اقمولا وبلىسى زەرەندى اۋدانى وقۋ ءبولىمىنىڭ ادىستەمەلىك كابينەتى وكىلدەرىنىڭ ۇيىمداستىرۋىمەن جەرگىلىكتى وقۋشىلار اراسىندا بەلگىلى اقىن, حالىقارالىق «الاش» سىيلىعىنىڭ لاۋرەاتى, اتالعان اۋداننىڭ قۇرمەتتى ازاماتى قورعانبەك امانجولدىڭ قالامىنان تۋعان «كىشكەنتاي ابايلار» اتتى ولەڭدى مانەرلەپ وقۋدان بايقاۋ ءوتتى.
ۇلى اقىننىڭ 175 جىلدىعىنا وراي وتكەن شارانى باعالاۋدىڭ شارتى وزگەشەلەۋ بولدى. ياعني, بايقاۋعا قاتىسۋعا نيەت بىلدىرگەن وقۋشى اۋەلى, ءبىلىم ءبولىمىنىڭ ينستاگرام پاراقشاسىنا جوعارىداعى جىردى مانەرلەپ جاتقا وقىعان بەينە كورىنىسىن جۇكتەۋى ءتيىس. ناتيجەسىندە, بەينە كورىنىستى تاماشالاعان كورەرمەننىڭ ونلاين داۋىس بەرۋى ارقىلى جەڭىمپاز پەن جۇلدەگەرلەر انىقتالدى.
ء«ومىر مىناۋ وكىنىشتەن تۇرادى.
ءبىر جاس اقىن عاسىل بولعان مۇرادى:
«سەندەر مەنى ۇقپايسىڭدار, شىركىن-اي,
مەن كىشكەنتاي ابايمىن» دەپ جىلادى.
«مەن – كىشكەنتاي ابايمىن عوي, جاراندار,
مەندە ابايشا جىرلايتۇعىن قالام بار.
سەندەر مەنى ۇقپاساڭدار – ۇقپاڭدار,
ال تۇبىندە ۇعاتۇعىن عالام بار.
مەن – كىشكەنتاي, قۇيتتاي عانا ابايمىن.
ۇقپاساڭدار كوڭىلگە مۇڭ جامايمىن.
قۇيتتاي اباي جۇرەگىممەن – ابايشا
تانتىق ءسوزدى تارس ۇرۋعا جارايمىن»
– دەپ باستالىپ 10 شۋماقتان تۇراتىن اقىن ولەڭىن مانەرلەپ وقىعان جاس تالانتتار اراسىنان 1946 داۋىس جيناعان قىزىلسايا ورتا مەكتەبىنىڭ وقۋشىسى تىلەگەن امانتاي باس جۇلدەنى يەلەنسە, ءبىرىنشى ورىن – 1222 داۋىس جيناعان بىرلەستىك ورتا مەكتەبىنىڭ وقۋشىسى ءىنجۋ رايىمبەكتىڭ, ەكىنشى ورىن 1150 داۋىس جيناعان كەڭوتكەل نەگىزگى مەكتەپ وقۋشىسى ەرقانات دوسىمبەكتىڭ ەنشىسىنە بۇيىردى. ءۇشىنشى ورىنعا 1146 داۋىس جيناعان م.عابدۋللين اتىنداعى زەرەندى ورتا مەكتەپ وقۋشىسى مەرەي حايىرموللوۆا يە بولدى.