بۇگىن الماتىداعى Doubletree by Hilton Almaty قوناق ۇيىندە ايەلدەر كاسىپكەرلىگىنە ارنالعان «Women in Business» ەكىنشى فورۋمى ءوز جۇمىسىن باستادى.
ءىس-شارانى الماتى قالاسى ىسكەري ايەلدەر كەڭەسى الماتى قالاسى كاسىپكەرلەر پالاتاسىنىڭ قولداۋىمەن ۇيىمداستىرىپ وتىر. فورۋمنىڭ باس سەرىكتەسى – «قازاقستان حالىق بانكى» اق. قازاقستان ءباسپاسوز كلۋبى اقپاراتتىق جانە ۇيىمداستىرۋ تۇرعىسىنان قولداۋ كورسەتتى.
فورۋم بيزنەس, ايەلدەر كاسىپكەرلىگى جانە الەۋمەتتىك ماسەلەلەرگە ارنالعان ناعىز ديالوگ الاڭىن قۇرۋ ماقساتىندا ەكىنشى رەت وتكىزىلىپ وتىر.
فورۋم جۇمىسىنا ەكونوميكانىڭ ناقتى سەكتورىنان 300-دەن اسا كاسىپكەر-ايەل, سونداي-اق, تاجىريبەلى ساراپشىلار قاتىسىپ, ايەلدەر كاسىپكەرلىگىندە كەزدەسەتىن ماسەلەلەردى شەشۋگە ارنالعان ءوز تاسىلدەمەلەرىمەن ءبولىستى.
فورۋمدى الماتى قالاسى اكىمى باقىتجان ساعىنتاەۆ اشىپ, ول ايەلدەر كاسىپكەرلىگىن دامىتۋ سالاسىنداعى جوبالار جايىندا اقپارات بەردى.
فورۋم اياسىندا بيزنەس-ورتانى دامىتۋ, ايەلەردى وقىتۋ جانە ولاردىڭ بيزنەسىن قارجىلاندىرۋعا ارنالعان قولجەتىمدى باعدارلامالار, ەكونوميكالىق ساياسات, جەڭىل ونەركاسىپ پەن قالانىڭ كرەاتيۆتىك يندۋسترياسىن, قالا ينفراقۇرىلىمىن دامىتۋ, سالىق تولەۋ جانە كاسىپكەرلەردىڭ جەكەباس تيىمدىلىگىن كوتەرۋ سىندى كوكەيتەستى ماسەلەلەر تالقىلانىپ وتىر.
«ايەلدەر بيزنەسىن قولداۋعا ارنالعان قۇرالدار» تاقىرىبىنداعى پانەلدىك پىكىرتالاسقا «قازاقستان حالىق بانكى» اق باسقارما ءتورايىمى ءۇمىت شاياحمەتوۆا, «تۇرعىن ءۇي قۇرىلىس جيناق بانكى» اق باسقارما ءتورايىمى ءلاززات يبراگيموۆا, سونداي-اق, «دامۋ» كاسىپكەرلىكتى دامىتۋ قورى» اق جانە ەۋروپالىق قايتا قۇرۋ جانە دامۋ بانكىنىڭ وكىلدەرى قاتىستى.
«Fashion يندۋستريا كرەاتيۆتىك ەكونوميكانىڭ قوزعالتقىشى رەتىندە» دەپ اتالاتىن سەسسيا كەزىندە ديزاين-ءونىمنىڭ ەل ەكونوميكاسىنا قوساتىن ۇلەسى جالپى ىشكى ونىمدەگى پايىز كورسەتكىشى ارقىلى ەمەس, وسى ديزان-ءونىم ارقاسىندا قالىپتاساتىن جاڭا مادەني پاراديگما دەڭگەيىمەن, سونداي-اق قازاقستاندىقتار اراسىندا جانە شەتەلدە ەل ءيميدجىنىڭ كوتەرىلۋىمەن باعالانۋى ءتيىس دەگەن يدەيا ايتىلدى.
فورۋمدا اينۇر تۇرىسبەك (Ainur Turisbek), جانەل بەرتاەۆا (Lenazh), قۇرالاي نۇرقاديلوۆا (KURALAI ءسان ءۇيى), اسەل ءادىل (Adili), ولگا كيم (Brosh) سىندى ەلىمىزدەگى كرەاتيۆتىك ەكونوميكانىڭ دامۋىنا كۇندەلىكتى ۇلەس قوسىپ وتىرعان بەلگىلى ايەلدەر ءسوز الدى.
سونىمەن قاتار فورۋم الاڭىندا بيزنەس تيىمدىلىگىن كوتەرۋ, سونىڭ ىشىندە, ايەلدەر بيزنەسىنە ارنالعان Agile-تۇعىر, جەكەباس ترانسفورماتسياسىنىڭ بيزنەس تابىسىنا ىقپالى, سالىق زاڭناماسىنداعى باستى وزگەرىستەر سىندى تاقىرىپتارعا ارنالعان شەبەرلىك ساباقتارى مەن پراكتيكۋمدار وتەدى.