اقجۇرەك ازامات

الايدا, «ادال جاندى ونەگە تۇت وزىڭە» دەمەكشى,  بيىك بولمىسىمەن, ادامگەرشىلىك تۇلعاسىمەن, ادالدىق قاسيەتىمەن زامانداستارىنىڭ قۇرمەتىنە بولەنىپ جۇرگەن بەتكەۇستار باعلاندار بارشىلىق. ونداي ادامدى ەلى توبەسىنە كوتەرەدى, ارداقتايدى. سونداي عيبراتتى  جان, اتپال ازاماتتىڭ ءبىرى - كوپبولسىن ابدىكەش ۇلى دەر ەدىم.

كوپبولسىننىڭ ومىردەگى سارا جولى قانشالىقتى ماعىنالى بولسا, قاراپايىمدىلىق قالىبىنان اڭقىلداعان بالا كوڭىلى دە تابيعاتىمەن استاسىپ جاتاتىندىعى كوڭىلگە قۋانىش ۇيالاتادى. قۇداي بەرگەن نەسىبەسىن اق ادال ەڭبەگىمەن تەرىپ جۇرگەن كوبەكەڭنىڭ  وزىندىك ىرىلىگى, بەت-بەينەسى, كەلبەتى بار. دوسقا, ارىپتەستەرىنە, كورشى-قولاڭعا, اعايىن-باۋىرعا, ۇلكەن-كىشىگە دەگەن تۋرا جولدان تايماعان ادالدىعىن كورگەندە سۇيسىنەتىنىڭ تاعى بار. ءون بويىنان كەڭدىكتىڭ, كەمەلدىكتىڭ ءيىسى اڭقىپ تۇرادى. دالاداي دارحان دەسەك تە جاراسادى.  ول تۋرالى  اڭگىمە تولعاي باستاسام ەجەلدەن كەلە جاتقان مىنا ءبىر اڭىز ەرىكسىز ويىما ورالادى.

ەجەلگى گرەك فيلوسوفى ديوگەن قاريا پەندەلىك ءفاني دۇنيەدەن باز كەشىپ جۇرگەن شاعىندا قاراقۇرىم جۇرتتىڭ نوپىرىنەن اياق العىسىز قان بازاردىڭ قاق  ورتاسىندا قولىنا شىراق ۇستاپ كەلە جاتادى. تاپا-تال تۇستە ونىڭ شىراقپەن جولىنا جارىق شاشىپ جۇرگەنىنە تاڭعالىسقان كوپشىلىك:

- اقساقال, نە جوعالتتىڭىز, نە ىزدەپ ءجۇرسىز؟- دەپ سۇرايدى. سوندا ول كىسى:

- ادام ىزدەپ ءجۇرمىن, - دەپ جاۋاپ قاتادى. ونىڭ بۇل ىسىنە اۋىزدارى اشىلىپ, اڭتارىلىپ قالعان الەۋمەت:

- اقساقال-اۋ, جان-جاعىڭىزدىڭ  ءبارى تولعان ادام عوي,- دەپتى تاڭىرقاپ.

-جوق, بۇلار جاي عانا ادام سيپاتىنداعى كىسىلەر عانا. ال, جۇرەگىنە يمان ۇيالاعان, پەندەشىلىكتەن ادا ناعىز ادام تەڭىزدىڭ تەرەڭ تۇبىندەگى اسىل مارجانداي تىم نەكەن-ساياق, - دەگەن ەكەن.

ءيا, وسى ءبىر تاعىلىمدىق ءتامسىل كوپبولسىننىڭ عيبراتتى ءومىر جولىن, بولمىسىن تانۋعا, تۋعان جەر مۇددەسى ءۇشىن ەسەلى ەڭبەگىن باعالاپ, ونىڭ ازاماتتىق تۇلعالى قادىر-قاسيەتىن سەزىنۋگە ارنالعانداي كورىنەدى دە تۇرادى. راسىندا ول كەڭدىك, تەرەڭدىك, بيىكتىك دەگەن  ادامگەرشىلىكتىڭ ولشەمدەرىن وزىنە تەمىرقازىق ەتىپ العان تۇلعا. اعا ۇرپاقتىڭ عيبراتتى وكىلدەرىنىڭ الدىن كورىپ, دامدەس بولىپ, ءتالىمىن العان اسىل بۋىننىڭ ءبىرى, ۇلىلاردىڭ ۇلى توبىنىڭ سارقىتى دەپ سانايمىن. ەلدىڭ بەلگىلى تۇلعالارى - س. يساەۆ, ق.جۇمابەكوۆ, ج.قوشانوۆ, ك.مەديەۆ, گەنەرالدار م.قۇرمانوۆ, ر.قايداروۆ, ە. بەلعوجانوۆ  سياقتى اسقار تاۋداي اعالارىنىڭ زيالىلىق, ازاماتتىق, كىسى سىيلاۋ, قۇرمەتتەۋ سياقتى اسىل قاسيەتتەرىن بويىنا سىڭىرگەنىن, ءتالىم العانىن زور قۇرمەتپەن ايتادى.

ۇزاق جىلداردان بەرى كوبەكەڭ قازاقستاننىڭ ارداگەرلەر ۇيىمىنىڭ ورتالىق كەڭەسىندە باس مامان, جاۋاپتى حاتشى, توراعانىڭ ورىنباسارى قىزمەتتەرىن ابىرويلى اتقارىپ كەلەدى. ۇيىمنىڭ ۇيىمداستىرۋشىلىق ءرولىن, قۇرىلىمدىق نەگىزىن جەتىلدىرۋگە, ارداگەرلەر بەلسەندىلەرىن كوتەرمەلەۋ ماراپاتتارىنا ەرەكشە نازار اۋداردى,

ءتاڭىر دارىتقان اقىل پاراساتى, وي-ءورىسى, ەرەكشە پايىمى, جادى مەن تۇيسىگى, زەردەلىگى مەن زەرەكتىگى, سەرگەكتىگى مەن سەزىمتالدىعى ونى, ءسوز جوق, زامانداستارىنان وق بويى وزىق كورسەتىپ تۇرادى. ودان قالدى ادامنىڭ ويىن ءدوپ باساتىن پسيحولوگتىق قاسيەتىن قوسىپ قويىڭىز. كوكىرەگى اشىق, كومبە كەۋدە تۇلعا بولىپ قالىپتاسۋىنا كيەلى توپىراقتىڭ دا اسەرى بولعان بولار. ويتكەنى, دانا حالقىمىز «اسىل اسىلعا, ءناسىل ناسىلگە تارتادى» دەپ تەگىن ايتپاعان عوي. وسىلاي وي توپشىلاۋىمنىڭ ءبىر ۇشىعى كوپبولسىن ابدىكەش ۇلىنىڭ  ۇشقان قىراننىڭ قاناتى تالاتىن, شاپقان تۇلپاردىڭ تۇياعى كەتىلەتىن ۇلى دالامىزدىڭ كيەلى جەرى سانالاتىن, وزىندىك دارا تاريحى بار ارقانىڭ, اقتوعايدىڭ تۋماسى. بۇل ولكە تەك قانا جاسىل جايلاۋىمەن, ايدىن شالقار كولىمەن, سىڭسىعان قۇراعىمەن, ادامدى ەرەكشە كۇيگە بولەر  قوڭىر بەلىمەن  ەرەكشەلەنىپ قويماي, ۇلاعاتتى ىسىمەن دارالانعان ايگىلى تۇلعالار شىققان كيەلى توپىراق. قاسيەت قونعان قۇت مەكەن. ال, وسىنداي توپىراقتان ءنار العان كوپبولسىن قايدان وسال بولسىن. ونىڭ سىرتىندا ارعىن اتا رۋىنىڭ توبىقتى ۇرپاعى بولسا. توبىقتى اتا پەرزەنتتەرىنىڭ قاتارىندا   كەڭگىرباي, وسكىنباي, قۇنانباي, ابايلار  تۇرعاندىقتان با, حالقىمىز وسى رۋعا ەرەكشە ىقىلاس بىلدىرەتىنى دە جاسىرىن ەمەس.

سونىمەن قاتار ۇلت ماقتانى, مارقاسقاسى - الاشتىڭ ءۇش ارىسى ءاليحان بوكەيحان, ءالىمحان ەرمەكوۆ, جاقىپ اقباەۆ سىندى قازاقتىڭ ۇلى پەرزەنتتەرى كىندىك كەسىپ, يت كويلەگىن توزدىرعان ولكە. سوندىقتان بولار وعان وسى بابالارىنىڭ كيەسى قونعان. سانالى عۇمىرىن ەلىنە, حالقىنا جانە قوعامىنا ايرىقشا قىزمەت ەتۋىمەن جۇرتتىڭ ىقىلاسىنا بولەنىپ, نازارىنا ىلىككەن زامانداس ءىنىم كوپبولسىن ابدىكەش ۇلى قازىنالى جەتپىس جاسقا تولىپ وتىر. كوبەكەڭنىڭ بۇل جەتپىس اسۋ, جەتپىس بەلەسىندە قانشاما ءىز جاتىر دەسەڭىزشى؟ ونىڭ ءار اسۋىندا, ءار بەلەسىندە ومىرگە دەگەن قۇشتارلىعى, ىڭكارلىگى, جاستىق جالىنى مەن ادامي قۇندىلىعىنىڭ, بۇلا تالانتىنىڭ ىزدەرىن كورۋگە بولادى.

قازاقتىڭ «اي-ورتاق, كۇن ورتاق, جاقسى ورتاق» دەگەن تامسىلىنە ساي   ماعان  عۇمىرىمدا جاقسى ادامدارمەن جولىعىسۋ ءساتى كوپ بۇيىردى. سونىڭ ءبىرى وسى كوپبولسىن ابدىكەشق ۇلى بەكماعانبەت سىندى ازامات. اق ادال, انتىنا بەرىك, ءبىر ءسوزدى جىگىت اعاسى.  بىرگە قىزمەتتەس بولا ءجۇرىپ, جارتى قۇرتتى ءبولىپ جەيتىندەي سىيلاستىققا جەتتىك. توننىڭ ىشكى باۋىنداي ارالاس-قۇرالاس جۇرگەن كەزەڭدە اۋمالى-توكپەلى, ەكى سويلەۋ, جالعان ايتۋ, كوپىرىپ-لەپىرۋ, تۇراقسىزدىق سياقتى مىنەز-قۇلقىن بايقاعان ەمەسپىن. تەكتىلىكتى دارىپتەپ قالىپتاسقان بولمىسىنا الىپ-قوسارىم جوق.

اكەسى ابدىكەش اقساقال اۋىل-ايماعىنا وتە بەدەلدى, ىقپالدى ادامنىڭ ءبىرى بولعان دەسەدى. كىندىگىنەن ون بالا تاراتىپ, تاربيەلەپ وسىرگەن قاسيەتتى وتباسىنىڭ ابىزى. اناسى گۇلنار دا شاڭىراعىن بەرەكەگە, ىنتىماققا بولەگەن, ازاماتىنا كەسە-كولدەنەڭ كەلمەگەن قازاقتىڭ ۇلگى تۇتار بايبىشەسى بولعان كىسى.  سىيلاس, ارالاس-قۇرالاس ەل اراسىندا ول كىسىنىڭ ء«ۇش پولكوۆنيكتىڭ اناسى» دەگەن اتى تاراپ كەتۋىنىڭ سەبەبى ءوزى الديلەپ وسىرگەن ءۇش ۇلى كوپبولسىن, قۋات, بولاتتاردىڭ ۇلكەن اسكەري شەنگە يە بولۋى. اتام قازاق «كوزىڭدى قالدىر - بۇلاق كوزىن اشا ءجۇر, ءىزىڭدى قالدىر - جاقسىلىق مۇرا شاشا ءجۇر, ءوزىڭدى قالدىر-ۇرپاق ءوسىرىپ, جاسا نۇر» - دەگەندەي, وسىنداي ۇلگىلى وتباسىندا تاربيە كورگەن كوپبولسىن تۋمىسىنان انتىنا ادال, سەرتىنە  بەرىك, جانى جايساڭ ازامات بولىپ قالىپتاسقان.

بويىندا تۋا بىتكەن تابيعي دارىنى بار. ءتاڭىرىم ونىڭ بويىنا ەكىنىڭ بىرىنە بۇيىرا بەرمەيتىن ەرەكشە تالانتتى ءناسىپ ەتكەن. ول قارا سوزدەن قايماق ايىراتىن ءسوز سۇلەيى. ادەبيەتكە, پوەزياعا ەتەنە جاقىن, اقىندىعى دا بار. اقىن بولعاندا جاي, قاراپايىم اقىن ەمەس, ارقالى, ايبارلى اقىن دەۋگە بولادى. قالامى جەلدەي جۇيرىك قالامگەردىڭ ءبىرى. مەكتەپتە, ينستيتۋت قابىرعاسىندا بىرگە ءدارىس العان دوستارىن قادىر تۇتىپ, قۋانىشتارىندا تالاي مارجان جىر ارناعانىنىڭ كۋاسى بولىپ ءجۇرمىز. ونىڭ قالامىنان ورىلگەن ءمولدىر جىرلارىن تاسبۇلاقتىڭ بال سۋىنا شولىركەگەندەي سەزىمگە بولەنىپ وقيسىڭ. اسىرەسە, الليتەراتسيا, اسسونانس جانرىنا قالام سىلتەيتىن ازداعان اقىنداردىڭ ءبىرى دەسە دە بولادى. پوەزيا سالاسىندا بۇل جانرعا كوپ اقىندار تىستەرى  باتىپ   بارا بەرمەيدى. ويتكەنى ەڭ كۇردەلى سالا.

ىڭكار كوڭىلىم جەتەلەر ولەڭ جاققا,

ءىنجۋ-مارجان ءسوزىڭدى ايتام جاتقا.

ىشتارلىعىم جوق مەنىڭ دەگەنمەنەن,

ىشتەي ساعان قىزىعام كەيبىر شاقتا.

ءىسىم مەنىڭ بولمايدى كورىنگەنمەن,

ىرگەمدى اۋلاق سالام كوبىنەن مەن.

ىلەكە, سەن نارىنقول تاۋلارىنان,

ىلەنىڭ سۋى قۇيار كولىنەن مەن, - دەپ ءىلياس اتتى ارىپتەس اقىن اعاسىنا ىنىلىك ءىلتيفاتىن جىرمەن اقتارۋى ونەر الەمىندەگى, ونىڭ ىشىندە الليتەراتسيا, اسسونانس جانرىنىڭ شەبەرى ەكەندىگىن اڭعارامىز. تاعى بىردە وسىلاي ويقاستاتىپ وي قۇراستىرا كەلىپ:

باتىرلىعىم جوق مەنىڭ, باقسىلىعىم,

بايقامادىم پەيىلدىڭ تاپشىلىعىن.

ويعا تۇيگەن جاسىمنان ءبىر قاعيدام -

ايتۋ پارىز جاقسىنىڭ جاقسىلىعىن,-دەپ جىرلايدى. ءيا, ونىڭ ولەڭ جولدارى بەلگىلى ءبىر ءسات پەن ۋاقيعالارعا بايلانىستى تۋىنداعان. زامانداستارىنىڭ جاقسىلىعىنا ءسۇيسىنۋ, ەسەلى ەڭبەكتەرىن ءتۇيسىنۋ, ورتاق ىسكە ۇلەسىن قوسۋ بولىپ تابىلادى.

وسى ورايدا كوپ ازاماتتاردا كەزدەسە بەرمەيتىن كوپبولسىن مىرزانىڭ ەرەكشە ءبىر قاسيەتى تۋرالى ايتپاقشىمىن. ءبىر كەزدەردە بىرگە وقىعان, جۇمىس ىستەگەن سىنىپتاس, كۋرستاس, جۇمىستاستارى بۇل كۇندەرى باقيلىق بولىپ كەتكەن ازاماتتاردى ۇمىتپاي, ولاردىڭ وتباسىمەن ۇنەمى بايلانىستا بولىپ, تورقالى تويىندا, توپىراقتى ولىمىندە قولتىقتارىنان دەمەپ, جىلى سوزىمەن, ارناۋ ولەڭدەرىمەن قولداۋ كورسەتىپ جاتادى. بۇل قازىرگى نارىقتىق زاماندا, ءبىرىنشى كەزەككە ماتەريالدىق يگىلىكتەر شىققان كەزدە كەز كەلگەن جىگىت اعاسىندا كەزدەسە بەرمەيتىن جانە وتە جوعارى باعالاناتىن ادامگەرشىلىك قاسيەت قوي.

قازاقتىڭ «ونەرلىنىڭ قولى التىن, ولەڭشىنىڭ ءسوزى-التىن» دەگەن قاعيداسى تۋرا وسى كوپبولسىن ابدىكەش ۇلىنا ارنالىپ ايتىلعانداي. كادىمگى سەگىز قىرلى, ءبىر سىرلى جىگىتتىڭ تورەسى. قالامىنان وتتى جىر ۇشقىنداعان اقىن ەكەنىن تىلگە تيەك ەتسەك, ەندى ءبىر قىرى -  سپورتقا دا ەتەنە جاقىن.

ونىڭ ىشىندە الەمگە كەڭ تارالعان اقىل-ويدىڭ سپورتى سانالاتىن شاحمات ويىنىنا دا جۇيرىك. شەبەر شاحماتشى ءارى بيلياردشى. جەتپىسىنشى جىلدارى ماسكەۋ قالاسىندا جارىق كورەتىن «سوۆەتسكايا ميليتسيا» جۋرنالىندا باسىلعان شاحمات تۋرالى ءتۇرلى كومبيناتسيا, ەسەپتەردىڭ شەشۋىن تاۋىپ,  جەڭىمپازدىق تۇعىرعا كوتەرىلدى. 

ال, سەكسەنىنشى جىلدارى تاشكەنت قالاسىنداعى جوعارى ميليتسيا مەكتەبىنە بايتاق ەلىمىز - بۇرىنعى كەڭەستەر وداعىنىڭ  تۇكپىر-تۇكپىرىنەن كەلگەن وفيتسەرلەر ءتارتىپ ساقشىلارى اراسىندا شاحماتتان جارىس ءوتىپ,  چەمپيون اتاعىن جەڭىپ العان بولاتىن.

كەيىن توقسانىنشى جىلدارى ەلىمىزدە بيليارد سپورتىنىڭ جاپپاي كەڭ ءورىس الا باستاعان كەزىندە كەندى ولكە جەزقازعان قالاسىندا دا العاشقى بيلياردتان تۋرنير ءوتىپ, ول سايىستا دا شاشاسىنا شاڭ جۇقتىرماي العاش رەت جەڭىمپاز اتانىپ, سىيلىق رەتىندە ارنايى كيدى يەمدەندى. بيليارد ويىنى  ادەمى ءام  كۇردەلى شارلاردى ۇياعا ءتۇسىرۋدىڭ سان ءتۇرلى, ەپتى ادىستەرىن  مەڭگەرگەن كوبەكەڭدى زامانداستارى  «ماەسترو» دەپ قۇرمەتتەيتىن.

سونداي-اق, ول كىسىنىڭ ۇيىمداستىرۋىمەن وتكىزىلگەن بيلياردتان ارداگەرلەر اراسىنداعى تۇڭعىش رەسپۋبليكالىق جارىس وتە جوعارى دارەجەدە ءوتىپ, جۇرتشىلىقتىڭ ريزاشىلىعىنا يە بولعان. استانادا وتكەن  تمد ەلدەرى كۇشتىك قۇرىلىمدارى اراسىنداعى بيلياردتان حالىقارالىق جارىسقا دا اتسالىسىپ, ناتيجەلى ونەر كورسەتكەن.

ادامزاتتىڭ اقىل-ويىنىڭ التىن قورى سانالاتىن 1500-دەي ء تۇرلى وقۋلىقتى, كىتاپتاردى جەزقازعان قالاسىنىڭ ءۇش كىتاپحاناسىنا, استاناداعى  ۇوس مۇگەدەكتەرىنىڭ گوسپيتالى «شاپاعات» قارتتار ءۇيى, قازاق-تۇرىك ليتسەيىنىڭ كىتاپحانالارىنا تاپسىرعان بولاتىن. سوڭعىسىنا تابىستالعان 225 كىتاپتىڭ 50-دەن استامى قۇندى شاحمات ادەبيەتى, الەمگە داڭقى شىققان اتاقتى گروسسمەيستەرلەر ە.لاسكەر, ح. كاپابلانكا, ا.الەحين, ب.سپاسسكي, م.بوتۆيننيك, گ.كاسپاروۆ, ا.كارپوۆ, م.تال, ل.پولۋگاەۆسكيدىڭ ء ومىرى مەن پارتيالارى تۋرالى كىتاپتار جانە ءتۇرلى شاحمات تەورياسىنا, ەرەكشە كومبيناتسيالار, وسى ويىنعا ۇيرەتەتىن وقۋلىقتاردى ليتسەي  كىتاپحاناسىنا سىيعا تارتقان مارتتىگىن ايتقان ارتىق بولماس.

وتباسى–تابيعات سىيلاعان نىعمەتتەردىڭ ءبىرى دەسەك, كوبەكەڭ قاراشاڭىراقتىڭ اقىلشىسى, ارقا سۇيەر, قامقورشى بولار وتاعاسى. جۇبايى باقىتتى ەكەۋى باقىتتى عۇمىر كەشىپ, دۇنيەگە ۇل-قىز اكەلىپ, ايرانداي ۇيىعان, تاتۋ-ءتاتتى بىرلىكتە ءومىر ءسۇرىپ جاتقان ۇلگىلى قازاق وتباسىلارىنىڭ ءبىرى. بالالارىنا جاقسى تاربيە بەرە ءبىلدى. ۇرپاقتارىنا دۇنيەنىڭ جاقسى تۇستارىن كورسەتۋدەن, جاقسىلىققا يتەرمەلەۋدەن جالىقپايتىن اتا-انا اتاندى.

ارينە, ءومىر بولعاسىن ونىڭ كۇنگەيى مەن كولەڭكەسى بولاتىنى زاڭدىلىق. شىعىستىڭ ۇلى ويشىلى, ادەبيەت تاريحىنداعى ءدۇر اقىنداردىڭ ءبىرى ءارى ەڭ كورنەكتى تۇلعاسى ابىلقاسىم فيردوۋسي:

«بىردە-بال, بىردە-ۋ بوپ وتەدى ءومىر,

باقتى دا, قايعىنى دا كوتەرە ءبىل»,- دەپ جىرلاعانداي, وسىدان ءبىر جىل بۇرىن سۇيىكتى جارى باقىتتىنى تاعدىردىڭ وتتى تولقىندارى ارامىزدان اعىزىپ اكەتكەن بولاتىن.  بۇدان جارتى ساعاتتاي ۋاقىت وتكەندە دەرەسىن ەلدىمەكەنىندە تۇراتىن اناسىنىڭ ومىردەن وزۋى, ءبىر اۋلەتتىڭ قوس اناسىن قاتار جەرلەۋ بۇل وتباسىنا اۋىر سوققى بولدى. وسى قايعى كوبەكەڭنىڭ وتباسىن ايازداي قارىعان ەدى. ۋاقىت ەمشى دەپ جاتادى عوي جۇرت. ءبارى تەك اللانىڭ عانا قولىندا ەكەنىن, جازمىشتان وزمىش جوقتىعىن تۇسىنگەن پەندە تىرلىگىن جالعاستىرا بەرەتىنى انىق. ءبىر-بىرىنەن 700 شاقىرىمدا, ءبىر مەزەتتە,جۇما كۇنى دۇنيەدەن وزعان, اسىل جاندارى اناسى كۇلنار قۇتجانقىزى مەن جان-جارى باقىتتى عۇبايدوللاقىزىنىڭ رۋحتارىنا كوڭىلدەگى شەرمەندە ويىن بىلاي تارقاتقان ەدى:

سان قىزىقتا بىرلەسە سايرانداعان,

جازدار ءوتتى جادىراپ جايراڭداعان.

ءبىر-اق ساتتە توقتاتقان ەكى ءومىردى,

قۇدىرەتى قۇدايدىڭ قايران ماعان.

اسىل جاندار, جالعاننان دامىلداسىن,

جۇماق ءتورى وزدەرىن قابىلداسىن.

ۇرپاقتارى ۇزدىرمەي دۇعالارىن,

مەيىر-نۇرعا تولتىرار قابىر باسىن.

كوپبولسىن ابدىكەش ۇلىنىڭ وتباسىندا – بالالارى ابزال اكەدەن, اسىل انادان ۇلاعاتتى تاربيە كورگەن, اللاسى اۋزىندا, نامازى وقۋلى, جاراتقاندى ءبىر ءسات ۇمىتپايتىن جاستار ءوسىپ كەلەدى. ۇلى سىرىمنىڭ قالتافونىنىڭ ستاتۋس قوس اناسى-اجەسىكۇلناردىڭ, ءوز اناسى باقىتتىنىڭ جۇزدەرىنەن مەيىرىم نۇرى توگىلىپ, كوپتى كورگەن كەيۋانانىڭ, كەلىنىنىڭ باسىنا اق جاۋلىق-ورامال سالىپ جاتقان ءساتى بەينەلەنگەن. سىرىمعا كەلگەن ءاربىر جاقسى حابار انالاردان جەتكەندەي ادەمى اسەر قالدىرادى ەكەن. ساعىنىشتى پەرزەنتىنىڭ جۇرەگىنە نۇر قۇيىپ تۇرعانداي.

ءبىز دە, وسىناۋ مەرەيلى جەتپىس جاسىندا, ابزال, اقجۇرەك ازامات كوپبولسىن ابدىكەش ۇلىنا, وتباسىنا بارلىق جاقسىلىقتى تىلەيمىز.

 

ومىرزاق وزعانباەۆ,

تاريح عىلىمدارىنىڭ دوكتورى,

 پروفەسسور