تۇركىستان وبلىسىندا 11 ەتنومادەني بىرلەستىك پەن ولاردىڭ اۋداندىق, قالالىق 7 فيليالى مەن 14 وكىلدەگى جۇمىس ىستەيدى. ءار ەتنوستىڭ سالت-ءداستۇرىن, ادەپ-عۇرپىن, مادەنيەتى مەن ءتىلىن دارىپتەۋ باعىتىندا قىزمەت ەتىپ كەلە جاتقان 4 جەكسەنبىلىك مەكتەپ پەن 8 جاستار قاناتى بار.
تۇركىستانداعى «جەڭىس» ساياباعىندا وتكەن العىس ايتۋ كۇنىنە ارنالعان سالتاناتتى جيىندا وبلىس اۋماعىندا تۇراتىن ۇلت پەن ەتنوس وكىلدەرىبىرگە كيىز ءۇيدىڭ شاڭىراعىن تىكتەپ, بيىككە كوتەردى.سالتىن ساقتاپ, ءداستۇرىن دارىپتەگەن ەتنوس وكىلدەرى قازاق جەرىن, اسىرەسە قاسيەتتى توپىراقتى قونىس ەتكەندەرىن قۋانىشپەن جەتكىزدى. مەرەكەلىك جيىندا وبلىس اكىمىنىڭ ورىنباسارى ساكەن قالقامانوۆ بارلىق ۇلت وكىلدەرىنىڭ بىرتۇتاستىق پەن كەلىسىمدە ءبىر ورتانى مەكەن ەتۋى ەل ىرگەسىنىڭ بەرىكتىگىنە ىقپال ەتەتىنىن جەتكىزدى. «بۇگىنگى يدەولوگيالىق ءمانى زور ءىس-شارادا وسى وڭىردە ءومىر ءسۇرىپ جاتقان ۇلت پەن ەتنوس وكىلدەرى باس قوسىپ, قازاقتىڭ قاراشاڭىراعى – كيىز ءۇيدى بىرگە قۇرۋعا اتسالىستى. وتكەنگە - سالاۋات, كەلەشەككە – امانات ايتا وتىرىپ, ءبىز كەلەر ۇرپاققا ۇلكەن ءۇمىت ارتۋىمىز كەرەك. ۇرپاقتار ساباقتاستىعى, ۇلتتار اراسىنداعى دوستىق, ەلىمىزدىڭ تىنىشتىعى كەلەر بۋىننىڭ ەنشىسىندە بولماق»,دەدى وبلىس اكىمىنىڭ ورىنباسارى.
ال شەشەن-ينگۋش ەتنو-مادەني بىرلەستىگىنىڭ مۇشەسى حۋسەين ديدسەەۆ بۇل مەرەكەنىڭ بىرلىك پەن تۇراقتىلىقتى ساقتاۋداعى ماڭىزىنا توقتالىپ, قازاق حالقىنا ءوزىنىڭ ايرىقشا العىسىن جەتكىزدى. وبلىس باسشىسى ءو.شوكەەۆتىڭ باستاماسىمەن جۇزەگە اسىپ, قازىرگى تاڭدا ۇلكەن قولداۋعا يە بولعان «قامقورلىق» باعدارلاماسى وسى شارادا دا ءوز جالعاسىن تاپتى. تۇركىستان قالاسىندا الەۋمەتتىك جاعدايى از قامتىلعان وتباسىلارعا كومەك كورسەتىلدى. مەرەكەلىك شاراعا قاتىسۋشى زيالى قاۋىم وكىلدەرى مەن ەتنوس وكىلدەرى ۇلتتىق تاعامداردان ءدام تاتىپ, جاستاردىڭ ونەرىن تاماشالادى.