ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ەرلان اۋكەنوۆ سولتۇستىك قازاقستان وبلىسىنا جۇمىس ساپارى اياسىندا ارداگەرلەرمەن كەزدەستى, حالىقتى جۇمىسپەن قامتۋ ورتالىعى مەن «جانۇيا» وتباسىن قولداۋ ورتالىعىندا بولدى, سونداي-اق وبلىس اۋداندارى اكىمدىكتەرىنىڭ قىزمەتكەرلەرىمەن اتاۋلى الەۋمەتتىك كومەك تاعايىنداۋ جانە الەۋمەتتىك قىزمەت كورسەتۋ ماسەلەلەرى بويىنشا سەلەكتورلىق كەڭەس وتكىزدى. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتى حابارلادى.
ۆيتسە-مينيستر وڭىردەگى ءوز باعدارلاماسىن ارداگەرلەر ۇيىمدارىمەن كەزدەسۋدەن باستادى, ونىڭ بارىسىندا دايىندالىپ جاتقان «ارداگەرلەر تۋرالى» زاڭ جوباسى تۋرالى ايتتى. قۇجاتتا قولدانىستاعى زاڭناما بويىنشا ارداگەرلەرگە بەرىلەتىن بارلىق جەڭىلدىكتەر مەن كەپىلدىكتەر شوعىرلاندىرىلاتىن بولادى. اۋكەنوۆتىڭ ايتۋىنشا, زاڭ جوباسى اياسىندا: ارداگەرلەردىڭ 5 الەۋمەتتىك قورعالاتىن ساناتىن انىقتاۋ; اۋعانستانداعى جانە باسقا ەلدەردەگى ۇرىس قيمىلدارىنا قاتىسقان اسكەري قىزمەتشىلەردى باسقا مەملەكەتتەردىڭ اۋماعىنداعى ۇرىس قيمىلدارىنىڭ ارداگەرلەرىنە تەڭەستىرۋ; باسقا مەملەكەتتەردىڭ اۋماعىنداعى جاۋىنگەرلىك ءىس-قيمىل ارداگەرلەرىنىڭ ساناتتارىن كەڭەيتۋ; جاۋىنگەر-ينتەرناتسيوناليستەردى, چەرنوبىل قۇرباندارىن, سونداي-اق سوتسياليستىك ەڭبەك ەرلەرىن الەۋمەتتىك قولداۋ جونىندەگى شارالاردى كۇشەيتۋ ۇسىنىلادى.
سونىمەن قاتار وبلىس اكىمدىگىندە ۆيتسە-مينيستر ءوڭىردىڭ قالالارى مەن اۋداندارىمەن اتاۋلى الەۋمەتتىك كومەك (بۇدان ءارى – ااك) تاعايىنداۋ, «قامقورلىق» جول كارتاسىن, بەلسەندى ۇزاق ءومىر ءسۇرۋ باعدارلاماسىن جۇزەگە اسىرۋ, «باقىتتى وتباسى» ورتالىعىن قۇرۋ, الەۋمەتتىك قىزمەتتەر پورتالىن ىسكە اسىرۋ جانە ت. ب. ماسەلەلەرى بويىنشا سەلەكتورلىق سەمينار – كەڭەس وتكىزدى.
اۋكەنوۆ قازاقستاندا مۇگەدەكتىگى بار ادامداردىڭ ءومىر ءسۇرۋ ساپاسىن جاقسارتۋدىڭ ناقتى شارالارىنا توقتالدى. بۇل ءۇشىن وڭىرلەرگە 2020 جىلى 80%-عا تيىمدىلىك بەرەتىن, 18 باستى ءىس-شاراسى بار «قامقورلىق» جول كارتالارىن بەكىتۋ ۇسىنىلدى. مىسالى, ءاربىر وڭىردە مەملەكەتتىك الەۋمەتتىك تاپسىرىستى ورنالاستىرۋ جانە مەملەكەتتىك-جەكە مەنشىك ارىپتەستىك تەتىكتەرىن قولدانۋ ەسەبىنەن الەۋمەتتىك وڭالتۋ جانە ەرتە ارالاسۋ جەكە ورتالىقتارىن اشۋ جوسپارلانعان.
سونىمەن قاتار بيۋدجەت ەسەبىنەن بارلىق وڭىرلەردە 150 الەۋمەتتىك وڭالتۋ ورتالىعىن اشۋ جوسپارلانۋدا. 2020-2021 جىلدارى قۇرىلىس اقمولا, اقتوبە, الماتى, باتىس قازاقستان, شىعىس قازاقستان وبلىستارىندا, نۇر-سۇلتان, الماتى جانە شىمكەنتتە باستالادى. سونىمەن قاتار ەلباسىنىڭ «قامقورلىق» باستاماسى اياسىندا رەسپۋبليكانىڭ وڭىرلەرىندەگى جالپى ءبىلىم بەرەتىن مەكتەپتەردە ينكليۋزيۆتى قولداۋ بويىنشا 8 سىنىپ اشۋ جوسپارلانۋدا. «قادامدىق قولجەتىمدىلىك» قاعيداتى نەگىزىندە ەمحانالاردا شاعىن جانە ورتا مەديتسينالىق وڭالتۋ ورتالىقتارى اشىلادى.
سونداي-اق ەرلان اۋكەنوۆ جۇمىس ساپارى اياسىندا جۇمىسپەن قامتۋ ورتالىعىندا بولىپ, وندا ازاماتتاردى جۇمىسپەن قامتۋعا جاردەمدەسۋدىڭ بەلسەندى شارالارىنا تارتۋ تۋرالى باياندالدى. سونىمەن قاتار وعان ااك-كە ءوتىنىش بەرۋشىلەرمەن جۇمىس جۇرگىزىلەتىن بولمە كورسەتىلدى. ايتا كەتۋ كەرەك, 2020 جىلدىڭ 1 قاڭتارىنداعى جاعداي بويىنشا سولتۇستىك قازاقستان وبلىسىندا 6 مىڭعا جۋىق وتباسىعا ااك تولەندى. سونداي-اق وڭىردە قايىرىمدىلىق جانە دەمەۋشىلىك كومەك ارقىلى الەۋمەتتىك قولداۋ كورسەتىلەدى. وتكەن جىلى 1,4 ميلليارد تەڭگە كولەمىندە كومەك كورسەتىلگەن.