قورداي اۋدانىنداعى قاراكەمەر, اۋقاتتى, قاراسۋ, ماسانچي جانە سورتوبە اۋىلدىق وكرۋگتەرىنىڭ بىرلەسكەن قوعامدىق كەلىسىم كەڭەسى قۇرىلىپ, ءوزىنىڭ جۇمىسىن باستاپ كەتتى.
اتالعان كەڭەس نەگىزىنەن حالىقتى بىرلىككە, تاتۋلىققا ۇندەيدى ءارى حالقىمىزدىڭ ەجەلدەن قالىپتاسقان قاراپايىم ادامگەرشىلىك قاعيدالارىن ناسيحاتتايدى. كەڭەس قۇرامىندا اۋىلدىق وكۋرگتەردىڭ ارداگەرلەرى, انالار مەن جاستار, مەتسەناتتار مەن مەشىت يمامدارى, سونداي-اق ۇكىمەتتىك ەمەس ۇيىمداردىڭ جانە ەتنومادەني بىرلەستىكتەردىڭ وكىلدەرى دە بار. وسى ۋاقىتقا دەيىن اۋقاتتى جانە سورتوبە اۋىلدارىندا 3 كەزدەسۋ ۇيىمداستىرىلىپ, وعان 400-گە جۋىق ادام قاتىسقان. سونىمەن قاتار اۋدانداعى ءاربىر اۋىلدىق وكرۋگتە ايەلدەر مەن جاستاردىڭ قوعامدىق كەڭەسى قۇرىلۋدا.
بۇگىندە كوپشىلىكتى بەيبىتشىلىك پەن تاتۋلىققا ۇندەۋ ماڭىزدى. وسى ورايدا ۇلتتىق قۇندىلىقتاردى دارىپتەۋ ماقساتىندا جامبىل وبلىستىق مادەنيەت, ارحيۆتەر جانە قۇجاتتاما باسقارماسىنىڭ ۇيىمداستىرۋىمەن قاراكەمەر, اۋقاتتى, قاراسۋ, ماسانچي جانە بۇلار باتىر اۋىلدارىندا ءال-ءفارابيدىڭ 1150 جىلدىعىنا ارنالعان ادەبي پوستۋلات, ءتۇرلى انيماتسيالىق جانە كوركەم فيلمدەر كورسەتىلىمى ءوتتى. مۇندا ش.ءۋاليحانوۆ اتىنداعى امبەباپ-عىلىمي كىتاپحاناسى كوپشىلىك نازارىنا كەمەڭگەر ويشىل تۋرالى ماڭىزدى مالىمەتتەر ۇسىندى. سونداي-اق, كورسەتىلگەن فيلمدەردە تاتۋلىق, بىرلىك پەن بەيبىتشىلىك سىندى قۇندىلىقتار كورىنىس تاپقان.
سول سياقتى قورداي اۋدانىنىڭ بىرقاتار اۋىلدارىندا جامبىل وبلىستىق ءبىلىم باسقارماسىنىڭ ۇيىمداستىرۋىمەن دە ءتۇرلى شارالار وتۋدە. مۇنداعى ماقسات – جاس ۇرپاقتى بىلىمدىلىككە, پاراساتتىلىققا تاربيەلەۋ. اۋىلداردا رۋحاني-مادەني شارالار ناۋرىز ايىنىڭ سوڭىنا دەيىن جالعاسادى. ونىڭ ىشىندە «مەن ەلىمنىڭ ۇلانىمىن!» اتتى 5-10 سىنىپ وقۋشىلارى اراسىندا شىعارما جازۋ بايقاۋى, جەرگىلىكتى جەرلەردەگى ەتنوس بىرلەستىكتەرىمەن بىرلەسكەن «ۇلت ۇلىسقا ورتاق ءۇي – قازاقستان» اتتى فەستيۆال, «ۇستازىما العىس!» العىس ايتۋ اكتسياسى, «ارمىسىڭ, ءاز ناۋرىز!» سالت-داستۇرلەر كەشى سياقتى شارالار بار. سونىمەن قاتار ءتۇرلى شارالار اياسىندا كوپبالالى وتباسىلارعا كومەك كورسەتىلەتىن بولادى.
جامبىل وبلىسى