حالىقتىڭ مۇگەدەكتىكتى تومەندەتۋگە مۇمكىندىك بەرەتىن نەگىزگى ۇدەرىس وڭالتۋ بولىپ تابىلادى. وڭالتۋ شارالارى قانشالىقتى ۋاقتىلى جۇرگىزىلسە, ادام دا سونشالىقتى جىلدام ساۋىعادى. وڭالتۋ ءىسى ۇزدىكسىز بولۋى ءتيىس ەكەندىگىن ايتا كەتۋ كەرەك.
ميوكارد ينفارگى, ينسۋلت, كارديوحيرۋرگيالىق وتادان كەيىن ناۋقاس وڭالتۋ كومەگىن الۋى ءتيىس. مەديتسينادا تەك وڭالتۋ شارالارىنا عانا ەمەس, سونداي-اق مۇگەدەكتىككە دۋشار ەتەتىن قاۋىپتى دەرتتەردى ەرتە باستان انىقتاۋعا مۇمكىندىك بەرەتىن سكرينينگپەن قوسا, وڭالتۋ الدىنداعى كەزەڭگە دە كوڭىل اۋدارۋ ماڭىزدى.
وڭالتۋدىڭ نەگىزگى قاعيدالارى: ەرتە باستاۋ, كەزەڭدىلىك, ۇزدىكسىزدىك, ساباقتاستىق, جەكە جانە مۋلتيتارتىپتىك ءتاسىل, قولجەتىمدىلىك, وڭالتۋ ءىس-شارالارىن جۇرگىزۋگە ماقساتتى ناقتى جانە ايقىن تۇجىرىمداۋ.
وسىعان بايلانىستى, كارديولوگيا جانە ىشكى اۋرۋلار عىلىمي-زەرتتەۋ ينستيتۋتىنىڭ كارديولوگيا جانە وڭالتۋ بولىمشەسى الماتى قالاسى جانە ەلىمىزدىڭ باسقا وڭىرلەرىنىڭ تۇرعىندارىنا مامانداندىرىلعان كارديولوگيالىق جانە تەراپەۆتىك مەديتسينالىق كومەك كورسەتەدى. بۇل ساۋىقتىرىپ ەمدەۋ, مەديتسينالىق وڭالتۋ, فيزيوتەراپەۆتىك پروتسەدۋرالار.
ءبولىم مەڭگەرۋشىسىنىڭ مىندەتىن اتقارۋشى اسەم امانتاەۆانىڭ ايتۋىنشا, جۇرگىزىلىپ جاتقان كارديووڭالتۋ كارديولوگيالىق ناۋقاستىڭ فيزيكالىق جانە پسيحولوگيالىق جاعدايىن جاقسارتۋعا باعىتتالعان. كارديووڭالتۋعا ەمدىك فيزكۋلتۋرا, مولشەرلەنگەن جاياۋ ءجۇرىس, ۆەلوەرگومەتردە (ۆەلوترەناجەر) ديناميكالىق جاتتىعۋلار جاساۋ, تەمەكىدەن باس تارتۋ, دەنە سالماعى مەن ليپيدتەر دەڭگەيىن قالىپقا كەلتىرۋ, ارتەريالىق گيپەرتونيانى, قانت ديابەتىن ەمدەۋ, پسيحولوگ دارىگەردى شاقىرا وتىرىپ پسيحولوگيالىق قولداۋ كورسەتۋ جاتادى.
ء«بىز پاتسيەنتتىڭ دەنساۋلىعىن, ەڭبەككە قابىلەتتىلىگىن جاقسارتۋ, اۋرۋدىڭ اسقىنۋىنىڭ الدىن الۋ, ولاردىڭ قوعامداعى كۇندەلىكتى ومىرگە بەيىمدەلۋى ءۇشىن بارلىق كۇش-جىگەرىمىزدى سالامىز», دەيدى اسەم نۇرالىقىزى.
سونىمەن قاتار ينستيتۋتتا رەزيدەنتۋرا جانە دوكتورانتۋرا ارقىلى عىلىمي كادرلاردى, ونىڭ ىشىندە الىس جانە جاقىن شەتەلدەردەن مامانداردى دايىنداۋ ءۇشىن ءبىلىم بەرۋ باعدارلاماسىن جۇزەگە اسىرادى, سونداي-اق رەزيدەنتتەرمەن ساباق جۇرگىزىلەدى.
مۇگەدەكتىكتىڭ الدىن الۋ مەن تومەندەتۋ, ءومىر ءسۇرۋ ساپاسىن جاقسارتۋ, پاتسيەنتتىڭ جۇمىس ىستەۋ قابىلەتتىلىگىن مەن ونىڭ قوعامدا الەۋمەتتىك بەيىمدەۋگە باعىتتالعان جۇمىستار ءوز ناتيجەلەرىن بەرىپ وتىر. ونى ءبىز كورىپ ءجۇرمىز, اسىرەسە ينفاركت پەن كارديوحيرۋرگيالىق وتالاردان كەيىن پاتسيەنتتەردىڭ دەنساۋلىعى وڭالادى جانە ەڭبەك ەتۋ قابىلەتتەرى قالپىنا كەلەدى.