ەرەكشە قۇرىلعىمەن تانىسۋعا اقتاۋ قالاسىنىڭ اكىمى عالىمجان نيازوۆ, زاعيپتار قوعامىنىڭ توراعاسى امانگەلدى مۇحامەدوۆ جانە باق وكىلدەرى قاتىستى. بۇل تۋرالى اقتاۋ قالاسى اكىمىنىڭ ءباسپاسوز قىزمەتى حابارلادى.
كوزى ناشار كورەتىن جاندارعا ارنالعان, ولاردىڭ كەڭىستىكتەگى باعدارىن انىقتايتىن «SEZUAL» قۇرىلعىسىن قازاقستاندىق IT-ونەرتاپقىش, پەداگوگيكا عىلىمدارىنىڭ كانديداتى جانە Global Inclusive Innovation مۇگەدەكتەر قوعامدىق بىرلەستىگىنىڭ توراعاسى عالىمجان گابدرەشوۆ ويلاپ تاپقان. ول ادام ميىنىڭ ەرەكشە مۇمكىندىكتەرىن پايدالا وتىرىپ, زاعيپ جانداردىڭ ەستۋ مۇمكىندىكتەرى ارقىلى ۇساق زاتتارعا دەيىن سەزۋدى تاپتى. ياعني «Sezual» تيفلوقۇرىلعىسىنىڭ كومەگىمەن مۇلدەم كوزى كورمەيتىن ادام ارا قاشىقتىقتى سەزىنىپ, الدىندا تۇرعان زاتتىڭ كولەمىن, ءپىشىمىن ءوز بەتىنشە انىقتاي الادى.
بۇل تەحنولوگيا العاشقى تاجىريبەلىك ساتىدا حالىقارالىق عالىمدار كەڭەسىندە سىنالىپ, زاعيپ ادامداردى كەڭىستىكتە باعىتتاۋ ءۇشىن تيفلوقۇرالدار سالاسىنداعى ماڭىزدى جاڭالىق رەتىندە تانىلدى.
حالىقارالىق عالىمداردىڭ جۇرگىزگەن زەرتتەۋلەردىڭ قورىتىندىسى بويىنشا, «SEZUAL» اپپاراتى الەمدىك انالوگتارمەن سالىستىرعاندا بارلىق كريتەريادان وتكەندىگى انىقتالدى جانە ودان دا جوعارى سىناقتاردان وتۋگە مۇمكىندىك بەرەدى. اتاپ ايتساق, تۇنگى ۋاقىتتا ادامنىڭ باعىتتان اۋىتقىماي كەدەرگىلەرگە دەيىنگى قاشىقتىقتى انىقتاۋعا كومەكتەسەدى. بۇل قۇرىلعىنى ويلاپ تاپقان عالىمدار اپپاراتتىڭ ءپروتوتيپىن ازىرلەۋ ءۇشىن دۇنيەجۇزىلىك بانكتەن 400 000 دوللار كولەمىندەگى قايتارىمسىز گرانتىن ۇتىپ الدى. سونداي-اق, بۇگىنگى كۇنى تيفلواپپاراتقا ەۋروپا مەن اقش ەلدەرىنىڭ ينۆەستورلارى قىزىعۋشىلىق تانىتۋدا. الايدا وتاندىق ونەرتاپقىشتار ءوز ءونىمىن قازاقستاندا پاتەنتتەپ, وندىرىسكە ۇسىنباق.
تانىستىرىلىم سوڭىندا قالا اكىمى ونەرتاپقىشتاردىڭ جوباسىن قولداۋعا دايىن ەكەنىن ايتىپ, جاستارعا ساتتىلىك تىلەدى.
ماڭعىستاۋ وبلىسى