وبلىس اكىمى قۋانىشبەك ىسقاقوۆ تۇرعىنداردىڭ ءوتىنىش-تىلەكتەرىن تىڭداپ, بىرقاتار الەۋمەتتىك نىساندار جۇمىسىمەن تانىسۋ ماقساتىندا قىزىلوردا قالاسىنىڭ اۋماعىنا ەنەتىن ەلدى مەكەندەردى ارالادى.
الدىمەن ايماق باسشىسى اقجارما اۋىلدىق وكرۋگىندەگى بايمۇرات باتىر اۋىلىنداعى مەملەكەتتىك-جەكەمەنشىك ارىپتەستىك اياسىندا سالىنعان 150 ورىندىق مادەنيەت ۇيىندە بولدى. اۋىلدىق وكرۋگ ەلدى مەكەندەرىندە اۋىز سۋ, كارىز جۇيەلەرىنىڭ ماسەلەسى تولىق شەشىلگەن, ەندى «اۋىل – ەل بەسىگى» باعدارلاماسى اياسىندا تالدىارال اۋىلىنا 9 كوشەگە تاس توسەۋ جوسپارلانىپ وتىر.
مۇنان كەيىن ايماق باسشىسى 6 مىڭنان استام تۇرعىنى بار اقسۋات اۋىلدىق وكرۋگىندە بولدى. «وڭىرلەردى دامىتۋ باعدارلاماسى» شەڭبەرىندە بۇل اۋىلداعى بىرنەشە كوشەگە جوندەۋ جۇمىستارى جۇرگىزىلىپ, جارىق باعانالارى جاڭارتىلعان. تۇرعىندار ءوڭىر باسشىسىمەن كەزدەسۋدە تابيعي گاز تارتۋ ماسەلەسىن كوتەردى. ايماق باسشىسى بۇل جۇمىستار ءۇشىن بيىلعى جىلى دا رەسپۋبليكالىق بيۋدجەتتەن قارجى قارالعاندىعىن ايتتى. الداعى ۋاقىتتا قۇرىلىس- مونتاج جۇمىستارى باستالادى.
ءوڭىر باسشىسىنىڭ تۇرعىندارمەن كەزدەسۋى تاسبوگەت كەنتىندە جالعاستى. قالا ىرگەسىندەگى كەنتتە ماسەلە كوپ. سونىڭ ىشىندە جاڭادان ۇيلەر سالىنعان اۋدانعا جالپى ۇزىندىعى 17 شاقىرىم ەلەكتر جەلىسىن تارتۋ, جاڭا ەمحانا سالۋ, №5 وليمپيادالىق رەزەرۆ سپورت مەكتەبىندەگى سپورتشىلارعا جاعداي جاساۋ قاجەتتىگى باسا ايتىلدى.
وبلىس اكىمى ارى قاراي بەلكول كەنتىنىڭ تۇرعىندارىمەن كەزدەسىپ, ۇسىنىس-تىلەكتەرىن تىڭدادى. بەلكولدىكتەر جالپى ۇزىندىعى 7,8 شاقىرىم بولاتىن 10 كوشەگە ورتاشا جول جوندەۋ جۇمىستارىن جۇرگىزۋ, ورتالىق كوشەگە جاياۋ جۇرگىنشىلەر جولىن سالۋ مەن تەمىرجول وتكەلىنە اسپالى كوپىر سالۋ ماسەلەسىن ايتتى.
تەمىرجولعا كوپىر ماسەسىنە قاتىستى قالا اكىمى ن.نالىباەۆ ءتيىستى مينيسترلىككە ۇسىنىس جولدانعانىن اتاپ ءوتتى.
سونىمەن قاتار ايماق باسشىسى قوسشىڭىراۋ, قىزىلجارما, قىزىلوزەك اۋىلدىق وكرۋگتەرى مەن تالسۋات ەلدى مەكەنىندە دە بولدى.