قازاقتىڭ ۇلى اقىنى اباي قۇنانباي ۇلىنىڭ 175 جىلدىعىنا وراي, نازارباەۆ زياتكەرلىك مەكتەبىنىڭ باستاماسىمەن م.ح.دۋلاتي اتىنداعى تاراز مەملەكەتتىك ۋنيۆەرسيتەتىندە «بىلىمدىدەن شىققان ءسوز» اتتى اقىن شىعارماشىلىعىنا ارنالعان وبلىستىق فەستيۆال ءوتتى. شاراعا وبلىستىڭ 10-نان استام مەكتەپتەرىنەن كەلگەن كوماندالار قاتىسىپ, ونەر, روبوتوتەحنيكا سالالارى بويىنشا باق سىنادى.
شارا شىمىلدىعى «حاكىم اباي» تەاترلاندىرىلعان قويىلىمىمەن اشىلدى. جيىندا ۋنيۆەرسيتەت رەكتورى ماحمەتعالي سارىبەكوۆ جانە وبلىستىق ءبىلىم باسقارماسى باسشىسىنىڭ مىندەتىن اتقارۋشى ءجاميلا بەكباتىروۆا شارانىڭ ماڭىزدىلىعىن اتاپ ءوتىپ, قاتىسۋشىلارعا ساتتىلىك تىلەدى.
فەستيۆال بارىسىندا «ابايدىڭ ىزىمەن» اتتى ءبىلىم سالاسىن دامىتۋداعى وزەكتى ماسەلەلەر بويىنشا دوڭگەلەك ۇستەل, «ابايدىڭ قارا سوزدەرى – ونەگە كوزدەرى» تاقىرىبىنداعى اقىننىڭ ولەڭدەرى مەن قارا سوزدەرىن جاتقا وقۋ سايىسى جانە «وتكىردىڭ ءجۇزى, كەستەنىڭ ءبىزى, ورنەگىن سەندەي سالا الماس» تاقىرىبىندا روبوتوتەحنيكا وليمپياداسى ءبىر مەزەتتە ۇيىمداستىرىلدى.
دوڭگەلەك ۇستەل بارىسىندا جەرگىلىكتى ۋنيۆەرسيتەت رەكتورلارى مەن مەكتەپ ديرەكتورلارى مەكتەپ پەن جوعارى وقۋ ورنى قىزمەتىندەگى ساباقتاستىق ماسەلەلەرىن تالقىلادى. مۇندا كادر دايىنداۋ, ستۋدەنتتەردىڭ ءبىلىم ساپاسى, بىلىكتى مامانداردى مەكتەپكە تارتۋ تۋرالى ماسەلەلەر كوتەرىلىپ, ولاردى شەشۋ جولدارى ۇسىنىلدى.
سونىمەن قاتار ۋنيۆەرسيتەت فويەسىندە وقۋشىلار قۇراستىرعان روبوتتار قازاقتىڭ ۇلتتىق ويىن تۇرلەرىنەن جارىسقا ءتۇستى. بۇدان كەيىن وبلىس اۋداندارىنان كەلگەن مەكتەپ كوماندالارى اباي شىعارمالارى بويىنشا درامالىق قويىلىمدار ساحنالادى. سايىس تالابىنا ساي اتا-انالار, ۇستازدار مەن وقۋشىلار ءبىر ساحنادا ونەر كورسەتتى. فەستيۆال سوڭىندا جەڭىمپازدار انىقتالىپ, ولارعا جۇلدەلى ورىندار تابىستالدى.
جامبىل وبلىسى