ۆولونتەر جىلى پرەزيدەنت قاسىم-جومارت توقاەۆتىڭ جارلىعىمەن ايدارلانعان جىلدىڭ نەسىبەسى دە, جاڭالىعى دا مول بولاتىن سىڭايلى. ۆولونتەرلەردىڭ «بىرگەمىز!» رەسپۋبليكالىق فرونت-كەڭسەسىن اشقان مەملەكەت باسشىسى: «وتاندى ءسۇيۋ دەگەنىمىز ايعايشىل ۇراندار مەن قۇرعاق سوزدەر ەمەس, بۇل كۇندەلىكتى ەڭبەك ەتۋ, سونىڭ ىشىندە جان قالاۋى بويىنشا قايىرىمدى ىستەرمەن حالىقتىڭ يگىلىگىنە ەڭبەك ەتۋ» دەپ انىق ايتتى.
بۇل وقۋشى جانە بىلىمگەر جاستاردى (ستۋدەنت, ماگيسترانت, دوكتورانت) عانا ەمەس, جاسامىستاردى دا, ءتىپتى تۇتاس قوعامدى ورتاق ىسكە – ونەگە, تاربيە, يماندىلىق, تاجىريبە شىڭدالاتىن شارالارعا جۇمىلدىرادى. ءدال وسىلاي اتالماسا دا ونىڭ مازمۇنىنا سايكەسەتىن ءىس-ارەكەت, قىزمەت ەلىمىزدە ەرتە زاماننان بەرى بار. شىنىندا, الەمنىڭ بارشا جۇرتىندا كەزدەسەتىن يگى ءداستۇردىڭ ۇزىلمەي, قاي زاماننىڭ بولسىن تالابىنا ساي جاندانۋى, تولىعۋى – عالامدىق جاسامپازدىق پەن رۋحاني جاڭعىرۋدىڭ ءبىر كورىنىسى. وسى تۇرعىدا تاياۋدا عانا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى جاريا ەتكەن جوبالاردىڭ ءمانى, اۋقىمى, فورماتى وزگە وقۋ ورىندارىنا ۇلگى بولىپ, تالاپشىل جاستاردى, قالىڭ جۇرتشىلىقتى سەرپىلتەدى دەگەن ويدامىز. «جاقسى ءىس», «قايىرىمدى ورتا», «مادەني سۇحبات», ء«ورىستى ونەر», «تازا ەلوردا», «مەديا الاڭ» سياقتى اتاۋىنىڭ ءوزى القالى ورتانىڭ باسىن قوساتىن جوبالار ەكەنى, جەكە ادامداردىڭ مۇقتاجىنان باستاپ, قوعامنىڭ, الەۋمەتتىڭ قاجەتتەرىنە دەيىن قامتيتىنى بايقالادى. سونىڭ ىشىندە ازاماتتارعا ءتۇرلى قىزمەتتى ينتەرنەت كومەگىمەن الۋدى ۇيرەتۋ, ءوز قۇقىعىنا قاتىستى زاڭ نورمالارىن ءبىلۋ مەن پايدالانۋدى كورسەتۋ, بارلىق جاننىڭ سوڭعى تۇراعى – زيراتقا دەيىن رەتتەۋ, باسقا دا قاستەرلى ورىنداردا ءداستۇرلى مادەنيەت ۇدەرىسىن قالىپتاستىرۋ, ت.ب. يگى شارالار بار ەكەنى قۋانتادى.
ارينە, ۆولونتەرلىكتىڭ مىڭ سان ءتۇرى بار. ودان دا باسقا فورمالارى بولۋى مۇمكىن, شەكتەلۋگە دە ءتيىس ەمەس. قالا مەن دالامىزدىڭ ءوز ەرەكشەلىكتەرىن ەسكەرە وتىرىپ, جان قالاۋىمەن كوپ ىزگى ءىس اتقارۋعا مۇمكىندىك مول. ىلگەرىدەن وتانىمىزدا ءجيى ايتىلاتىن جانە ءار جۇرەكتىڭ تورىنەن ورىن العان «كۇنىنە ءبىر جاقسىلىق جاسا!» دەگەن اقجارىلقاپ تىلەك قوعام جاۋاپكەرشىلىگىن سەزىنگەن ادامنىڭ ەرىك-جىگەرىنەن, كەمەلدىككە ۇمتىلعان ەلدىڭ سۇرانىسىنان تۋسا كەرەك-ءتى. «جاقسىلىق جاساساڭ قايتادى, قايتپاسا – ايتادى», ياعني بۇل ارەكەت ەسەپكە قۇرىلمايدى جانە ەسەسىن دە سۇراماۋ كەرەك. قارىمتاسىن كۇتۋ دەگەن قارىز بەرۋمەن تەڭ بولماق. ويتكەنى شەكاراسى مەن شەگى جۇرەك پەن نامىس ەرشاتىنا عانا جازىلعان قايىرىمدىلىق, مەيىرىمدىلىك, ادامشىلىق, گۋمانيستىك, ازاماتتىق قاعيداتتاردان باستاۋ الاتىن قادامدار ادامدار اراسىنداعى قاتىناستاردى جاڭا ساپاعا, جاڭا بەلەسكە كوتەرەتىنى ءسوزسىز.
تاعى ءبىر ماڭىزدى جايتتى ايتۋ ارتىق ەتپەس. وسىناۋ جاڭا باستامادا, مەملەكەت باسشىسى ەسكەرتكەندەي, «ناۋقانشىلدىقتان ارىلۋدىڭ» ونەگەسىن كورسەتۋگە تولىق جاعداي دا, مۇمكىندىك تە بار. ياعني ەلىمىزدە شىنايى ۆولونتەرلىك باعدارلامالاردىڭ, ەرىكتىلەر قوزعالىسىنىڭ وركەندەۋىنە نەگىز قالايتىن كەزدى بوسقا وتكىزبەسەك, بيىل مەرەيتويىن اتاپ وتكەلى وتىرعان ابايدىڭ وسيەتىنە دە ادالدىعىمىزدى تانىتار ەدىك. لايىم, سولاي بولسىن!
دارحان مىڭباي,
ءماجىلىس دەپۋتاتى