.
جاس كاسىپكەر اشقان «دارىن» بالالارعا ءبىلىم بەرۋ ورتالىعىندا 6 ادام جۇمىس ىستەيدى. مۇندا مۇمكىندىگى شەكتەۋلى بالالار تەگىن وقيدى. ايىنا ءبىر رەت ورتالىق ۇستازدارى اشىق ساباقتار وتكىزىپ, اپتا سايىن بالالاردىڭ بوس ۋاقىتىن ءتيىمدى پايدالانۋعا ارنالعان شارالار ۇيىمداستىرىپ تۇرادى.
جاس كاسىپ يەسى الداعى ۋاقىتتا جوعارى سىنىپ وقۋشىلارىنا ارنالعان قىزمەت تۇرلەرىن ەنگىزۋدى جوسپارلاۋدا.