بيىل بىرىككەن ۇلتتار ۇيىمى ءوزىنىڭ 75 جىلدىق مەرەيتويىن اتاپ وتەدى. وسى ايتۋلى وقيعا قارساڭىندا بۇۇ الماتىداعى كەڭسەسىندە قازاقستاندا تىركەلگەن بۇۇ اگەنتتىكتەرىنىڭ باسشىلارى مەن بۇقارالىق اقپارات قۇرالدارىنىڭ وكىلدەرى باس قوسىپ, حالىقارالىق ۇيىمنىڭ قازاقستانداعى اگەنتتىكتەرىنىڭ بيىلعى جوسپارىمەن تانىستى.
ورايى كەلىپ تۇرعاندا, بۇۇ-نىڭ الماتىداعى كەڭسەسى قاۋىپسىزدىكتىڭ الەمدىك ستاندارتتارىنا جاۋاپ بەرەتىن بىرەگەي عيمارات ەكەنىن ايتا كەتكەن ءجون.
وسى عيماراتتا قازاقستان رەسپۋبليكاسىنىڭ سىرتقى ىستەر مينيسترلىگىنىڭ الماتى قالاسىنداعى وكىلدىگىنىڭ باسشىسى ەرلان ىسقاقوۆ, قازاقستاندىق مەديا اليانسىنىڭ توراعاسى ارمانجان بايتاسوۆ, بۇۇ-نىڭ قازاقستانداعى جاھاندىق كوممۋنيكاتسيالار دەپارتامەنتىنىڭ وكىلى ۆلاستيميل سامەك, يۋنەسكو-نىڭ قازاقستانداعى كلاستەرلىك بيۋروسىنىڭ ديرەكتورى كريستا پيككات 30 شاقتى جۋرناليسپەن كەزدەستى.
ەرلان ىسقاقوۆ قازاقستان كوپتەگەن حالىقارالىق ۇيىمداردىڭ ىشىندە بۇۇ-نىڭ بەلسەندى مۇشەسى بولىپ تابىلاتىندىعىن جانە ءبىزدىڭ مەملەكەت حالىقارالىق قاۋىمداستىققا ءساتتى كىرىگىپ, لايىقتى ورنىن الاتىنىن تىلگە تيەك ەتتى. بۇۇ كەڭسەسىندە بۇۇ جۇيەسىندە ايماقتىق وكىلەتتىكتەرى بار 30-دان استام اگەنتتىكتىڭ 16-سى قازاقستاندا ورنالاسقان.
قازاقستاندىق مەديا اليانسىنىڭ توراعاسى ارمانجان بايتاسوۆ ءوز سوزىندە سىرتقى ساياساتتىڭ كۇن تارتىبىندە قازاقستان رەتسيپيەنت ەل پوزيتسياسىنان ايماقتىق دامۋداعى سەرىكتەس پوزيتسياسىنا بىرتىندەپ اۋىسىپ كەلە جاتقانىنا نازار اۋداردى. وسىعان بايلانىستى الماتىدا بۇۇ ايماقتىق حابىن قۇرۋ ستراتەگيالىق باسىمدىقتاردىڭ ءبىرى بولىپ تابىلادى. بۇل قادام قازاقستانعا ايماقتىق دامۋدى, قاۋىپسىزدىك پەن تۇراقتىلىقتى قامتاماسىز ەتۋگە قوسىمشا ۇلەس قوسۋعا مۇمكىندىك بەرەدى.
كريستا پيككات حانىم ءبىلىم بەرۋ, عىلىم جانە تەحنولوگيالار, الەۋمەتتىك مەن گۋمانيتارلىق عىلىمدار, مادەنيەت, بايلانىس, اقپارات جانە ينفورماتيكا سياقتى ىنتىماقتاستىقتىڭ نەگىزگى باعىتتارىن ايقىندايتىن قازاقستانداعى يۋنەسكو قىزمەتى تۋرالى اتادى.
«بيىل يۋنەسكو-نىڭ ايشىقتى شارالارىنىڭ قاتارىنا ءابۋ ناسىر ءال-ءفارابيدىڭ 1150 جىلدىعى, شىمكەنت قالاسىنىڭ 2200 جىلدىعى مەن اباي قۇنانباي ۇلىنىڭ 175 جىلدىعى ەنىپ, جانە ونىڭ جاريالانىمدارىن 2020 جىلعا ارنالعان حالىقارالىق كۇنتىزبەگە ەنگىزۋ تۋرالى قارار قابىلداندى. وسى ايتۋلى داتالار يۋنەسكو ارنالارىن قولدانا وتىرىپ, اتاۋلى وقيعالاردى شەتتىلدەرىندەگى باسىلىمداردا حالىقارالىق دەڭگەيدە ناسيحاتتاۋ قاراستىرىلعان», دەدى كريستا پيككات. وسىعان وراي, ۇستىمىزدەگى جىلدىڭ قىركۇيەگىندە يۋنەسكو باس حاتشىسى ودرە ازۋلەنىڭ قازاقستانعا ساپارى جوسپارلانعان.
جالپى, كەزدەسۋ سۇراقتار مەن جاۋاپتار تۇرىندە ءوربىدى. جانە بۇۇ-نىڭ 75 جىلدىعىنا ارنالعان بارلىق ءىس-شارالاردى قازاقستاندىق بۇقارالىق اقپارات قۇرالدارىندا ناسيحاتتاۋ ماسەلەسى ءسوز بولدى.
بۇۇ قازىرگى باس حاتشىسى – انتونيۋ گۋتەرريش 2017 جىلدىڭ 1 قاڭتارىنىنا بەرى وسى قىزمەتتى اتقارىپ كەلەدى.
الماتى