ءۇندىستاندا ءال-ءفارابيدىڭ 1150 جىلدىعىنا ارنالعان ءىس-شارالار باستاۋ الدى

الماتى قالاسى «رۋحاني جاڭعىرۋ» ءوفيسىنىڭ مالىمەتىنە سۇيەنسەك, ءىس شاراعا قازاقستاننىڭ ۇندىستانداعى ەلشىسى ەرلان الىمباەۆ, قازۇۋ جانە دەلي ۋنيۆەرسيتەتتەرىنىڭ عالىمدارى, ورتالىق ازيا ەلدەرىنىڭ ديپلوماتيالىق ميسسيالارى مەن عىلىمي قاۋىمداستىق وكىلدەرى قاتىستى.

كەزدەسۋدى اشقان قازاقستاننىڭ ۇندىستانداعى ەلشىسى ەرلان الىمباەۆ ءال-ءفارابيدىڭ مەرەيتويى يۋنەسكو-نىڭ اتاۋلى كۇندەرى مەن وقيعالار كۇنتىزبەسىنە ەنگىزىلگەنىن جانە ونى مەرەكەلەۋ ادامزاتتىڭ «ەكىنشى ۇستازىنىڭ» دۇنيەجۇزىلىك مۇراسىن زەرتتەۋگە جانە زەردەلەۋگە قۋاتتى سەرپىن بەرەتىنىن اتاپ ءوتتى. بۇگىندە ۇلى دالا ويشىلىنىڭ ەسىمى ءار ەلدىڭ, سونىڭ ىشىندە ءۇندىستاننىڭ عالىمدارىن دا اسا قىزىقتىرۋدا. مۇنداي ءىس-شارالاردى جوعارى حالىقارالىق دەڭگەيدە وتكىزۋ ءال-ءفارابيدىڭ شىعارماشىلىق مۇراسى مەن قازاق تاريحىن دارىپتەۋگە ىقپال ەتەدى.

دوڭگەلەك ۇستەل بارىسىندا قازۇۋ دەلەگاتسياسى ءال-ءفارابيدىڭ ءومىرى مەن ەڭبەكتەرى, ونىڭ قازىرگى كەزدەگى مۇراسىنىڭ ماڭىزدىلىعى تۋرالى عىلىمي باياندامالار مەن پرەزەنتاتسيالار جاسادى. سونىمەن قاتار ويشىلدىڭ يدەيالارى نەگىزىندە ازىرلەنگەن «ۋنيۆەرسيتەت 4.0» جاڭا بۋىن ۋنيۆەرسيتەتىنىڭ رۋحاني-ادامگەرشىلىك جانە عىلىمي-تەحنولوگيالىق پلاتفورماسىن قامتيتىن مودەلى ۇسىنىلدى.

ءىس-شارادا ءسوز العان ءۇندىستاننىڭ اكادەميالىق توپتارىنىڭ وكىلدەرى, عىلىمي ورتالىقتار مەن ينستيتۋتتاردىڭ باسشىلارى ءابۋ ناسىر ءال-فارابي مۇراسىنىڭ ماڭىزدىلىعىنا ەرەكشە توقتالىپ, وسىنداي اتاۋلى شارالاردىڭ ەكى دوستاس ەلدەردىڭ مادەنيەتىن جاقىنداستىرۋداعى ماڭىزدىلىعىن اتاپ ءوتتى.

ۇندىستانعا ساپار بارىسىندا قازاقستاندىق جەتەكشى جوعارى وقۋ ورنىنىڭ دەلەگاتسياسى اميتي ۋنيۆەرسيتەتىندە (نويدا ق.) 100-دەن استام ەل وكىلدەرىنىڭ باسىن قوسقان «INBUSH ERA-2020» بۇكىلالەمدىك ءسامميتىنىڭ جۇمىسىنا قاتىستى. سامميت اياسىندا ىنتىماقتاستىق تۋرالى مەموراندۋمعا قول قويىلىپ, اميتي ۋنيۆەرسيتەتىندە ءال-فارابي ورتالىعىن جانە اتالمىش ءۇندى جوعارى وقۋ ورنىنىڭ قازۇۋ-دا وكىلدىگىن قۇرۋ تۋرالى كەلىسىمگە قول قويىلدى.

الماتى