تۇركىستان وبلىسىندا تۇرعىنداردىڭ ءومىر ءسۇرۋ ساپاسىن جاقسارتۋدىڭ نەگىزگى جولى رەتىندە اۋدان, قالالاردىڭ ەلدى مەكەندەرىندە ينفراقۇرىلىمدى دامىتۋعا ەرەكشە ءمان بەرىلۋدە. وسى ورايدا, وتكەن جىلى ەلدى مەكەندەردى اۋىزسۋمەن قامتاماسىز ەتۋ ماقساتىندا, 103 نىساننىڭ قۇرىلىسىنا 13,7 ملرد تەڭگە قاراستىرىلعان.
بولىنگەن قارجىعا سۋ قۇبىرى مۇلدە جوق 43 ەلدى مەكەنگە جاڭا اۋىزسۋ جۇيەلەرى جۇرگىزىلگەن. «كەڭەس زامانىنان بەرى ورتالىقتاندىرىلعان اۋىزسۋ جۇيەسى سالىنباعان سوزاق اۋدانىنداعى 5 ەلدى مەكەنگە, شاردارا اۋدانىنداعى 5 ەلدى مەكەنگە اۋىزسۋمەن قامتۋ بويىنشا قۇرىلىس جۇمىستارى جۇرگىزىلدى. سونداي-اق, 12 ەلدى مەكەننىڭ توزىعى جەتكەن اۋىزسۋ جۇيەلەرى جاڭارتىلدى. ناتيجەسىندە, قامتۋ دەڭگەيى 80%-دان استى نەمەسە 671 ەلدى مەكەن اۋىزسۋمەن قامتاماسىز ەتىلدى. اعىمداعى جىلعا 45 نىساننىڭ قۇرىلىسىنا 15 ملرد تەڭگەدەن استام قارجى باعىتتالىپ وتىر», دەدى وبلىس اكىمى ومىرزاق شوكەەۆ حالىققا ەسەپ بەرۋ كەزدەسۋىندە. سۋ قۇبىرىمەن قامتىلماعان 26 ەلدى مەكەندى جاڭا اۋىزسۋ جۇيەلەرىمەن قامتىپ, 12 اۋىلداعى توزىعى جەتكەن سۋ قۇبىرلارىن قايتا جاڭارتۋ جوسپارلانىپ وتىر.
سونداي-اق نەبارى 16%-ى كارىز جۇيەسىمەن قامتىلعان تۇركىستان قالاسىنىڭ ەكولوگيالىق جاعدايىن جاقسارتۋ ماقساتىندا جان-جاقتى تالداۋ جۇمىستارى جۇرگىزىلگەن. ناتيجەسىندە قالانى 2024 جىلعا دەيىن 100% كارىز جۇيەسىمەن قامتاماسىز ەتەتىن 10 نىساننىڭ جوباسى ازىرلەنىپ, كەشەندى جوسپارعا ەنگىزىلگەن. ال تابيعي گازبەن قامتۋ بويىنشا وتكەن جىلى وڭىردە 54 نىساننىڭ قۇرىلىسىنا 19 ملرد تەڭگەدەن استام قارجى باعىتتالعان.
بيىل بيۋدجەتتەن 18 ملرد تەڭگەدەن استام قارجى قارالىپ, 25 نىساننىڭ قۇرىلىس جۇمىستارىن جۇرگىزۋ جوسپارلانۋدا. جىلدىڭ سوڭىنا دەيىن تۇركىستان قالاسىن گازبەن تولىعىمەن قامتۋ كوزدەلىپ وتىر.
سونىمەن قاتار بۇگىنگى كۇنگە دەيىن گازعا قوسىلماعان 78 ەلدى مەكەننىڭ 39 –ىنا «كوگىلدىر وتىن» بەرىلگەن. وبلىس اكىمى بەكىتىلگەن جول كارتاسىنا سايكەس, 39 ەلدى مەكەن جىل سوڭىنا دەيىن «كوگىلدىر وتىنعا» قوسىلاتىنىن ءمالىم ەتتى.